စက်တင်ဘာ-၈၊၂၀၂၅။ဇေအောင်/People’s Spring
မကွေးတိုင်း၊ပေါက်မြို့နယ်မှာတော်လှန်ရေးရဲဘော်တဦးရဲ့အုတ်ဂူကို စစ်ကောင်စီတပ်စစ်ကြောင်းက ဖျက်ဆီးသွားကြောင်း ဒေသခံတွေက ပြောပါတယ်။
ပြီးခဲ့တဲ့စက်တင်ဘာလဆန်းကမကွေးတိုင်း၊ပေါက်မြို့နယ်ကနေ ပြန်လာတဲ့ ပခုက္ကူက စစ်ကောင်စီတပ်ယာဥ်တန်းဟာ ကံတောရွာအနီးမှာ ပြုလုပ်ထားတဲ့ တော်လှန်ရေး ရဲဘော်တဦးရဲ့အုတ်ဂူကို ဖျက်ဆီးသွားတာဖြစ်တယ်လို့ဒေသခံတွေက ပြောပါတယ်။
အဆိုပါအုတ်ဂူဟာ ပခုက္ကူခရိုင်တပ်ရင်း ၁၁ က ပြီးခဲ့တဲ့ ၂၀၂၄ ခုနှစ်အတွင်းမှာ ကျဆုံးခဲ့ရတဲ့ အသက် ၂၁ နှစ်အရွယ် ရဲဘော်တဦးရဲ့ အုတ်ဂူဖြစ်ကြောင်း သိရပါတယ်။
Public Service Announcement
“ခွေးတွေကသက်ရှိမပြောနဲ့ သက်မဲ့အာဇာနည်ဗိမာန်ကိုတောင်မှ ကြောက်လို့ဖျက်တာပေါ့။ ကျနော်တို့ရှုံးသွားရင် သမိုင်းတင်မကဘူး။ အုတ်ဂူပါအဖျောက်ခံရမှာ။ ရှုံးသွားရင် ဒါထက်မက သမိုင်းအဖျောက်ခံရမှာ။ ဆိုးရွားတဲ့ဒဏ်တွေ ခံစားရမှာ။ မနိုင်နိုင်အောင်တိုက်ရမယ်။”လို့ ပခုက္ကူခရိုင်တပ်ရင်း ၁၁ ရဲ့ တာဝန်ခံ ကိုတေဇက ပြောပါတယ်။
၂၀၂၂ ခုနှစ်အတွင်းကလည်း စစ်ကိုင်းတိုင်း၊ မုံရွာမြို့က သုဿန်မှာကဗျာဆရာကိုကေဇဝင်းအပါအဝင် ကျဆုံး ပြည်သူ၉ဦးရဲ့ အုတ်ဂူတွေက ဓာတ်ပုံတွေနဲ့ကြယ်တွေကို စစ်အုပ်စုက ဖျက်ဆီးခဲ့ပါသေးတယ်။
