ရေစကြိုမြို့နယ် သဲတောရွာကို စစ်​ကောင်စီတပ် မီးရှို့ဖျက်ဆီး၍ နေအိမ် ၃၀နီးပါး မီးလောင်၊ မသန်စွမ်းအဘွားအိုတစ်ဦး မီး​လောင်​သေဆုံး

မကွေးတိုင်း၊ ရေစကြိုမြို့နယ်၊ သဲတောရွာကို စစ်​ကောင်စီတပ်က ဝင်ရောက်ဖျက်ဆီးမီးရှို့ခဲ့ပြီး နေအိမ် ၃၀နီးပါး မီးလောင်ပျက်စီးကာ မသန်စွမ်းအဘွားအို တစ်ဦး မီးလောင်သေဆုံးခဲ့ကြောင်း ဒေသတွင်းသတင်းရင်း မြစ်များက ပြောသည်။

စစ်​​​​ကောင်စီတပ်သည် ယမန်နေ့ (ဇွန်လ ၉ရက်)နံနက် ၆နာရီခန့်က သဲတောရွာကို အင်အား ၂၀၀ခန့်ဖြင့် လက်နက်ကြီး ၊လက်နက်ငယ်များ ပစ်ခတ်ဝင်ရောက်ခဲ့သည်။ ထို့နောက် နံနက် ၁၁နာရီခွဲခန့်တွင် ရွာရှိအိမ်များကို မီးရှို့ဖျက်ဆီးခဲ့ခြင်းဖြစ်ကြောင်း ​ဒေသခံများက ပြောသည်။

မီးလောင်ကျွမ်းနေစဥ် ထွက်မပြေးနိုင်၍ အောက်ပိုင်းမသန်သူ အသက် ၆၇ နှစ်အရွယ် ဒေါ်အေးမှာ မီးလောင်သေဆုံးခဲ့ကြောင်း ဒေသခံတို့က ပြောသည်။

စစ်​ကောင်စီတပ်သည် သဲတောရွာမှ အသက် ၃၈ နှစ်အရွယ် အမျိုးသားတစ်ဦးကိုလည်း ဖမ်းဆီးသွားခဲ့ပြီး ထော်လာဂျီ (၁) စီး၊ ဆိုင်ကယ် အစီး (၃၀)ကျော်နှင့် အခြားအဖိုးတန်ပစ္စည်းများလည်း လုယူသွားကြောင်း Yesagyo Informationက ဖော်ပြသည်။

အလားတူ ယနေ့ (ဇွန်လ ၁၀ ရက်)နံနက်ပိုင်းတွင်လည်း ယမန်နေ့က ဆင်ဖြူရှင်တံတား တိုက်ခိုက်ခံရမှုဖြစ်စဥ်ကြောင့် တံတားအနီး ရေစကြိုမြို့နယ်အတွင်းရှိ သစ်ခေါက်ဆိပ်၊ ပိတ်သင်းကပ် ၊ ဝက္ကတော၊သစ်ကြီးတော စသည့် ကျေးရွာများကို ဝင်ရောက်စီးနင်းကာ မီးရှို့ဖျက်ဆီးမှုများ ပြုလုပ်နေကြောင်း ​ဒေသခံများက ပြော သည်။