မန္တလေးမှာ မဘသ နဲ့ စစ်အုပ်စုကိုလိုလားသူတွေ ရဲ့ ဒီဇင်ဘာလ ၂၁ ရက်က စုရုံးဆန္ဒပြပွဲကို Tik Tok မှာ တင်ခဲ့တဲ့ အသက် ၂၀ အရွယ် အမျိုးသမီးကို စစ်ကောင်စီတပ်က ဖမ်းဆီးလိုက်ပါတယ်။
ဒီဇင်ဘာလ ၂၁ ရက်က မဟာမုနိဘုရားကြီး ၊၄၅ တာကွင်းမှာ မဘသတွေ နဲ့ စစ်အုပ်စုလိုလားသူတွေက NUG ၊ PDF ကိုအကြမ်းဖက်လို့စွပ်စွဲပြီးဆန့်ကျင် ဆန္ဒပြကြတာပါ။
အဲဒီဆန္ဒပြပွဲကို ” ဘုရားကြီးမှာ လာပြီးဟောင်နေလေရဲ့” ဆိုတဲ့စာရေးသားပြီး လူမှုကွန်ရက်မှာတင်တဲ့ အမျိုးသမီးကို စစ်ကောင်စီက မနေ့က ဒီဇင်ဘာလ ၂၂ ရက်မှာ ဖမ်းဆီးခဲ့တာပါ။
အမျိုးသမီးငယ်ကို အရပ်ဝတ် စစ်ကောင်စီတပ်သားတွေက ဖမ်းလာတဲ့ ရုပ်သံဖိုင်ကိုလည်း စစ်ကောင်စီလော်ဘီတွေက လူမှုကွန်ရက်မှာ ဖြန့်ဝေနေကြတာတွေ့ရပါတယ်။
အဲဒီအမျိုးသမီးငယ်ဟာ မဟာမုနိဘုရားကြီးနားက သင်္ကန်းတိုက်မှာ အလုပ်လုပ်ကိုင်သူဖြစ်တယ်လို့ စုံစမ်းသိရပါတယ်။
စစ်ကောင်စီရဲ့ ဝါဒဖြန့်သတင်းစာ တွေမှာ နေ့စဉ်ဖော်ပြချက်အရ စစ်အာဏာသိမ်းတာကို လူမှုကွန်ရက်မှာ ဆန့်ကျင်ရေးသားသူ ၂ ဦးထက်မနည်း နေ့တိုင်းဖမ်းဆီးခံနေရပါတယ်။
