စစ်ကိုင်းတိုင်း၊ ဝက်လက်မြို့နယ်အခြေစိုက် Tiger King ပြောက်ကျားတပ်ဖွဲ့ နှင့် ဝက်လက် PDF တို့က ယနေ့ ဇူလိုင်လ ၁၉ ရက်နေ့တွင် ကျရောက်သော ၇၅ နှစ်မြောက် အာဇာနည်နေ့အထိမ်းအမှတ် ဂုဏ်ပြုအခမ်းအနားအား ဝက်လက်နယ်တစ်နေရာစီတွင် ကျင်းပပြုလုပ်ခဲ့သည်။
ကျဆုံးလေပြီးသော အာဇာနည်ခေါင်းဆောင်ကြီးများအား အလေးပြုခဲ့ကြပြီး Tiger King ပြောက်ကျားတပ်ဖွဲ့ ခေါင်းဆောင်နှင့် တပ်ရင်းမှုးတို့ကလည်း ဂုဏ်ပြုမိန့်ခွန်း ပြောကြားခဲ့သည်။
အဆိုပါမိန့်ခွန်းတွင် “ကျွန်တော်တို့မှာ တကယ်တမ်း အာဇာနည်ဟာ ၉ ဦးမကတော့ပါဘူး။ ကျွန်တော်တို့ရဲ့ ဖက်ဒရယ် ဒီမိုကရေစီ နိုင်ငံတော်သစ် တည်ထောင်နိုင်ရန် ကြိုးပမ်းရင်း ကျဆုံးခဲ့ကြရသော အာဇာနည် သူရဲကောင်းအပေါင်းအား အစဥ်အမြဲ အလေးနီပြု ဦးညွှတ်လျက် ဒီတော်လှန်ရေးကြီးတွင် အဆုံးတိုင် မဆုတ်မနစ်သော ဇွဲဖြင့် တော်လှန်သွားပါမည်ဟု အဖွဲ့သားများက ကတိသစ္စာပြုအပ်ပါသည်။”ဟု Tiger King ပြောက်ကျားတပ်ဖွဲ့ တာဝန်ရှိသူက ပြောသည်။
အလားတူဝက်လက်မြို့နယ် PDF တပ်ရင်း(၂)က ဦးဆောင်ကျင်းပသော ၇၅ကြိမ်မြောက် အာဇာနည်နေ့အောက်မေ့ဖွယ် အခမ်းအနားအား ရွှေဘိုခရိုင် တပ်ရင်း (၅) တပ်ခွဲ (၁)၊ ဝက်လက်မြို့နယ် ကျေးရွာ ပ.က.ဖ များ၊ဝက်လက်မြို့နယ် ပ.က.ဖ တာဝန်ခံ၊ဝက်လက်မြို့နယ် ပ.လ.ဖ တာဝန်ခံ၊ဝက်လက်မြို့နယ် ပ.အ.ဖ တာဝန်ခံ၊ ဝက်လက်မြို့နယ် ပညာရေးတာဝန်ခံ နှင့် ဝက်လက်မြို့နယ် တိုက်နယ် ပ.က.ဖ တာဝန်ခံများ တက်ရောက်အလေးပြုခဲ့ကြသည်။
ကျဆုံးသွားသော အာဇာနည်ကိုးဦးသာမကခေတ်အဆက်ဆက် တော်လှန်ရေးအတွင်း ကျဆုံးခဲ့သော အာဇာနည်သူရဲကောင်း အားလုံးကို အလေးနီပြုအပ်ကြောင်း၊ အာဇာနည်တို့ထုံး နှလုံးမူ၍ မပြီးပြတ်သေးသောပြည်သူ့တော်လှန်ရေးကို အဆုံးထိ ဆင်နွှဲကြရန် ဝက်လက်PDFကတိုက်တွန်းခဲ့သည်။
ယနေ့ ၇၅နှစ်မြောက် အာဇာနည်နေ့အခမ်းအနားအား အကြမ်းဖက်စစ်ကောင်စီတပ်ကို ခုခံတိုက်ခိုက်နေသည့်အဖွဲ့အစည်းအသီးသီးကလည်း ၎င်းတို့နယ်မြေများတွင် ကျင်းပပြုလုပ်လျက်ရှိသည်။
