ဟန်နွေ/People’s Spring
ကချင်ပြည်နယ် ရွှေကူမြို့နယ် အမတ်ကြီးကုန်းရွာအုပ်စု အတွင်းရှိ ဇွပ်ရာ စစ်ရှောင်စခန်းကို စစ်ကောင်စီက ယနေ့နံနက် အစောပိုင်းတွင် လေကြောင်း ဗုံးကြဲတိုက်ခိုက်ခဲ့၍ အရပ်သား ထိခိုက်မှုရှိခဲ့ကြောင်း သတင်းရင်းမြစ်တစ်ဦးကပြောသည်။
အမတ်ကြီးကုန်ကျေးရွာအုပ်စု၊ ပိန်ေခေါန်ယန်ကျေးရွာ၊ ဇွပ်ရာ စစ်ရှောင်စခန်းနေရာကိုတိုက်ပွဲဖြစ်ပွားခြင်းမရှိဘဲ စက်တင်ဘာ ၁၉ရက် မနက်အစောတွင် လေကြောင်း ဗုံးကြဲတိုက်ခိုက်ခဲ့ခြင်းဖြစ်သည်ဟုသိရသည်။ ထိုစစ်ရှောင်စခန်းသည် ၂၀၁၁ ခုနှစ်ကတည်က တည်ဆောက်ထားခြင်းဖြစ်သည်။
Public Service Announcement
“ဒီမနက်ပိုင်း သုံးနာရီမှာ ပိန်းခေါန်ယန်က စစ်ဘေးရှောင် နေရာပေါ့။ ဇွပ်ရာလို့ ခေါ်တယ်။ ဇွပ်ရာစစ်ဘေးရှောင်ရွာ ဘာမှ တိုက်ပွဲလည်းမရှိဘူး အဲဒီရွာကို ဗုံးကြဲတယ်။ ဗုံးကြဲတော့ အရပ်သားထိတဲ့ဟာတွေဖြစ်နေတယ်။အရပ်သား ကလေးတစ်ယောက်ထိခိုက်ဒဏ်ရာရတာဟုတ်တယ်။ အခု လိုင်ဇာဆေးရုံကိုဆေးကုဖို့အတွက်ဆင်းလာကြပြီ” ဟု သတင်းရင်းမြစ်က ပြောသည်။
ဒဏ်ရာရသောကလေးသည် အသက် ၁၃ နှစ်အရွယ်အမျိုးသားငယ်ဖြစ်သည်။
အဆိုပါ စစ်ရှောင်နေရာ အပြင် စာသင်ကျောင်းလည်း လေကြောင်း တိုက်ခိုက်ခံရသည်ဟု သိရသည်။ အသေးစိတ် အခြေအနေများကို ဆက်လက်စုံစမ်းနေဆဲဖြစ်သည်။
စစ်ကောင်စီတပ်သည် စက်တင်ဘာ ၁၉ ရက်မနက်အစောပိုင်းတွင် ဇွပ်ရာ စစ်ရှောင်စခန်းအပြင် နောင်ချို မြို့ ၊ မင်းတပ်မြို့နယ်တို့ကိုလည်း ဗုံးကြဲခဲ့ကြောင်းကနဦးသတင်းရရှိသည်။
ရွှေကူမြို့နယ်တွင် ယခုရက်ပိုင်းများအတွင်း တိုက်ပွဲဖြစ်ပွားမှု မရှိပေ။သို့သော်လည်း ပြီးခဲ့သည့် ရက်က ဗန်းမော်သို့ စစ်ကူနှင့် ရိက္ခာခဲယမ်းဖြည့်တင်းရန် ရေကြောင်းမှ သွားရောက်ရန် ကြိုးပမ်းနေသည့် စစ်ကောင်စီ ရေယာဉ်များကို ရွှေကူနှင့် ဗန်းမော်ကြားတွင် ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်ခဲ့ရာ သင်္ဘောအချို့ ထိခိုက်ပျက်စီးခဲ့သည်ဟု စစ်ရေးသတင်းရင်းမြစ်တစ်ဦးက ပြောပြသည်။
စစ်ကောင်စီတပ်သည် ၎င်းတို့ စစ်ကြောင်းများ ၊ တပ်စခန်းများ အထိနာတိုင်း အနီးဝန်းကျင်ရှိ အရပ်သား ပြည်သူ နေထိုင်ရာနေရာများကို ပစ်မှတ်ထားပြီး လေကြောင်း၊ လက်နက်ကြီးတိုက်ခိုက်မှုများ လုပ်ဆောင်လေ့ရှိသည်။ ထို့ပြင် ၎င်းတို့ လက်လွတ်ဆုံးရှုံးထားရသည့် မြို့ရွာများကိုလည်း လေကြောင်း တိုက်ခိုက်မှုများ ခပ်စိပ်စိပ်လုပ်ဆောင်လျက်ရှိသည်။
