စောနွေဦး/People’s Spring
မကွေးတိုင်း၊အမ်း-ပဒါန်းလမ်းမပေါ်တွင်တရုတ်ဓာတ်ငွေ့ပိုက်လိုင်းစောင့် စစ်ကောင်စီခန့်ပြည်သူ့စစ်ခေါင်းဆောင် ဦးဖိုးကျော် သေနတ်ပစ်ခတ်ခံရပြီး သေဆုံးသွားကြောင်း ဒေသခံအချို့ကပြောသည်။
အဆိုပါဦးဖိုးကျော်ကို စက်တင်ဘာ ၂၇ ရက်မနက်ပိုင်း မကွေးတိုင်း၊ ငဖဲမြို့နယ်၊ ဂုတ်ကြီးကျေးရွာအနီး အမ်း-ပဒါန်းလမ်းမပေါ်တွင် သေနတ်ဖြင့် ပစ်ခတ်ရှင်းလင်းခံရခြင်းဖြစ်သည်ဟု ဒေသခံတစ်ဦးကပြောသည်။
“ဂုတ်ကြီးရွာက ပျူစောထီးခေါင်းဆောင်လေ၊ ရွာအနားက (၃) မိုင်မှာရှိတဲ့တရုတ်ပိုက်လိုင်းစောင့်ရှောက်ဖို့ စစ်တပ်က သူကိုတာဝန်ပေးထားတာလို့ပြောတယ်။ အဲ့ဒီမနက်ပိုင်း ဆိုင်ကယ်စီးရင်း ပစ်သတ်ခံလိုက်ရတာ”ဟု ဒေသခံတစ်ဦးကပြောသည်။
Public Service Announcement
ဦးဖိုးကျော်သည် အသက် ၄၈ နှစ်ရှိပြီး စက်တင်ဘာ ၂၇ ရက် နံနက် ၉ နာရီခန့် ပစ်ခတ်ခံရခြင်းဖြစ်သည်ဟု အဆိုပါကျေးရွာသားတစ်ဦးကပြောသည်။ ထိုပစ်ခတ်မှုကို မည်သည့် အဖွဲ့အစည်းက ပြုလုပ်သည်ကိုမူ မသိရသေးသလို သတင်းထုတ်ပြန်ခြင်းလည်းမရှိသေးပေ။
ဦးဖိုးကျော်သည် စစ်ကောင်စီတပ်က ထုတ်ပေးသည့် ပစ္စတိုတစ်လက်ကိုင်ဆောင်ထားပြီး စစ်ကောင်စီနှင့်ပူးပေါင်းက ကျေးရွာပြည်သူလူထုကို ဖမ်းဆီးနှိမ့်စက်မှုများဆောင်ရွက်နေသူ တစ်ဦးလည်းဖြစ်သည်ဟု ဒေသခံများကပြောသည်။
စစ်ကောင်စီ ဝါဒဖြန့်တယ်လီဂရမ်ချန်နယ်များတွင် ငဖဲမြို့နယ်၊ ဂုတ်ကြီးရွာတွင် ကျေးရွာလုံခြုံရေးကိစ္စရပ်များတွင် တက်ကြွစွာ လုပ်ဆောင်သူတစ်ဦး နှင့် သမီးဖြစ်သူကိုပါ ကာကွယ်ရေးတပ်များက ပစ်သတ်သွားသည်ဟု ဝါဒဖြန့်နေကြသည်။
