နေပြည်တော်၌ပြုလုပ်သည့် အာဏာသိမ်းစစ်ကောင်စီပြုလုပ်သည့် အကယ်ဒမီပေးပွဲ တတ်ရောက်ခဲ့သည့် ဇာတ်ပို့သရုပ်ဆောင် ဦးအောင်သာ ယင်းပွဲမှအပြန် ကားပေါ်တွင် ရုတ်တရက်ကွယ်လွန်သွားကြောင်း ၎င်းနှင့်အတူသွားရောက်ခဲ့သူများက ပြောသည်။
“ကျွန်မတို့စီးတဲ့ကားထဲကပါ။ သူ့မိသားစုဘယ်ကလည်း သိကြပါလား။ ရုတ်တရက်မေ့လဲ၊မနေ့ကညက ဝမ်းသွားထားတယ်တဲ့၊မနက်ကြတော့ အစာမရှိ။အကယ်ဒမီပေးပွဲက အပြန်ကားထဲမှာဆုံးတာပါရှင့်။ ကောင်းရာသုကတိလားပါစေ။”ဟု အမျိုးသမီးသရုပ်ဆောင်တစ်ဦးက သူ၏ လူမှုကွန်ရက်စာမျက်နှာတွင် ရေးသားထားသည်။
မေလ ၇ရက် နံနက် ၈ နာရီ ၂၀ခန့်တွင် ရန်ကုန်သို့ပြန်မည့်ကားပေါ်၌ ကွယ်လွန်သွားခြင်းဖြစ်ကြောင်း ၎င်းက ဆိုသည်။
ကွယ်လွန်သွားသည့် ဦးအောင်သာသည် ရုပ်ရှငိဇာတ်လမ်းများတွင် အဖေခန်းများပါဝင်သရုပ်ဆောင်သည့် ဇာတ်ပို့တစ်ဦးဖြစ်ပြီး အသက် (၇၀)ကျော်အရွယ်ရှိပြီဖြစ်ကြောင်း သိရသည်။ သေဆုံးမှုနှင့်ပတ်သက်ပြီး ၎င်း၏ မိသားစုထံဆက်သွယ်မေးမြန်းရာ ဆက်သွယ်၍ မရပေ။
စစ်ကောင်စီက နေပြည်တော်၌ ပြုလုပ်သည့် အကယ်ဒမီပေးပွဲတတ်ရောက်နိုင်ရန် အနုပညာရှင်များအတွက် ကားများစီစဉ်ပေးထားခြင်းဖြစ်သည်။
အကယ်ဒမီပေးပွဲကို သုံးနှစ်စာပေါင်း၍ ကျင်းပခြင်းဖြစ်သောကြောင့် ပွဲချိန်အတော်ကြာမြင့်ခဲ့ပြီး အစားအသောက်နှင့်ပတ်သက်၍ အဆင်မပြေမှုများလည်းရှိခဲ့သည်ဟု အနုပညာရှင်အချို့ကပြောသည်။
“အဓိက တရားခံက ပွဲစီစဉ်သူနဲ့ တာဝန်ရှိသူအားလုံး”ဟု အဆိုပါသရုပ်ဆောင်သေဆုံးမှုနှင့်ပတ်သက်၍ အမျိုးသားတစ်ဦးက မှတ်ချက်ရေးသားထားသည်။
