ဩဂုတ်−၂၁၊ ၂၀၂၅။ ထားမြတ်/People’s Spring
ကချင်ပြည်နယ်၊ ဗန်းမော်မြို့၌တိုက်ပွဲများဆက်ပြင်းထန်နေကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ယနေ့ (ဩဂုတ် ၂၁ရက်)မနက်တွင် ပြောသည်။
ဗန်းမော်မြို့အပါအဝင် ကချင်ဒေသ စစ်ရေး အခြေအနေကို မေးမြန်းရာ ဗိုလ်မှူးကြီးနော်ဘူက ယခုကဲ့သို့ ပြောဆိုခြင်းဖြစ်သည်။
“တာမိုင်းလုံဘက်တို့ စကခ(၂၁)နဲ့ တပ်မ(၈၈)တို့နေတဲ့ဗန်းမော်တက္ကသိုလ်ကျောင်းပေါ့။ အဲဒီဘက်မှာနဲ့ နောက်တခုက မြို့မရပ်ကွက်လို့ပြောရမှာပေါ့။ ဝင်းလိုက်ဟိုတယ်တို့ မြစ်ဆုံဟိုတယ်တို့ဘက်မှာ ပိုပြီးမှ တိုက်ပွဲက ပိုပြင်းထန်တယ်လို့ပြောတယ်”ဟု ဗိုလ်မှူးကြီးနော်ဘူက ပြောသည်။
Public Service Announcement
ဗန်းမော်မြို့၌တိုက်ပွဲများ ပြန်လည်ပြင်းထန်နေခြင်းမှာ စစ်ကောင်စီက စစ်ကြောင်းထိုးလာ၍ ဖြစ်ဟု ပြောသည်။ ဩဂုတ်လဆန်းပိုင်းတွင် ဗန်းမော်မြို့သို့ စစ်သင်္ဘောအုပ်စု ရောက်ရှိလာပြီးနောက် စစ်ကောင်စီဘက်က ထိုးစစ်ဆင်လာခြင်းဖြစ်သည်ဟု ဆိုသည်။
“တနေ့ကိုတော့လေကြောင်းကသုံးလေးငါးခေါက်လာတယ်။ လက်နက် ကြီး တို့ ဒရုန်းတို့တော့ အကြိမ်ပေါင်း ၂၀၊ ၃၀လောက် ဗုံးကြဲတယ်တဲ့”ဟု ဗိုလ်မှူးကြီးနော်ဘူက ပြောသည်။
ဖားကန့်ဒေသနှင့်မိုးညှင်းမြို့နယ်အင်းတော်ကြီးဒေသ စစ်ရေးအခြေအနေကိုလည်း ဗိုလ်မှူးကြီးနော်ဘူက ပြောသည်။
“အင်းတော်ကြီးဘက်မှာကတော့ မမုံကိုင်တို့ အဲဒီဘက်မှာ တိုက်ပွဲရှိတယ်။ အခု ဒီရက်ကတော့ နည်းနည်းပြန်ငြိမ်သွားပါပြီ။ ဖားကန့်ဘက်မှာတော့ လက်နက်ကြီးနဲ့ လှမ်းပစ်တာမျိုးရှိတယ်။ ကာမိုင်းဘက်ကနေ စစ်ကြောင်းအသစ်တွေပြန်ထိုးတယ်လို့ကြားတယ်။ဒါပေမဲ့ အဲဒီစစ်ကြောင်း အခုဘယ်မှာ ရောက်နေတယ်ဆိုတာတော့ အတိအကျတော့ မသိရသေးဘူး” ဟု ဗိုလ်မှူးကြီးနော်ဘူက ပြောသည်။
ဗန်းမော်မြို့တိုက်ပွဲအတွင်းစစ်ကောင်စီတပ်ဘက်ကထိခိုက်သေဆုံးမှုများပြားခဲ့ကြောင်း ကချင်စစ်ရေးသတင်းရင်းမြစ်အချို့က ပြောသည်။
KIA အနေဖြင့်တိုက်ပွဲအတွင်းထိခိုက်ကျဆုံးအပါအဝင်စစ်ရေး အခြေ အနေများကို ထုတ်ပြန်ပြောဆိုလေ့ မရှိပေ။
ယမန်နေ့ ဩဂုတ် ၂၀ရက် ဗန်းမော်တိုက်ပွဲတွင် စစ်ကောင်စီ၏ သံချပ်ကာယာဉ်၁စီးကို KIAက တိုက်ခိုက်ခဲ့ရာ ပျက်စီးအောင် လုပ်ဆောင်နိုင်ခဲ့ကြောင်း ကချင်စစ်ရေးသတင်းရင်းမြစ်အချို့က ပြောသည်။
အခြားကချင်စစ်ရေးသတင်းရင်းမြစ်တဦးကလည်း “ဒီနေ့ စခတွေ အယောက် ၃၀ လောက်သေမယ်လို့ ခန့်မှန်းရတယ်။ တော်တော် အထိနာသွားကြတယ်” ဟု ဩဂုတ် ၂၀ရက် တိုက်ပွဲအခြေအနေကို ယမန်နေ့က ပြောပြထားသည်။
KIAနှင့် မဟာမိတ်ပူးပေါင်းတပ်သည် ဗန်းမော်မြို့သိမ်းစစ်ဆင်ရေးကို ၂၀၂၄ ဒီဇင်ဘာက စတင်ခဲ့ရာ စစ်ကောင်စီ တပ်ရင်းဌာနချုပ်အချို့နှင့် တပ်စခန်းနေရာများသိမ်းပိုက်ထားနိုင်သော်လည်းအမှတ်(၂၁) စစ်ဆင် ရေးကွပ်ကဲမှုဌာနချုပ်၊ ခလရ(၄၇) အပါအဝင် စစ်ကောင်စီ၏ အရေးပါသည့် တပ်ရင်းဌာနချုပ် အချို့လည်း ကျန်နေသည်။
ယခု ဩဂုတ်လ စစ်ကောင်စီ၏ ထိုးစစ်တွင် KIA ယခင်သိမ်းပိုက်ထားသည့် အမြောက်တပ်ရင်း(၃၆၆)ကို စစ်ကောင်စီဘက်က ပြန်လည်နေရာယူနိုင်ခဲ့သည်ဟု ဆိုသည်။
