၆၉ ကြိမ်မြောက် မယ်စကြဝဠာပြိုင်ပွဲ နောက်ဆုံးဖိုင်နယ်ပွဲစဉ်ကို အမေရိကန်ပြည်ထောင်စု ဖလော်ရီဒါ  ဟောလီးဝုဒ်မှာ  ဒေသစံတော်ချိန် မေလ ၁၆ ရက်ညပိုင်း (မြန်မာအချိန်ယနေ့မနက်)က ကျင်းပရာမှာ မက္ကစီကိုနိုင်ငံကိုယ်စားပြုအလှမယ် အန်ဒရီရာမီဇာက  သရဖူဆု ဆွတ်ခူးရရှိသွားပါတယ်။

နောက်ဆုံးဆန်ကာတင်အလှမယ် ၅ ဦးထဲကနေ  မက္ကစီကိုအလှမယ် အန်ဒရီရာမီဇာက သရဖူဆုရရှိသွားတာဖြစ်ပါတယ်။

1st runner-up ဆုကို ဘရာဇီးအလှမယ် ဂျူလီရာဂါမာ၊  2nd runner-up ဆုကို ပီရူးမယ် ဂျနစ်ခ်မာစီတာ၊  3rd runner-up ဆုကို အိန္ဒိယ အလှမယ် အဒလင်းကတ်စတီလီနိုနဲ့  4th runner-up ဆုကို ဒိုမေနီကန်အလှမယ် ကင်ဘာလီဂျီမီနီတို့ ရရှိသွားပါတယ်။ 

နောက်ဆုံး ဆန်ကာတင် ၁၀ ဦးစာရင်းမှာတော့  ဂျမေကာ၊ ဒိုမေနီကန်သမ္မတနိုင်ငံ၊ အိန္ဒိယ၊ ပီရူး၊ ဩစတြေးလျ၊ ပေါ်တိုရီကို၊ ထိုင်း၊ ကော့်စတာရီကာ၊ မက္ကစီကိုနဲ့ ဘရာဇီးအလှမယ်တို့ ပါဝင်ပါတယ်။   

မြန်မာအလှမယ် သူဇာဝင့်လွင်ကတော့ နောက်ဆုံး ဆန်ကာတင် ၂၁ ယောက် စာရင်းဝင်ခဲ့သလို   National Costume နိုင်ငံကိုယ်စားပြုရိုးရာဝတ်စုံဆုလည်း ရရှိခဲ့ပါတယ်။