အင်ကြင်း/People’s Spring
မန္တလေးတိုင်း၊ ငါန်းဇွန်မြို့နယ်ရှိ မင်းနေကုန်းနယ်မြေရဲစခန်းကို PDF ရဲဘော်များက တိုက်ခိုက်ရာ စစ်ကောင်စီတပ်ထိခိုက်မှုရှိကြောင်း ပြည်သူ့ကာကွယ်ရေးတပ်ဖွဲ့များက ပြောသည်။
ယမန်နေ့(အောက်တိုဘာ ၅ ရက်) နေ့လယ် ၂ နာရီ ၄၅ မိနစ်ခန့်မှစ၍ မင်းနေကုန်းရွာရှိ စစ်ကောင်စီတပ်နှင့်ရဲများ တပ်စွဲထားသော ရဲစခန်းကို ၆ဝ မမ လက်နက်ကြီးများ၊ ဒရုန်းများဖြင့် ဗုံးသီးများကြဲချတိုက်ခိုက်ခဲ့ကြောင်း ရွှေဂျိုးဖြူပြည်သူ့ကာကွယ်ရေးတပ်ဖွဲ့တာဝန်ရှိသူက ပြောသည်။
Public Service Announcement
“သေတဲ့စခတွေကို မီးရှို့နေတယ်ပြောတယ်။ ၃ ဦးထိခိုက်ဒဏ်ရာရတယ်။” အထက်ပါတာဝန်ရှိသူက ပြောသည်။
မင်းနေကုန်းရဲစခန်းမှ စစ်ကောင်စီတပ်ဖွဲ့ဝင် များသည် ဇူလိုင်အတွင်းက စခန်းစွန့်ခွာသွားပြီး အဆိုပါ စခန်းအား PDFများက ဝင်ရောက်မီးရှို့ဖျက်ဆီးခဲ့သေးသည်။ ထို့နောက် စခန်းတွင်းပြန်လည်အခြေချလာ၍ ထပ်မံတိုက်ခိုက်ခဲ့ခြင်းဖြစ်ကြောင်း ကာကွယ်ရေးအဖွဲ့များက ပြောသည်။
စစ်ကောင်စီဘက်ကမူ မင်းနေကုန်းရဲစခန်းတိုက်ခိုက်ခံရသည်ကို ဝန်ခံထားပြီး အထိအခိုက်မရှိဟု ၎င်းတို့၏ တယ်လီဂရန်ချန်နယ်များတွင် ဝါဒဖြန့်နေသည်။
အဆိုပါ စစ်ဆင်ရေးကို ရွှေဂျိုးဖြူ-ပြည်သူ့ကာကွယ်ရေးတပ်ဖွဲ့(မြင်းခြံ)၊ မြင်းခြံခရိုင်တပ်ရင်းအမှတ်-၈၊ MGN-Tiger၊ MGN-35၊ နွားထိုးကြီးမြို့နယ်-ပကဖ၊ ဗိုလ်စားပြောက်ကျားတပ်ဖွဲ့၊ ပြည်ချစ်သားပြောက်ကျား တပ်ဖွဲ့၊ ရာဝတီမင်းသားပြောက်ကျားတပ်ဖွဲ့၊ Myingyan Denger Dynamite၊ AungSan’s Blood Civilians Defense Force (ABCDF)၊ မြင်းခြံခရိုင်တပ်ရင်းအမှတ်-၉၊ ရွှေဂျိုးဖြူပြည်သူ့ကာကွယ်ရေးတပ်ဖွဲ့တို့ ပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။
စက်တင်ဘာ ၂၀ရက်က မင်းနေကုန်းနယ်မြေရဲစခန်းအနီးတွင် စစ်ကောင်စီယာဥ်တိုက်ခိုက်ခံရပြီး ယာဉ်ပေါ်ပါ စစ်ကြောရေးမှူးနှင့် ရဲတပ်သား တစ်ဦး သေဆုံးခဲ့ကြောင်း HERO DEFENCE FORCE (မြင်းခြံ)အဖွဲ့က ထုတ်ပြန်ထားသည်။
ယခုနှစ် ဇန်နဝါရီအတွင်းကလည်း မြင်းခြံမြို့နယ်၊ မြင်းခြံ-မြို့သာလမ်းပိုင်းတွင် မင်းနေကုန်းရဲစခန်း ပြန်လာသည့် ဒုရဲအုပ်အပါအဝင် ရဲ ၃ ဦးကို နဂါးနီပြောက်ကျားတပ်ဖွဲ့(မြင်းခြံ)က ပစ်ခတ်တိုက်ခိုက်ခဲ့ရာ သုံးဦးလုံး သေဆုံးခဲ့သည်။
စစ်ကောင်စီတပ်သည် ငါန်းဇွန်မြို့နယ်အတွင်းရှိ ကျေးရွာများအား စက်တင်တတိယပတ်အတွင်း လေကြောင်းတိုက်ခိုက်မှုများဆက်တိုက်ပြုလုပ်ခဲ့ရာ မြေတိုင်းရွာမှ ပြည်သူ ၂ ဦးနှင့် ငါန်းမြာရွာမှ ပြည်သူ ၁၂ ဦး သေဆုံးပြီး စုစုပေါင်း ၁၄ဦး ထိခိုက်ဒဏ်ရာရရှိခဲ့သေးသည်။
သြဂုတ် ၁၀ရက်ကလည်း မြင်းခြံခရိုင်အထူးစစ်ဆင်ရေးစတင်ပြီးနောက်ပိုင်း ငါန်းဇွန် မြို့နယ် ရှိ ငါန်းမြာကြီးရဲစခန်းအပါအဝင် စစ်ကောင်စီတပ်စွဲရာနေရာများ၊ စစ်ကောင်စီယာဥ်များ မကြာခဏတိုက်ခိုက်ခံရပြီး စစ်အုပ်စုထိခိုက်မှုရှိခဲ့သည်။
