ဆိုင်းမင်း/People’s Spring
မန္တလေးမြို့ ၊ပြည်ကြီးတံခွန်မြို့နယ် ရပ်ကွက်ရုံးအနီး ပြီးခဲ့တဲ့ ရက်ပိုင်းကစစ်ကောင်စီတပ်ဖွဲ့ တားဆီးစစ်ဆေးချိန် ဆိုင်ကယ်တိမ်းမှောက်ပြီး လူငယ် ၁ ဦးသေဆုံးမှု ဖြစ်ပွားခဲ့တယ်လို့ ဒေသခံအချို့ထံကသိရပါတယ်။
အဲဒီဖြစ်စဉ်ဟာ သြဂုတ်လ ၂၇ရက် ည ၁၀ နာရီခန့်က ပြည်ကြီးတံခွန်မြို့နယ် ၊ စက်မှု (၁) ရပ်ကွက် ၊ ၅၆ လမ်းနဲ့ ၁၃၃ လမ်းကြား ၊ (ဇ) ရပ်ကွက်ရုံးအနီးမှာဖြစ်ပွားတာခဲ့တာပါ။
Public Service Announcement
ရပ်ကွက်ရုံးအနီး လမ်းမ မှာ စစ်သား နဲ့ ပျုစောထီး ပူးပေါင်းအဖွဲ့က အသက် ၂၅ နှစ်ဝန်းကျင်လူငယ် ၂ ဦးစီးလာတဲ့ ဆိုင်ကယ်ကို အတင်းတားဆီးစစ်ဆေးရာမှာ ဆိုယ်ကယ်မှောက်သွားတာလို့ ဒေသခံအချို့ဆီကစုံစမ်းသိရပါတယ်။
အခင်းဖြစ်ပြီးနောက် မောင်စိုးဆိုတဲ့ လူငယ်ကိုလူမှုကူညီရေးအသင်းကားနဲ့ ဆေးရုံကိုပို့ဆောင်ခဲ့ပေမယ့် ဦီးခေါင်းမှာရရှိထားတဲ့ ဒဏ်ရာနဲ့ သေဆုံးသွားတာကို ပြန်လည်ကြားသိရတယ်လို့ သေဆုံးသူရဲ့ မိသားစုနဲ့နီးစပ်သူတစ်ဦးကပြောပါတယ်။
“ဆိုင်ကယ်အက်ဆီးဒန့် ကြောင့် ဆုံးတယ်ပဲသတင်းလွှင့်ခိုင်းတယ်”လို့ မိသားစုနဲ့နီးစပ်သူက ဆိုပါတယ်။
သေဆုံးသူနဲ့အတူပါလာတဲ့ လူငယ်နဲ့ စက်တင်ဘာလ ၁ ရက်နေ့အထိ အဆက်အသွယ်မရသေးတာကြောင့် ဖြစ်စဉ် အကြောင်းရင်းကို မသိရသေးဘူးလို့လည်း သေဆုံးသူလူငယ်မိသားစုနဲ့နီးစပ်သူက ပြောပါတယ်။
အဆက်အသွယ်မရတဲ့လူငယ်ရဲ့ ကံကြမ္မာ ကိုတော့ တိတိကျကျ မသိရသေးပါဘူး။
အခင်းဖြစ်တဲ့ ညက စစ်ကောင်စီတပ်ဖွဲ့ဝင်ဟာ ပြည်ကြီးတံခွန်မြို့နယ် ၊ (ဇ) ရပ်ကွက်မှာ သေနတ်ပစ်ဖောက်တာတွေ ပြုလုပ်ခဲ့တယ်လို့ ရပ်ကွက်နေပြည်သူအချို့ကလည်းပြောပြပါတယ်။
စစ်ကောင်စီဘက်ကတော့ ပြည်ကြီးတံခွန်မြို့နယ် ၊ (ဇ) ရပ်ကွက် ဖြစ်စဉ်နဲ့ပတ်သက်ပြီး ရှင်းလင်းချက်ထုတ်ပြန်တာမတွေ့ရပါဘူး။
မန္တလေးမှာ စစ်ကောင်စီတပ်ဖွဲ့ဝင်တွေ တားဆီး စစ်ဆေးချိန် မရပ်ပေးလို့ဆိုတဲ့အကြောင်းပြချက်နဲ့ ကား နဲ့ဆိုင်ကယ်တွေကို ပစ်ခတ်တာတွေကြောင့် အရပ်သားပြည်သူတွေ သေဆုံးခဲ့ရတဲ့ ဖြစ်စဉ်တွေ ဖြစ်ထားပါတယ်။
ဒါအပြင် လမ်းသွားလမ်းလာ ပြည်သူတွေ ၊အထူးသဖြင့်လူငယ်ပိုင်းကိုပစ်မှတ်ထားပြီး စစ်ဆေးကာ PDF တပ်ဖွဲ့ဝင် ဆိုတဲ့စွပ်စွဲချက်နဲ့ဖမ်းဆီးတာ နဲ့ ငွေညှစ်တဲ့ လုပ်ရပ်တွေလည်း ရှိထားပါတယ်။
