ဇေအောင်/People’s Spring
စစ်ကိုင်းတိုင်း၊ မုံရွာအကျဥ်းထောင်တွင် ဖမ်းဆီးခံထားရသော CDM ဝန်ထမ်းများကို ထောင်အာဏာပိုင်များကစစကောင်စီလက်အောက်တွင်ပြန်တာဝန်ထမ်းရန်( Non CDMလုပ်ရန်) ဖိအားပေးခြိမ်းခြောက်နေကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က သတင်းထုတ်ပြန်သည်။
စစ်ကိုင်းတိုင်း၊ မုံရွာအကျဉ်းထောင်တွင် CDM လုပ်ထားသည့် နိုင်ငံ ရေးအကျဉ်းသားများကို ထောင်အာဏာပိုင်များက Non CDMလုပ်ရန် ဖိအားပေးနေကြောင်း PPNMက ယနေ့(အောက်တိုဘာ၆ရက်)တွင် အသိပေးသည်။
Public Service Announcement
မုံရွာအကျဥ်းထောင်မှထောင်အာဏာပိုင်များသည် နိုင်ငံရေးအကျဉ်းသားများကို တာဝန်မှူးရုံးခန်းကို ခေါ်ယူ၍ ၎င်းတို့ ကိုယ်တိုင် ရေးသားထားသည့် CDM အမည်စာရင်းမှ ပယ်ဖျက်ခွင့်ပေးရန် အသနားခံစာ၌ CDM နိုင်ငံရေးအကျဉ်းသားများအား လက်မှတ်ထိုးခိုင်းနေကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)၏ ဦးဆောင်ကော်မတီဝင် ကိုသိုက်ထွန်းဦးက ပြောသည်။
“လက်ရှိ အကျဥ်းဦးစီးမှာလည်း ဝန်ထမ်းအင်အားနည်းလာတယ်။ အလားတူပဲစစ်ကောင်စီရဲ့ယန္တရားတွေမှာလည်ပတ်နေတဲ့ ဝန်ထမ်းတွေကလည်း အ
ရမ်းနည်းလာတယ်။ အဲဒီတော့ အသနားခံစာတင်လိုက်ခြင်းအားဖြင့် ဝန်ထမ်းအဖြစ် ပြန်လည်လက်ခံပေးမယ်ပေါ့။ စစ်ကောင်စီရဲ့ယန္တရားတွေမှာ အသုံးပြုနိုင်ဖို့ စတဲ့ရည်ရွယ်ချက်တွေနဲ့ အသနားခံစာတင်ဖို့ ထောင်အာဏာပိုင်ကနေတဆင့် ပြောတာမျိုးလို့ယူဆပါတယ်။”ဟု ကိုသိုက်ထွန်းဦးက ပြောသည်။
လက်မှတ်မထိုးသည့် CDM နိုင်ငံရေးအကျဉ်းသားများကိုလည်း တာဝန်မှူးရုံးခန်းကိုခေါ်၍အသနားခံစာတင်ပြလိုခြင်းမရှိကြောင်း ရေးသားထားသည့်စာတွင် ထောင်မှူး ဦးကျော်ဝင်းက လက်မှတ်ထိုးခိုင်းခဲ့ကြောင်း၊ထို့အပြင်မိသားစုကိုငဲ့ပြီး လက်မှတ်ထိုးပေးရန် CDM နိုင်ငံရေးအကျဥ်းသားများအား ထောင်မှူးက ထပ်မံ ဖိအားပေးခဲ့ကြောင်း PPNM က ထပ်မံအသိပေးသည်။
လက်မှတ်ထိုးခြင်းမထိုးခြင်းကိစ္စနှင့်ပတ်သက်၍ မေးမြန်းရာ “မထိုးတဲ့သူတော့ များတယ်လို့သိရတယ်။ အရေအတွက် ဘယ်လောက်ကို မေးလည်းတော့ မသိရဘူး။သီးခြားခေါ်တာမျိုးဆိုတော့လေ”ဟု PPNM၏ ဦးဆောင်ကော်မတီဝင်ကိုသိုက်ထွန်းဦးက ပြောသည်။
ယခုလက်ရှိတွင် မုံရွာအကျဉ်းထောင်ရှိ ဖမ်းဆီးခံထားရပြီး အသနားခံစာမတင်သည့် CDM ဝန်ထမ်းများကို ထပ်မံတရားစွဲဆိုနေသည့်ဖြစ်စဥ်များရှိမရှိကို ဆက်လက် စောင့်ကြည့်စုံစမ်းနေကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က သတင်းထုတ်ပြန်ထားသည်။
