close
Connect with us

Hi, what are you looking for?

သတင်း

ပုလဲနယ်ကို စစ်တပ်က အင်အားအများအပြားပို့ စစ်ကြောင်းထိုး၊ ကန့်ဒေါင့်တိုက်ပွဲ ဆက်ဖြစ်နေ

စစ်ကိုင်းတိုင်း၊ ပုလဲမြို့နယ်အတွင်း စစ်ကောင်စီတပ်က အင်အားအများအပြားပို့ စစ်ကြောင်းထိုးနေပြီး တော်လှန်ရေးတပ်များထိန်းချုပ်ထားသည့် ကန့်ဒေါင့်ရွာစခန်း ပြန်သိမ်းပိုက်ရန်ကြိုးစားနေကြောင်း သတင်းရရှိသည်။

PLAပူးပေါင်းတပ် သိမ်းပိုက်ထိန်းချုပ်ထားသော ကန့်ဒေါင့်ရွာအား တွေ့ရစဉ်။ ဓာတ်ပုံ - PLA

ဩဂုတ် ၂၁၊၂၀၂၅။လူအေး၊မေ/People’s Spring

စစ်ကိုင်းတိုင်း၊ ပုလဲမြို့နယ်အတွင်း စစ်ကောင်စီတပ်က အင်အားအများအပြားပို့ စစ်ကြောင်းထိုးနေပြီး တော်လှန်ရေးတပ်များထိန်းချုပ်ထားသည့် ကန့်ဒေါင့်ရွာစခန်း ပြန်သိမ်းပိုက်ရန်ကြိုးစားနေကြောင်း သတင်းရရှိသည်။

” နမခကနေ Mi17နဲ့ ပို့တာ။ အင်မထီးရွာကို ပို့ပြီး အဲ့ဒီကနေ စစ်ကြောင်းထိုးနေတာ။ စစ်ကြောင်း ခြောက်ကြောင်းလောက်အထိသုံးပြီး ကန့်ဒေါင့်ကို ပြန်ထိုင်ဖို့ ကြိုးစားနေတယ်။ ကန့်ဒေါင့်မှာလည်းတိုက်ပွဲဆက်ဖြစ်နေတုန်းပဲ”ဟု ပုလဲမြို့နယ်မှ ကာကွယ်ရေးရဲဘော်တစ်ဦးကပြောသည်။

ပုလဲမြို့နယ်တွင် ပုလဲမြို့မရဲစခန်းပြီးရင် အကြီးဆုံး ရဲစခန်းဖြစ်သည့် ကန့်ဒေါင့်ရွာရဲစခန်းကိုပြည်သူ့လွတ်မြောက်ရေးတပ်မတော် – PLAဦးဆောင်ပြီး ပူးပေါင်းတပ်များက ပြီးခဲ့သည့်ဇွန်လ ၁၉ရက်တွင် သိမ်းယူခဲ့သည်။

Public Service Announcement

Public Service Announcement

ဇူလိုင်လကုန်ပိုင်းတွင် အင်မထီးပျူစောထီးရွာကို စစ်ကောင်စီက လေကြောင်းမှ အားဖြည့်ပြီး ပြန်လည်ထိုးစစ်ဆင်လာ၍ တိုက်ပွဲပြင်းထန်ခဲ့သည်။ ထို့နောက်ပိုင်းတွင် စစ်ကောင်စီတပ်က မုံရွာမြို့အခြေစိုက်၊ အနောက်မြောက်တိုင်းစစ်ဌာနချုပ်(နမခ)မှနေ၍ စစ်မှုထမ်းသင်တန်းဆင်းတပ်သားများအား လေကြောင်းမှ ထပ်မံပို့‌ဆောင်ပြီး စစ်ကြောင်းထိုးနေခြင်းဟုသတင်းရရှိသည်။

ကန့်ဒေါင့်စခန်းကို တိုက်ခိုက်နေစဉ် အနီးရှိ ကျေးရွာများအား အင်အား၂၀၀ခန့်ဖြင့် လှည့်၍ စစ်ကြောင်းထိုးနေသည်။

“အိမ်တံခါးရွက်ကအစ မချန်ဘူး။အကုန် သယ် တာ။တချို့အိမ်တွေ မီးရှို့တယ်။ ငှက်ပျောတောရွာမှာဆို စပါးတွေ၊ ဆီ‌တွေကြိတ်ယူသွားတယ်”ဟု ဒေသခံတစ်ဦးက ပြောသည်။

ဇီးဖြူကုန်းပျူစောထီးရွာမှ ထွက်လာသည့် စစ် ကြောင်းနှင့် တော်လှန်ရေးတပ်များ ဩဂုတ်၂၀ ရက်က မင်းတိုင်ပင်ရွာမြောက်ဘက်၌ တိုက်ပွဲဖြစ်ခဲ့ကြောင်း သတင်းရရှိသည်။

ထို့နောက် နေ့လည်၂နာရီကျော်တွင် မင်းတိုင်ပင်ကျေးရွာကို မီးရှို့ဖျက်ဆီးခဲ့ကြောင်း သိရသည်။

“တော်တော်လောင်သွားတယ်ထင်တယ်။မီးခိုးရောမီးတာက်ရော ကြီးတယ်”ဟု ဒေသခံတစ်ဦး က ပြောသည်။

ဇီးဖြူကုန်းရွာမှ စစ်ကြောင်းသည် ဒေသခံ ပြည်သူများအား ဓားစာခံအဖြစ်ဖမ်းဆီးကာ သတ်ဖြတ်မှုတွေလည်း ပြုလုပ်ထားကြောင်း ဒေသခံများက ဆိုသည်။

ချောင်းနား၊ မဲဇရပ်၊ ဦးနှောက်၊ ညောင်းရင်းကုန်း၊ တလိုင်းကန်ရွာအပါအဝင် ပုလဲမြို့နယ် အနောက်ပိုင်းမှ ကျေးရွာ ၁၀ရွာထက်မနည်း တိမ်းရှောင်နေကြရကြောင်း သတင်းရရှိသည်။

ပုလဲမြို့နယ်မှ အင်မထီး၊ ဇီးဖြူကုန်းရွာတို့၌လည်း စစ်ကောင်စီက တပ်စွဲထားပြီး ယင်းနေရာများမှနေ၍ လက်နက်ကြီးများဖြင့် ပစ်ခတ်နေကြောင်း စစ်ဘေးရှောင်များကပြောသည်။

ပုလဲမြို့နယ်သည် ယင်းမာပင်ခရိုင်၌ ပါဝင်ပြီး ဒေသတွင်းရှိ ဘုတလင်၊ ကနီ၊ ဆားလင်းကြီးမြို့နယ်တို့တွင်လည်း စစ်ရေးတင်းမာနေကြောင်းသတင်းရရှိသည်။

ဆက်စပ်သတင်းများ

သတင်း

အာဏာသိမ်းစစ်ကောင်စီကချင်းပြည်နယ်အတွင်းဆုံးရှုံးထားသည့် နယ်မြေများအား ပြန်လည်ထိန်းချုပ်နိုင်ရေးအတွက် စစ်အင်အားများ စုဖွဲ့ပြင်ဆင်နေသည်ကို ချင်းပြည်တောင်ပိုင်းနှင့် မြောက်ပိုင်း၌ပါ တွေ့ရှိနေရကြောင်း ချင်းညီနောင်ပြောရေးဆိုခွင့်ရှိသူ ဆလိုင်းတင်မီက ရှင်းပြပြီး စစ်ကောင်စီကို တန်ပြန်ရန် တော်လှန်ရေးအင်အားစုများအားလုံး ညီညွတ်ရေးလိုအပ်ကြောင်း ပြောကြားသည်။

သတင်း

မန္တလေးတိုင်း၊ နွားထိုးကြီးမြို့နယ်အတွင်းက တစိုးကျေးရွာကို သြဂုတ်လ ၁၅ ရက်ကစစ်ကြောင်းထိုးချိန်မှာ ပြည်သူ ငါး ဦးသတ်ဖြတ်ခံလိုက်ရတယ်လို့ ဒေသတွင်းတော်လှန်ရေးတပ်ဖွဲ့ဝင်ထံကသိရပါတယ်။

သတင်း

စစ်ကောင်စီတပ်ဟာမန္တလေးတိုင်း၊မတ္တရာမြို့နယ်အရှေ့ခြမ်းကိုပုသိမ်ကြီးမြို့နယ်နဲ့ပြင်ဦးလွင်မြို့နယ်အစပ်ကနေ တဆင့် စစ်ကြောင်းတွေ ထိုးလာနေတယ်လို့ ဒေသခံတွေက ပြောပါတယ်။

သတင်း

စစ်ကောင်စီတပ်ဟာ မြဝတီမြို့ကို ဖြတ်လေးဖြတ်လုပ်ပြီး အာရှလမ်းပိုင်းကနေ စစ်ကြောင်းသုံးကြောင်းနဲ့ ​ရှေ့တိုးဖို့ကြိုးစာယနေပေမယ့် ရှေ့ကိုရွေ့မလာဘူးလို့ ကရင်စစ်ရေးသတင်းရင်းမြစ်တွေက ပြောပါတယ်။