ရဲခေါင်/People’s Spring
မြန်မာနိုင်ငံတွင် ငွေကြေးဖောင်းပွမှု သိသိသာသာတိုးလာကြောင်း စစ်ကောင်စီ၏ ဗဟိုဘဏ်က ထုတ်ပြန်သည်။
စက်တင်ဘာ ၁၀ရက်ကထုတ်ပြန်သည့် ၂၀၂၃ ခုနှစ် ဘဏ္ဍာနှစ် ဗဟိုဘဏ်၏စာရင်းရှင်တမ်းအရ ငွေကြေးဖောင်းပွမှုနှုန်းသည် ၂၄ ဒသမ ၃၉ ရာခိုင် နှုန်းရှိပြီး ယခင်ဘဏ္ဍာနှစ်ကထက် ၁၄ ရာခိုင်နှုန်းကျော် မြင့်တက်ခဲ့သည်ဟု ဆိုသည်။
ထို့အပြင် ၂၀၂၁နောက်ပိုင်း ငွေကြေးဖောင်းပွမှုနှုန်းသည် ဂဏန်းနှစ်လုံး 2 Digit သို့ရောက်ရှိလာခဲ့ကြောင်းလည်း ဗဟိုဘဏ်က ဖော်ပြသည်။
Public Service Announcement
ငွေကြေးဖောင်းပွမှုနှုန်းများမြင့်တက်ရခြင်းသည် ကုန်သွယ်မှုလိုငွေပြမှုမှ နိုင်ငံခြားငွေလဲလှယ်မှုနှုန်းမြင့်တက်ခြင်း၊သွင်းကုန်တန်ဖိုးတွက်ချက်ရာတွင် ငွေလဲလှယ်နှုန်းမြင့်တက်၍ ကုန်တန်ဖိုးမြင့်တက်ခြင်းနှင့် လောင်စာဆီစျေးနှုန်းမြင့်တက်ခြင်းကြောင့် ကုန်စည်စျေးနှုန်းမြင့်တင်ခြင်းဟု စစ်ကောင်စီ၏ ဗဟိုဘဏ်က အကြောင်းပြထားသည်။
“ငွေကြေးဖောင်းပွမှုက အခြေခံလူထုနဲ့ တိုက်ရိုက်အချိုးကျတယ်။ငွေကြေးဖောင်းပွလေလေ လူထုက ပိုပြီးကြပ်တည်းလာတော့တာပဲ။မူဝါဒကောင်းတွေ မရှိသ၍ စစ်ကောင်စီ လက်အောက်မှာ ဘယ်ပြည်သူမှအဆင်ပြေလာစရာမရှိဘူး။အခု ဗဟိုဘဏ်အကြောင်းပြတဲ့ ဒေါ်လာလိုအပ်ချက်ဆိုတာကြီးက သူတို့ (စကစ) ရဲ့ ဗဟိုချုပ်ကိုင်တဲ့စနစ်ဖြုတ်လိုက်မှအကုန်အဆင် ပြေလိမ့်မယ်”ဟု စီးပွားရေးလုပ်ငန်းရှင်တစ်ဦးက ပြောသည်။
မြန်မာနိုင်ငံ၏ ပျမ်းမျှငွေကြေး ဖောင်းပွမှုနှုန်းမှာ အာဏာမသိမ်းမီ ၂၀၂၁ ဇန်နဝါရီတွင် ၂ ဒသမ ၆၁ ရာခိုင်နှုန်းသာ ရှိခဲ့သည်။
ငွေကြေးဖောင်းပွမှုနှုန်းနှင့် အလုပ်လက်မဲ့နှုန်းများမြင့်တက်နိုင်မှုကြောင့် မြန်မာနိုင်ငံတွင် ဆင်းရဲနွမ်းပါးသူ ခုနစ်သန်းတိုးလာကြောင်းကမ္ဘာ့ဘဏ်က ယခုနှစ်ဇွန်လက ထုတ်ပြန်ထားသည်။
ပြည်တွင်းငွေကြေးဖောင်းပွမှုနှင့်အတူ စစ်တပ် အာဏာသိမ်းပြီးနောက်ပိုင်း သုံးနှစ်ကျော်အတွင်း ဗဟိုဘဏ်က ငွေစက္ကူ ကျပ်ဘီလီယံ ၃၀,၀၀၀ ထက်မနည်း ရိုက်နှိပ်ဖြန့်ဝေခဲ့ကြောင်းလည်း ပြည်တွင်းစီးပွားရေး လေ့လာစောင့်ကြည့်သူအချို့က သုံးသပ်သည်။
” မြန်မာပြည်မှာက မင်းအောင်လှိုင်လက်ထက်မှာ ဘဏ်တွေကို အယုံကြည်မရှိတော့ ငွေသားတွေလိမ့်ထုတ်ကြတာလေ။ အဲလိုထုတ်တော့ ဗဟိုဘဏ်ကနေ ကြိုက်သလောက်ထုတ်ဆိုပြီး စက္ကူနဲ့လိမ့်ရိုက်ပေးတော့ ဒီလိုစာရွက်သာသာပဲရှိနေတာတဲ့အနေအထားမှာ ပြည်တွင်းစစ်ဖြစ်နေတဲ့ နိုင်ငံမှာ ဘယ်လိုလုပ်ပြီး ကျပ်က တန်ဖိုးကောင်းလာမှာလဲ။ ပိုက်ဆံရှိပြီဆို ငွေဝယ်ရင်ဝယ်၊ ဒေါ်လာဝယ်ရင်ဝယ်၊ မဝယ်ရင် ဘတ်ဝယ်တာပေါ့။ ဒီသမျှ ငွေကြေးတွေ ချက်ချင်းချိန်းပြစ်ကြတာပေါ့လေ။ အဲဒါတွေကြောင့်လည်း ပါတယ်။ အဓိကတော့ တိုင်းပြည်မှာ နိုင်ငံခြားဝင်ငွေ မရှိတာပေါ့”ဟု ငွေကြေးလဲလှယ်သူတစ်ဦးက ပြောသည်။
