မိထက်/People’s Spring
ရှမ်းပြည်အရှေ့ပိုင်း၊ မိုင်းပျဉ်းမြို့နယ်အတွင်း RCSS စခန်းကို စစ်ကောင်စီတပ်နှင့် လားဟူပြည်သူ့စစ်ပူးပေါင်းတပ်ဖွဲ့ကတိုက်ခိုက်ရာ တိုက်ပွဲပြင်းထန်ခဲ့ပြီး စစ်ကောင်စီဘက်မှငါးဦးသေဆုံးခဲ့ကြောင်း သတင်းရရှိသည်။
မိုင်းပျဉ်းမြို့နယ်၊ ယင်းခမ်းကျေးရွာအနီးတွင်စက်တင်ဘာလ ၁၉ ရက် နံနက် ၁၁နာရီခန့်မှစ၍ တိုက်ပွဲဖြစ်ပွားခဲ့ခြင်းဟု ဒေသခံတဦးကပြောသည်။
“လားဟူ ပြည်သူ့စစ်က သူ့နေရာကို RCက ဝင်ပြီးတပ်စွဲလို့ဆိုပြီးတော့ စစ်ကောင်စီနဲ့အတူ စတိုက်တာ။ တိုက်ပွဲက လေးနာရီလောက်ကြာတယ်။ ပွဲအပြီးမှာစစ်ကောင်စီဘက်က၅ယောက်သေတယ်။
Public Service Announcement
သူတို့ပြန်ဆုတ်သွားတယ်” ဟုမိုင်းပျဥ်းဒေသခံတဦးကပြောသည်။
စစ်ကောင်စီနှင့် လားဟူပြည်သူ့စစ်အဖွဲ့သည် ညနေ ၃နာရီခန့်တွင် မိုင်းပျဥ်းမြို့ပေါ်သို့ပြန်လည်ဆုတ်ခွာသွားပြီး တိုက်ပွဲဆက်လက်ဖြစ်ပွားမည်ကို ဒေသခံများကစိုးရိမ်နေသည်။
စစ်ကောင်စီတပ်နှင့် ပြည်သူ့စစ်ပူးပေါင်းအင်အား (၁၀၀) ခန့်က လာရောက်တိုက်ခိုက်ခဲ့၍ တိုက်ပွဲ ဖြစ်ပွားခဲ့ကြောင်းRCSS ပြောရေးဆိုခွင့်ရှိသူ ဗိုလ်မှူး စိုင်းခမ်းစံက သျှမ်းသံတော်ဆင့်သို့ ဖြေကြားထားသည်။
တိုက်ပွဲအတွင်း ပြည်သူ့စစ်တပ်အဖွဲ့ဝင် လေးဦး၊ စစ်ကောင်စီတပ်ဖွဲ့ဝင်တဦးသေဆုံးပြီး သေနတ်သုံးလက်သိမ်းဆည်းရရှိခဲ့ကြောင်း RCSS က ယနေ့(စက်တင်ဘာလ ၂၀ရက်) သတင်းထုတ်ပြန်ထားသည်။
သျှမ်းပြည် ပြန်လည်ထူထောင်ရေးကောင်စီ(RCSS)သည်တနိုင်ငံလုံးအပစ်အခတ်ရပ်စဲရေးသဘောတူစာချုပ် (NCA)လက်မှတ်ထိုးထားပြီးစစ်တပ်အာဏာသိမ်းပြီးနောက်ပိုင်းတွင် စစ်ကောင်စီ ပြုလုပ်သောဆွေးနွေးပွဲများကို အဓိကတက်ရောက်နေသောအဖွဲ့ဖြစ်သည်။ စစ်အာဏာရှင်အားတော်လှန်သည့်တိုက်ပွဲများတွင်ပါဝင်ခြင်းမရှိ၍ လူထု၏ဝေဖန်ခြင်းကို အစဥ်
တစိုက်ကြုံခဲ့နေသောအဖွဲ့လည်းဖြစ်သည်။ RCSS/SSA ခေါင်းဆောင်ယွက်ဆစ်က PDFများမှာ ဓါးပြများဖြစ်လာမည်ဟု အင်တာဗျူးတွင်ပြောဆိုခဲ့မှုကြောင့် ပြည်သူများ၏ ပြင်းထန်သောဝေဖန်မှု ကြုံခဲ့သည်။
ထိုကြောင့် ယခုတိုက်ပွဲသည် စစ်တပ်အာဏာသိမ်းပြီးနောက်ပိုင်း ၃ နှစ်ကျော်အတွင်း စစ်ကောင်စီတပ်နှင့် RCSS တို့ပထမဆုံးအကြိမ်တိုက်ပွဲဖြစ်ပွားခဲ့ခြင်းဖြစ်သည်။
RCSSသည် မွန်ပြည်သစ်ပါတီ (MNSP)၊ ဒီမိုကရေစီအကျိုးပြုကရင့်တပ်မတော်(DKBA)၊ ကရင်ငြိမ်းချမ်းရေးကောင်စီ (KNU/KNLA (PC) ၊ လားဟူဒီမိုကရက်တစ် အစည်းအရုံး (LDU) ၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)နှင့် ရခိုင်ပြည်လွတ်မြောက်ရေးပါတီ(ALP)တို့နှင့်အတူ တိုင်းရင်းသားလက်နက်ကိုင်အဖွဲ့အစည်းခုနစ်ဖွဲ့၏မဟာမိတ်အဖွဲ့ -7 Ethanic Armed Organization Alliance – 7EAO Allianceကို ပြီးခဲ့သည့်မတ်လက ဖွဲ့စည်းခဲ့သည်။ အဖွဲ့ခေါင်းဆောင်အဖြစ် RCSS ဗိုလ်ချုပ်ကြီးယွက်စစ်က တာဝန်ယူခဲ့သည်။
သို့သော်စစ်ကောင်စီနှင့် RCSS ကြားတွင်၂၀၂၄ ခုနှစ်အတွင်း အဆင်မပြေမှုအချို့ရှိနေပြီး RCSS သည် စစ်ကောင်စီနှင့်ဆက်ဆံရေး ဖြတ်တောက်ရန် ကြိုးစားနေကြောင်း ရှမ်းပြည်နယ်မှ စစ်ရေးသတင်းရင်းမြစ်အချို့ကပြောသည်။
၂၀၂၄ ခုနှစ် ဇူလိုင်လ ၁၂ ရင်တွင် နမ့်စန်မြို့တွင် RCSS/SSA တပ်ဖွဲ့ဝင် ၅ ဦးကို KIA ထုတ်လက်နက်ခဲယမ်းများနှင့်အတူ ဖမ်းဆီးရရှိခဲ့ကြောင်းရစ်ကောင်စီကထုတ်ပြန်သည်။ သို့သော် RCSS ကမူ တပ်တွင်း လက်နက်မှောင်ခိုရောင်းဝယ်မှုကို တင်းကြပ်စွာတားမြစ်ထားပြီး ယခုတပ်ဖွဲ့ဝင် ၅ ဦးမှာ ခွင့်ယူထားသူများဖြစ်ပြီး တာဝန်ချိန်ပြင်ပတွင် ၎င်းတို့မိတ်ဆွေများဖြင့် လုပ်ခဲ့ခြင်းသာဖြစ်ကြောင်း ပြန်လည်ဖြေရှင်းခဲ့သည်။
