Milli Şuranın sədri Cəmil Həsənli
Bu gün Tofiq Yaqublunun şərlənərək həbs olunmasından bir ay bir həftə keçir.Həbsin siyasi sifariş olması heç kəsdə şübhə yaratmır. Tofiq bəyin ssenariləşdirilmiş bir “insident” əsasında həbsi İlham Əliyevin 19 mart “təbrikinin” bir başa nəticəsidir. Həmin “təbrikdə” Əliyev onun cızdığı dairəyə sığmayan, rejimin yarıtmaz, korrupsioner və kleptokratik mahiyyətini ifşa edən müxalifəti “düşmən”, “vətən xaini”, “5-ci kalon” elan etdi və 27 il Azərbaycan torpaqlarını işğal etmiş Ermənistanla atəşkəs şəraitində yaşadığı halda, ölkə daxilində öz əleyhdarlarına qarşı savaş açdı. Bu savaşın adı “təmizləmə”, yəni Stalin leksikonunda “Çistka” idi.
Amma nədənsə bu na”təmiz” əməliyyatının birinci hədəfi ölkənin ən təmiz adamı Tofiq Yaqublu oldu. Bəs, niyə indi? Global bioloji təhlükədən yararlanmaq cəhdi, fürsətcillik. Covid-19 global təhdidi Əliyev üçün göydəndüşmə idi. İlk dəfə idi ki, dünyada bütün ölkələrin başı öz problemlərinə qarışmışdı. Diplomatik dildə desək Əliyev öz əleyhdarları ilə haqq-hesab çəkmək üçün “əl azadlığı” əldə etmişdi. Bu “haqq-hesab” əməliyyatının birinci qurbanı məhz, Tofiq Yaqublu oldu.
Tofiq Yaqublu üzvü olduğu, uzun illər boyu can qoyduğu “Müsavat” partiyasında bütün təyinatlı və seçkili orqanlardan kənarda saxlansa da, onun gerçək müxalifətçi obrazı örnəyə çevrilir. Avtoritarizm və kleptokratiyaya qarşı ardıcıl mübarizəsi, sosial mediada davamlı və sərrast yazıları, üzvü olduğu partiyanın rəhbərliyindən fərqli olaraq bilavasitə birinci ailənin üzərinə ünvanlı şəkildə getməsi “Müsavat”ın müasir cameəsində onu “ala qarğaya” çevirsə də, İlham Əliyev rejimi üçün ciddi baş ağrısına çevirmişdi.
Mehriban Əliyevanı məmurlara nümunə göstərən, seçkidə Mehriban Əliyevanın komandasının məğlub olmasını dövlətçilik üçün böyük təhlükə sayıb haray qaldıran müsavat “xadimlərindən” fərqli olaraq Tofiq Yaqublu İlham Əliyevi də, Mehriban Əliyevanı də, bu rejimin “xaç atası” Heydər Əliyevi də öz ad-familiyasıyla sərrast şəkildə tənqid edirdi.
“Çistka”nın Tofiq Yaqubludan başlaması nəbz yoxlaması idi. Əliyev gördü ki, can üstünə gətirib çıxardığı ölkənin zəif də olsa nəbzi hələ vurur, beynəlxalq aləmin tonusu şərbət içəcək qədər aşağı düşməyib. Ona görə də, sosial medianın köməyi ilə hakimiyyətin Tofiq Yaqublu ssenarisinin bumeranq effekti ortadadır. Hazırda Əliyevin kleptokratik rejiminin Tofiq Yaqublunun həbsindən aldığı siyasi zərbə, Tofiq bəyin Əliyev repressiyasandan çəkdiyi mənəvi və fiziki işgəncədən öz miqyasına görə daha böyükdür.
Ölkənin dirilik simvoluna çevrilən Tofiq Yaqublu obrazı bir kabus kimi mənəvi cəhtdən “haqqın dərgahına” qovuşub, siyasi dəfnini gözləyən Əliyevlərin feodal-kleptokratik çəmdəyinin başı üzərində pərvazlanmaqdadır. O, savaş adamıdır: döyüş yolu keçmiş bir əsgər, demokratiya uğrunda mücadilə verən bir vətəndaş, zindanlarda dirəniş göstərən bir savaş adamı. Bu günün milli diriliyi və dirənişi Tofiq Yaqublu kimi obrazlaşmış adamların şəxsiyyətindən, ləyaqətindən, mübarizə əzmindən keçir.