၂၀၂၁ ခုနှစ် ဖေဖေါ်ဝါရီ ၁ ရက်နေ့ စစ်တပ် အာဏာသိမ်းချိန်မှာ မနက်မိုးမသောက်ခင် ဖြစ်တာကြောင့် နိုင်ငံရဲ့အနာဂတ်တွေဖြစ်ကြတဲ့ ကလေးငယ်လေးတွေ အိပ်မောကျနေတုန်းပဲ ဖြစ်ပါတယ်။

အာဏာသိမ်းပြီးလို့ သိလိုက်ရတဲ့ပြည်သူတွေဟာ မိမိတို့ဆန္ဒအလျောက် ဟစ်ကြွေးကာ လမ်းတွေပေါ်ဆန္ဒပြထွက်ခဲ့ကြတဲ့အခါ ကလေးတွေဟာလည်း မိဘညီကိုမောင်နှမတွေနဲ့အတူ ဆန္ဒပြထွက်လာခဲ့ပြီး နိုင်ငံရေးထဲကို ပါဝင်လာကြရပါတယ်။

၂၀၂၁ ခုနှစ် ဖေဖေါ်ဝါရီလ ၂၀ ရက်မှာတော့ မန္တလေး သင်္ဘောကျင်းမှာ ဖမ်းဆီးခံရသူတွေ ပြန်လည် လွတ်မြောက်ရေးဆန္ဒပြနေသူတွေကို  စစ်ကောင်စီက အကြမ်းဖက်ပစ်ခတ်ဖြိုခွဲရာဒဏ်ရာရသူတွေကို ကုန်စိမ်းတင်လှည်းနဲ့ လူနာတွေ ခေါက်တုံ့ခေါက်ပြန် သယ်ဆောင်ပြီး လူနာတင်ယာဉ်တွေဆီ ပို့ဆောင်ပေးနေတဲ့ မောင်ဝေယံထွန်း (၁၆နှစ်) ဟာ ဦးခေါင်းကို သေနတ်ကျည်ထိမှန်ကာ သေဆုံးသွားခဲ့ရပါတယ်။

အဲ့အချိန်ကနေစတင်ပြီး နိုင်ငံရေးဟာ အသက်မပြည့်သေးတဲ့ကလေးတွေကိုပင် ဆွဲငင်သတ်ဖြတ်နိုင်တဲ့အရာတစ်ခုဖြစ်လာခဲ့တယ်ဆိုတာကို သိရှိလာကြရပါတယ်။  အဲဒီအချိန်ကစတင်ပြီး နိုင်ငံရေးကြောင့်ဖြစ်ပေါ်လာတဲ့ စစ်ပွဲတွေအပြင် ဒုက္ခမျိုးစုံကို ကလေးတွေအနေနဲ့ ခံစားခဲ့ကြရပါတယ်။

အဆိုးဆုံးအနေနဲ့ကတော့ မြန်မာနိုင်ငံမှာ အာဏာသိမ်းထားမှုဖြစ်စဉ် ၂ နှစ်အတွင်း ကလေးသူငယ် သေဆုံးမှု မှုဦးရေ  ၄၀၀ နီးပါးရှိလာပြီ ဖြစ်ပါတယ်။ 

စီးပွားရေး

မြန်မာနိုင်ငံမှာရှိတဲ့ ကလေးတွေအနေနဲ့ စစ်ဘေးရှောင်ကြရတဲ့ ကလေးတွေရှိကြသလို စစ်ပွဲတွေ မဖြစ်တဲ့မြို့တွေမှာလည်း ကျပ်တည်းလာတဲ့ စီးပွားရေးတွေနဲ့ နိုင်ငံရေးအခြေအနေတွေကြောင့် ကျောင်းနေအရွယ်ကလေးတွေဟာလည်း မိသားစုဝမ်းရေးအတွက် အလုပ်လုပ်ကိုင်နေကြရပါတယ်။ 

ထူးခြားဖြစ်စဉ်အနေနဲ့ မြန်မာနိုင်ငံမှာလူသုံးများတဲ့ အစားသောက်ပို့ဆောင်တဲ့ ကုမ္ပဏီဖြစ်တဲ့  Food panda ဟာ ကိုဗစ်ကာလမှာ လူသုံးအများဆုံး App တစ်ခုဖြစ်လာခဲ့သလို ဝန်ထမ်းအများအပြားကိုလည်းခန့်ထားခဲ့ပါတယ်။ အာဏာသိမ်းပြီးနောက်ပိုင်းမှာယိုယွင်းလာတဲ့ စီးပွားရေးတွေကြောင့် အလုပ်သမားတွေအပေါ် စီမံခန့်ခွဲမှုပြဿနာတွေကြုံနေခဲ့ရပြီး ကလေးအလုပ်သမားတစ်ဦးပါ ထွက်ပေါ်လာခဲ့တာကိုတွေ့ခဲ့ကြရပါတယ်။

ကလေးတွေဟာ မိသားစုအတွက် စားဝတ်နေရေးဝိုင်းဝန်းဖြေရှင်းနေကြတာကို ပိုမိုတွေ့လာရ တဲ့ပြယုဂ်တခု ဖြစ်ပါတယ်။ 

ပညာရေး

ကိုဗစ်နဲ့ နိုင်ငံရေးရိုက်ခက်မှုတွေကြောင့် ကျောင်းနေအရွယ် ကလေးအများအပြားဟာ ကျောင်းစာကို ကောင်းမွန်စွာသင်နေရခြင်းမရှိပါဘူး။ ကိုဗစ်ကြောင့်  တနှစ်ကျော်လောက် ကျောင်းပညာရေးတွေကို နားထားလိုက်ကြရပြီး ၂၀၂၁ ခုနှစ်အရောက်မှာတော့ နိုင်ငံရေးကြောင့် သဘောထားကွဲလွဲတာတွေအပြင် ကလေးတွေရဲ့လုံခြုံမှုအရ စာသင်ကျောင်းကိုပို့ဆောင်ခြင်းတွေကို ဆန့်ကျင်မှုတွေကြောင့် ကလေးငယ်တွေရဲ့ ပညာရေးတွေက အဟန့်အတားဖြစ်ကြတာကို တွေ့မြင်ခဲ့ကြရပါတယ်။

ပဲခူးတိုင်း၊ လက်ပံတန်းမြို့နယ်၊ နတ်ဖန်ကွင်းအုပ်စု၊ ရေတွင်းကုန်းရွာသားတဦးက  “မြို့ပြနေကလေးငယ်တချို့ကတော့ မိဘရဲ့ပံ့ပိုးမှုတွေကြောင့် အွန်လိုင်းပညာရေးစနစ်တွေနဲ့ ဒစ်ပလိုမာကျောင်းတွေကို တက်ရောက်နိုင်ပေမဲ့ ရွာမှာနေတဲ့ကလေးတွေကတော့ “ရွာမှာတစ်လကို မင်္ဂလာပွဲ သုံးလေးပွဲလောက်ရှိတယ် ကြည့်လိုက်ရင် အသက် ၁၅ နှစ် ၁၆ နှစ်  အရွယ်လေးတွေနဲ့ မိန်းမယူ၊ ယောကျ်ားယူသွားကြတာ။ ပြီးခဲ့တဲ့ ကိုဗစ်ကာလတွေတုန်းကတော့ သူတို့က အလယ်တန်းတို့ အထက်တန်းတို့တက်နေကြတာလေ။ ကျောင်းတွေပိတ်တော့ ရွာမှာက မြို့တွေမှာလို့ ဘာမှလုပ်စရာမှမရှိတာ အဲ့တော့ အလုပ်လုပ်ကြရတာပေါ့ အလုပ်လုပ်ပြီး ပိုက်ဆံရှာနိုင်ပြီဆိုရင် အခုလိုပဲမိန်းမယူသွားကြတာ” လို့ ပြောပါတယ်။

အခုချိန်မှာ‌တော့ အစိုးရကျောင်းတွေကို နေရာအနှံ့မှာ စစ်ကောင်စီက ဖွင့်လှစ်ထားပြီဖြစ်သလို အမျိုးသားညီညွတ်ရေးအစိုးရ (NUG) ကလည်း သူတို့ကိုယ်ပိုင် ပညာရေးစနစ်နဲ့ကျောင်းတွေကိုတည်ထောင်ထားပြီး ဖွင့်လှစ်ထားပါတယ်။ 

ဒါပေမဲ့ စစ်ကောင်စီအနေနဲ့  NUG တည်ထောင်ထားတဲ့ကျောင်းတွေကို တရားမဝင် ဘူးလို့ သတ်မှတ်ထားပြီး အဆိုကျောင်းတွေမှာ ကလေးသူငယ်တွေ ပညာသင်နေကြောင်းသိရှိပါက အရေးယူခံရမယ်လို့ သိရပါတယ်။

စစ်ဘေးရှောင်

မြန်မာနိုင်ငံရဲ့တိုက်ပွဲတွေကြောင့် ကလေးသူငယ်တွေ သေဆုံးမှုတွေက နေ့စဉ်နဲ့အမျှ များပြားလာတာတွေ့ရပြီး မိဘမဲ့ဖြစ်သွားတဲ့ ကလေးတွေလည်းရှိကြရပါတယ်။

စစ်ကောင်စီရဲ့ကြောင်းတိုက်ခိုက်မှုတွေကြောင့် ကလေးသူငယ်တွေအစုလိုက် အပြုံလိုက် သေဆုံးကြရတာကြောင့် UNICEF Myanmar က မြန်မာနိုင်ငံရှိ ကလေးသူငယ်တွေရဲ့ အခြေအနေဟာ ဆိုးသထက်ဆိုးလာနေသလို ၂၀၂၃ ခုနှစ်အတွင်း ကလေးသူငယ် ၅ ဒသမ ၆ သန်းဟာလည်း လူသားချင်းစာနာမှုဆိုင်ရာအကူအညီတွေလိုအပ်နေတယ်လို့  RFA  သတင်းဌာနကို ပြောပါတယ်။ 

ကရင်ပြည်နယ်၊ လေးကေ့ကော်မှာ မှာတိုက်ပွဲစဖြစ်တဲ့ ၂၀၂၁ ဒီဇင်ဘာ ၁၅ ရက်မှာ  အဲ့မြို့မှာနေထိုင်တဲ့ ကလေးသူငယ်အများပြား ထိခိုက်ခဲ့ရသလို မြို့နေပြည်သူလူထုတွေကလည်း အိုးအိမ်ပျက်စီးကာ ထွက်ပြေးကြရတာတွေလည်းရှိပါတယ်။  တချို့မှာလည်းထိုင်းဘက်ခြမ်းကို ထွက်ပြေးလာခဲ့ကြတာတွေလည်းရှိပါတယ်။

ထိုင်း-မြန်မာနယ်စပ် မဲဆောက်မှာ Heavenly Home လို့ခေါ်တဲ့ မိဘမဲ့စာသင်ကျောင်းဖွင့်ထားတဲ့ ဆရာတစ်ဦးက “လေးကေ့ကော်မှာ စစ်ဖြစ်တော့ ကျနော်တို့ ကျောင်းလေးက အဲ့မှာတစ်ခုရှိတယ်လေ အဲ့ကလေးတွေကို ကျနော့်မိန်းမက စစ်ပွဲဖြစ်လည်းဖြစ်ရော ဒီဘက်ကနေပြီးသွားပြီးကယ်လာရတယ်။ ကလေးတွေရဲ့စာသင်ကျောင်းဆိုတာကလည်း တစ်စစီပျက်စီးကုန်တာ။” လို့ ပြောပါတယ်။ 

သူ့ရဲပြောပြချက်အရ စစ်ဘေးနဲ့ နိုင်ငံရေးအခြေနေတွေကြောင့် မဲဆောက်မြို့မှာ အစစအရာရာခက်ခဲလာတာကြောင့် သူတို့ရဲ့ မိဘတွေ ကျောင်းမနေနဲ့တောင် ကလေးတွေ ထပ်မံ လက်မခံနိုင်တဲ့နေအထားဖြစ်နေရကြောင်းကို သိရပါတယ်။

Heavenly Home မိဘမဲ့ကျောင်းကတော့ ထိုင်းနိုင်ငံ မဲဆောက်မြို့မှာ ရှိတဲ့ ကလေးအများဆုံး ရှိကျောင်းတစ်ခုထဲကပဲဖြစ်ပြီးတော့ သူတို့လို ကလေးအများအပြားတာဝန်ယူထားရတဲ့ ကျောင်းတွေအနေနနဲ့တောင် စစ်ဘေးနဲ့ နိုင်ငံရေးကြောင့် ဒုက္ခရောက်နေရတဲ့ ကလေးငယ်တွေကို ထပ်မံကူညီဖို့တောင် ခက်ခဲနေတာကိုတွေ့ရှိရပါတယ်။ 

The Visual Rebellion

တရုတ်အစိုးရဟာ ၂၀၂၃  နှစ်ဦးပိုင်းကနေ ဒီနေ့အထိကို မြန့်မာအရေးနဲ့ပတ်သက်လို့ ခပ်စိတ်စိတ်ခြေလှမ်းသွက် လုပ်ဆောင်နေတာတွေကို တွေ့ရပါတယ်။ တရုတ်ဟာ မြန်မာပြည်ရဲ့ တရားမျှတမှု၊ မမျှတမှုတွေ အကျပ်အတည်းတွေ ပြည်သူတွေရဲ့ ဒုက္ခတွေကို လုံးလုံးစိတ်မဝင်စားဘဲ သူတို့ရဲ့ အကျိုးစီးပွားတွေ မထိခိုက်ဖို့နဲ့ အလုံးစုံ လက်ဝေခံနိုင်ငံတစ်ခုအဖြစ် သူ့လက်အောက်မှာ ထားရှိနိုင်ရေးကိုသာ ဦးတည်စဉ်းစားနေတာ ဖြစ်ပါတယ်။

မြန်မာပြည်ဟာ တရုတ်ရဲ့ ပထဝီဝင်နိုင်ငံရေးအရ အိမ်နီးချင်း ခြံစည်းရိုးတစ်ခုဖြစ်သလို ပင်လယ်ထွက်ပေါက်တစ်ခုလည်း ဖြစ်နေပြန်ပါတယ်။ ရခိုင်ကမ်းရိုးတန်းကနေ တနင်္သာရီအထိ ၁၃၈၅ မိုင်ထိ ကျယ်ပြန့်တဲ့ ပင်လယ်ထွက်ပေါက်နဲ့ သဘာဝဓာတ်ငွေ့သိုက်တွေဟာလည်း တရုတ်ရဲ့ မျက်စိကျစရာ ကမ္ဘာ့ပါဝါချိန်ခွင်လျှာမှာ အသာစီးရစေရေးအတွက် ဗျူဟာမြောက် နေရာတစ်ခုဖြစ်နေတာပဲ ဖြစ်ပါတယ်။ ဒီလို သူရဲ့ ကမ္ဘာ့နံပါတ်တစ်ဖြစ်လာဖို့ အိပ်မက်အကောင်အထည်ဖော်ရာမှာ အရေးပါတဲ့မြန်မာပြည်မှာ မတည်မငြိမ်ဖြစ်နေတာမျိုးကို သူမလိုလားသလို အားလုံးတစ်ညီတစ်ညွတ်တည်း စည်းလုံးနေမှာမျိုးကိုလည်း သူမလိုလားပါဘူး။ ဒါကြောင့် ရှုံးနိုင်ခြေများနေတဲ့ စစ်တပ်ကို နိုင်မြင်းအဖြစ် မဟုတ်ရင်တောင် Win-Win အခြေအနေဖြစ်အောင်လုပ်ပြီး မြန်မာပြည်ရဲ့ အာဏာမသိမ်းခင် အခြေအနေကို ပြန်ရောက်အောင်တွန်းပို့နိုင်ဖို့ကို အားထုတ်နေတယ်လို့ ရှုမြင်သုံးသပ်လို့ ရနိုင်ပါတယ်။

မြန်မာစစ်တပ်ဟာ သက်တမ်းတလျှောက် အနောက်နိုင်ငံတွေ ပိတ်ဆို့မှုလမ်းကနေ လွတ်မြောက်ရေးအတွက် နိုင်ငံ့သယံဇာတနဲ့ ထုတ်ကုန်တွေကို အောက်ဈေးနဲ့ ထုတ်ရောင်းလာခဲ့တာ နှစ်ပေါင်း ၆၀ ကျော်ရှိနေပါပြီ။ တရုတ်ပြည်မကြီးရဲ့ တရားဝင် အစိုးရချင်း ဖက်စပ်စီမံကိန်းတွေကနေ တရုတ်ရဲ့တရားမဝင်လုပ်ငန်းတွေအထိ မြန်မာပြည်နယ်စပ်တလျှောက်မှာ ကျယ်ပြန့်စွာတည်ဆောက်လုပ်ကိုင်နေတာဟာ ညံ့ဖျင်းပြီးကိုယ်ကျိုးရှာတဲ့ စစ်အုပ်စုဆီကရတဲ့ တရုတ်ရဲ့ကြီးမားတဲ့ အကျိုးအမြတ်တွေပါပဲ။ တရုတ်ဟာ ဒီလိုကြီးမားတဲ့ အကျိုးစီးပွားတွေကို လက်လွှတ်ဆုံးရှုံးလိုစိတ် မရှိတာမို့ မြန်မာ့နိုင်ငံရေးကနေ ကိုယ်ကျိုးရှာစစ်အုပ်စုကို အပြီးတိုင်ခြေမှုန်းခံလိုက်ရမှာကို မလိုလားဆုံးအုပ်စုရဲ့ ထိပ်ဆုံးမှာ ဖြစ်နေတာဖြစ်ပါတယ်။ ဒါကြောင့်လဲ စစ်အုပ်စုရဲ့ လူမျိုးသုဉ်းသတ်ဖြတ်မှုတွေကို ကုလသမဂ္ဂ ခုံရုံးမှာ ဗီတိုအာဏာနဲ့ ကာကွယ်နေသလို တဖက်မှာလည်း စစ်အုပ်စုအသာရရေးအတွက် လိုအပ်တဲ့ နည်းပညာကအစ နည်းလမ်းပေါင်းစုံနဲ့ အကူအညီပေးနေတာကို တွေ့မြင်နေရတာပါ။ ဒါပေမဲ့လည်း အရှင်မွေးလို့ နေ့ချင်းမကြီးနိုင်လောက်အောင် မင်းအောင်လှိုင်နဲ့ ချစားစစ်တပ်ဟာ လက်တွေ့စစ်မြေပြင်မှာ အကျအဆုံးများပြီး ဘေးကျပ်နံကျပ်ဖြစ်နေတဲ့ အခြေအနေကို ရောက်နေပါတယ်။ ဒါဟာ တရုတ်အစိုးရအတွက် ကြီးမားတဲ့ စိတ်ပျက်စရာရလဒ်ဖြစ်ပြီး မှန်းချက်နဲ့နှမ်းထွက်မကိုက်တာမို့ တရုတ်အစိုးရဟာ မင်းအောင်လှိုင်မဟုတ်သော စစ်အုပ်စုထဲကခေါင်းဆောင်သစ်ကို ပွဲထုတ်ဖို့ ကြံစည်လာမလားလို့ ယူဆနိုင်စရာရှိလာပါတယ်။

ဒီယူဆချက်ကိုသက်သေပြနေတဲ့ အချက်ကတော့ မေလ ၂ ရက်နေ့မှာ တရုတ်နိုင်ငံခြားရေးဝန်ကြီး ချင်ကန်းရဲ့ စစ်အုပ်စုခေါင်းဆောင်ဟောင်း သန်းရွှေနဲ့ သွားရောက်တွေ့ဆုံခြင်းပဲ ဖြစ်ပါတယ်။ လက်ရှိ အာဏာလက်ဝယ်ထားသူသာ အာဏာအပြည့်အဝ ရှိတာဖြစ်ပေမဲ့ မင်းအောင်လှိုင်ရဲ့ သက်လုံမကောင်းတဲ့ စစ်တပ်နဲ့ နိုင်ငံရေးပါးမဝမှုတို့ကြောင့် စစ်တပ်အတွင်းမှာ ပါဝါ လွန်ဆွဲပွဲတွေဖြစ်နေပြီ ဆိုတာကို တရုတ်အစိုးရက ကောင်းကောင်း သိထားပြီးဖြစ်မှာပါ။ ဒီတော့ အကြမ်းဖက်စစ်တပ်ရဲ့ ပါဝါလွန်ဆွဲမှု အခြေအနေကိုကြည့်ရင် စကစ ဥက္ကဋ္ဌ ဖြစ်နေတဲ့ မင်းအောင်လှိုင်နဲ့ ဒုဥက္ကဋ္ဌ ဖြစ်နေတဲ့ စိုးဝင်းတို့ဟာ အကြီးမားဆုံး ပါဝါယှဉ်ပြိုင်ဖက်တွေဖြစ်ပြီး စစ်အုပ်စုရဲ့ခေါင်းဆောင်ဟောင်းတွေနဲ့ ကြံ့ခိုင်ရေးပါတီဥက္ကဋ္ဌ ခင်ရီတို့ဟာ တတိယအုပ်စုအဖြစ် ရှိနေတာကို တွေ့ရမှာဖြစ်ပါတယ်။

မင်းအောင်လှိုင်ရဲ့ တကိုယ်ရေ အာဏာရူးမှု နောက်ဆက်တွဲ ဖြစ်စဉ်တွေကို သူကိုယ်တိုင် မထိန်းချုပ်နိုင်ခြင်းဟာ တတိယအုပ်စုဖြစ်တဲ့ စစ်ခေါင်းဆောင်ဟောင်းတွေအပေါ် စိတ်အပျက်ကြီး ပျက်စေပါတယ်။ အရှုံးနဲ့သာ နိဂုံးချုပ်ရင် စစ်ခေါင်းဆောင်ဟောင်းတွေဟာလည်း စစ်ခုံရုံးနဲ့ ရင်ဆိုင်ရမယ်ဆိုတာမလွဲမသွေ သိထားတာပါ။ ဒီလိုရင်တမမဖြစ်နေရတဲ့ ဖက်ဆစ်တပ်ရဲ့ အခြေအနေကို သိတဲ့ တရုတ်အစိုးရဟာ မဟာဗျူဟာကျကျပဲ စစ်အုပ်စုခေါင်းဆောင်ဟောင်း သန်းရွှေကို သွားရောက်တွေ့ဆုံပါတော့တယ်။ ဒါဟာ မင်းအောင်လှိုင်အပေါ် အပြည့်အဝယုံကြည်မှုမပေးနိုင်ဘူး၊ စစ်အုပ်စုဆက်ရှင်သန် ရပ်တည်နိုင်ရေးအတွက် အဖြေသစ်တစ်ခု ရှာရတော့မယ် ဆိုတဲ့အချက်ကို မီးစိမ်းပြထောက်ခံလိုက်တာမျိုးပဲ ဖြစ်ပါတယ်။

ဒါဆိုရင် တစ်ခုတည်းသောအဖြေက မင်းအောင်လှိုင်မဟုတ်သော စစ်ခေါင်းဆောင်တစ်ယောက်ကို ရွေးချယ်ဖို့နဲ့ မင်းအောင်လှိုင်ကို ထိုးကျွေးပြီး တော်လှန်ရေးအင်အားစုတွေနဲ့ ညှိနှိုင်းဆွေးနွေးနိုင်ဖို့ကို ဦးတည်နေတာကို သိသာထင်ရှားစွာ မြင်လာရပါတယ်။ ဒါပေမဲ့ မင်းအောင်လှိုင်ဟာ အရူးပါး ဖြစ်နေတာဖြစ်တာကြောင့် ဒီလိုအခြေအနေကို မရိပ်စားမိစရာ မရှိပါဘူး။ အထူးသဖြင့် စစ်ထောက်လှမ်းရေး (စရဖ) ဟာ မင်းအောင်လှိုင်ရဲ့ အာဏာစက်အောက်မှာရှိနေတဲ့ အခြေအနေမျိုးမှာ စစ်အုပ်စုဟောင်းတွေရဲ့ ရွေ့လျားမှုတွေကိုလည်း ထောက်လှမ်းနေမှာ အသေအချာပါပဲ။ ဒါကြောင့်ပဲ မေ ၅ ရက်နေ့မှာ တပ်မ ၉၉ ရဲ့ ဗိုလ်မှူးကြီးအဆင့်ရှိ တပ်နယ်မှူးနဲ့အဖွဲ့ကို ဖမ်းဆီးလိုက်တာလို့ ယူဆစရာရှိပါတယ်။ အခုလို တပ်ပြေးနဲ့ CDM လုပ်သူ များပြားလာတာကြောင့် တပ်တွင်းစည်းရုံးရေးနဲ့ တော်လှန်ရေးအင်အားစုတွေကြား CDM တွေအပေါ် ယုံကြည်မှုလျော့နည်းလာစေဖို့ တပ်ဝါဒဖြန့် Channel တွေကနေ ကျယ်ကျယ်ပြန့်ပြန့် ဝါဒဖြန့်နေတဲ့အချိန်မျိုးမှာ အခုလို ဖမ်းဆီးအရေးယူတာမျိုးဟာ အံ့အားသင့်စရာကောင်းတဲ့ ကိစ္စဖြစ်ပါတယ်။ ဒါဟာ စိုးဝင်းကို တိုက်ရိုက်ဖယ်ရှားတာထက် ပိုအမြင်လှပြီး တပ်တွင်းမှာ စိုးဝင်းရဲ့ အရာရောက်မှုနဲ့ ထောက်ခံနေမှုကို ဒီထက်ပိုမကျယ်ပြန့်ဖို့ မင်းအောင်လှိုင်ရဲ့ ရိုးရှင်းတဲ့လုပ်ဆောင်မှုအဖြစ် ကောက်ချက်ချနိုင်ပါတယ်။ ပြီးတော့ ဖမ်းဆီးတဲ့ ဖြစ်စဉ်ဟာလည်း တရုတ်နိုင်ငံခြားရေးဝန်ကြီး ပြန်သွားပြီး နောက်ရက်မှာ ဖြစ်ခဲ့တာ ဖြစ်ပါတယ်။

မင်းအောင်လှိုင်ဟာ လက်ရှိ ဖက်ဆစ်တပ်ရဲ့ စစ်ဦးစီးဖြစ်နေတာမို့ သူ့နေရာကို အစားထိုးမယ့် ဘယ်သူ့ကိုမှ လက်သင့်ခံနိုင်မှာ မဟုတ်ပါဘူး။ ဒါ့အပြင် မင်းအောင်လှိုင်ဟာ စိုးဝင်းအပေါ် ကြီးမားတဲ့သံသယ ရှိနေတာ အခုမှမဟုတ်ဘူးဆိုတာလည်း သိသာထင်ရှား ပါတယ်။ ရန်ကုန်မြို့ပြပြောက်ကျားတပ်ဖွဲ့ တစ်ဖွဲ့ဖြစ်တဲ့ Innya Urban Force အဖွဲ့က ရှင်းလင်းခဲ့တဲ့ စိုးဝင်းရဲ့ဆရာ အကြံပေးဖြစ်တဲ့ အငြိမ်းစားဗိုလ်ချုပ်အုန်းသွင် ရှင်းလင်းခံရခြင်း ဖြစ်စဉ်ဟာလည်း အင်မတန်သံသယဖြစ်စရာကောင်းနေပါသေးတယ်။ မြို့ပြပြောက်ကျားတွေရဲ့လှုပ်ရှားမှုအများစုကို စစ်ကောင်စီရဲ့ ထောက်လှမ်းရေးတွေက မပြတ်လိုက်လံထောက်လှမ်းနေတဲ့ကြားက အခုလိုကြီးမားတဲ့ပစ်မှတ်တွေကို ရှင်းလင်းနိုင်တာဟာ အတွင်းလူတွေ မပါဝင်ဘဲ မဖြစ်နိုင်ပါဘူး။ မင်းအောင်လှိုင်ကိုယ်တိုင်လည်း ၂၀၂၂ ခုနှစ်အတွင်းမှာ မတော်တဆမှုဖြစ်စဉ်တွေကို ကြုံတွေ့ခဲ့ရပြီး ဒါတွေဟာလည်း တိုက်ဆိုင်မှုတစ်ခု မဟုတ်ဘူးဆိုတာ သာမန်လူတောင် တွေးနိုင်တဲ့ကိစ္စရပ်တွေပဲ ဖြစ်ပါတယ်။

အကြမ်းဖက်စစ်အုပ်စုအနေနဲ့ မင်းအောင်လှိုင်လို ဘာတိုက်ပွဲအတွေ့အကြုံမှမရှိ၊ နိုင်ငံရေးအကြောင်းလည်း နကန်းတစ်လုံးမျှ မသိတဲ့သူထက်စာရင် စစ်ရေးအတွေ့အကြုံရော အရည်အချင်းပါရှိတဲ့ စိုးဝင်းကို ခေါင်းဆောင်တင်မြှောက်နိုင်ခြင်းက ယခုလို အဖက်ဖက်က နိမ့်ကျနေတဲ့အခြေအနေကနေ ကျော်လွန်နိုင်မယ့် အဖြေတစ်ခုအဖြစ် ယူဆဖွယ်ရှိပါတယ်။ ဒါပေမဲ့လည်း မင်းအောင်လှိုင်ကတော့ သေစရာရှိ သူတစ်ယောက်တည်း အသေခံမှာမဟုတ်ဘဲ စစ်အုပ်စုတစ်ခုလုံးကိုပါ ဆွဲခေါ်သွားဖို့ စီမံထားပုံပါပဲ။ ဒီတော့ ဒီလို စစ်အုပ်စုရဲ့ ထိပ်သီးနေရာက နံပါတ်တစ်နဲ့ နံပါတ်နှစ်တို့ရဲ့ အားပြိုင်မှုမှာ ဘယ်သူအနိုင်ရမလဲ။ တရုတ်အစိုးရကရော စစ်အုပ်စုခေါင်းဆောင်ဟောင်းတွေနဲ့ ဘယ်လိုသဘောတူညီချက်တွေ ရယူထားလဲ။ မင်းအောင်လှိုင်ဘက်ကရော တရုတ်နဲ့ စစ်ခေါင်းဆောင်ဟောင်းတွေကို ဆန့်ကျင့်ပြီး စိုးဝင်းကို အရင်လက်ဦးမှု ရယူနိုင်ပါ့မလား ဆိုတာကတော့.....။

GSCB

နိုင်ငံရဲ့လွတ်လပ်ရေးကို ပြည်သူနဲ့လက်တွဲတိုက်ယူဖို့ ဗိုလ်ချုပ်‌အောင်ဆန်း ဦးဆောင်ပြီး ရဲဘော်သုံးကျိပ်တို့ ထိုင်းနိုင်ငံ ဘန်ကောက်မြို့မှာ ၁၉၄၁ ခုနှစ်၊ ဒီဇင်ဘာ ၂၆ ရက်နေ့မှာ ဖွဲ့စည်းခဲ့ရာက ပေါ်ထွန်းလာခဲ့တဲ့ မြန်မာ့တပ်မတော်ဟာ မသူတော် စစ်မိစ္ဆာတလက်အောက် ကျရောက်ပြီးတဲ့နောက် အခုဆို ပြည်သူလူထုက ခါးခါးသီးသီး မုန်းတီးရွံရှာခြင်းခံရတဲ့ မူးယစ်ဆေးဝါးရဲ့ သခင်တပိုင်း ကျွန်ရိုင်းလည်းဖြစ်တဲ့ စစ်ရာဇဝတ်ဂိုဏ်းအဖြစ် ကျက်သရေမဲ့စွာ အဆင့်လျော့ကျခဲ့ပြီ ဖြစ်ပါတယ်။

ကမ္ဘာပေါ်မှာ မိမိတပ်သားတွေကို သိက္ခာမဲ့စွာ မူးယစ်ဆေးဝါးကို သုံးစွဲစေပြီး စစ်တိုက်ခိုင်းတဲ့ စစ်တပ်ဆိုတာ မြန်မာစစ်မိစ္ဆာတပ်ဖွဲတဖွဲ့ပဲ ရှိမယ်ထင်ပါတယ်။ ဒီလိုရေးရတာ အကြောင်းမဲ့ မဟုတ်ပါဘူး။ မန္တလေးပြည်သူ့ကာကွယ်ရေးတပ်မတော်က သိမ်းပိုက်ထားခဲ့တဲ့ စစ်အာဏာလုကောင်စီ စခန်းကုန်းတခုကို ပြန်သိမ်းဖို့ကြိုးစားခဲ့ကြတဲ့ ရှမ်းပြည်နယ်မြောက်ပိုင်း နောင်ချို-ပြင်ဦးလွင် တိုက်ပွဲတွေမှာ စစ်ဓားပြဆေးစွဲတပ်ဟာ ဗျူဟာကျကျ စစ်ဆင်ရေးတွေနဲ့ လာတိုက်တာမဟုတ်ဘဲ လူလှိုင်းစစ်ဆင်ရေးနဲ့ လာတိုက်ခိုက်ပြီး PDF တွေဘက်က ပစ်လို့မနိုင်တော့တဲ့အထိ ဖြစ်လာကာ ပြန်ဆုတ်ပေးရတယ်လို့ MDY PDF က ရဲဘော်ကိုဇော်ကြီးက မဲခေါင်သတင်းကို ပြောပြခဲ့တဲ့ သတင်းကို ပြီးခဲ့တဲ့ ဧပြီလ ၃၀ ရက်နေ့က ဖတ်လိုက်ရပါတယ်။

ဒီလို စစ်ရေးဗျူဟာမရှိဘဲ လူအင်အားကိုသုံးကာ ဇွတ်တက်လာတာဟာ လူသာမန်တယောက်အဖို့ မဖြစ်နိုင်ဘဲ စိတ်ကြွမူးယစ်ဆေးဝါးသုံးမှပဲ လူစိတ်ပျောက်လို့ စစ်သွေးကြွပြီး တက်လာရဲမှာလို့ ကိုဇော်ကြီးက သူ့ရဲ့အမြင်ကို ပြောပြခဲ့ပါတယ်။ တကယ်တော့ စစ်အာဏာရှင်တွေဟာ စစ်သားတွေကို စစ်တိုက်ဖို့သာ မူးယစ်ဆေးဝါးတွေကို သုံးစွဲစေတာမဟုတ်ဘဲ လူထုအရေးတော်ပုံကြီးတွေကို သတ်ဖြတ်ဖြိုခွင်းကြတဲ့ အဓိကရုဏ်းနှိမ်နင်းရေးတပ်တွေကို ဆန္ဒပြ လက်နက်မဲ့ပြည်သူတွေ ပစ်ခတ်သတ်ဖြတ်ရဲအောင် မူးယစ်‌ဆေးဝါးတွေ တိုက်ကျွေး အမိန့်ပေးခဲ့ကြပါတယ်။

၁၉၈၈ ခုနှစ်မှာ ဖြစ်ပွားခဲ့တဲ့ ရှစ်လေးလုံး လူထုအရေးတော်ပုံကြီးကို ဖြိုခွင်းဖို့ စစ်ထောက်လှမ်းရေး မိစ္ဆာခင်ညွန့်တို့အဖွဲ့ဟာ တန်ပြန်သပိတ်အတွက် အများသောက်သုံးရေ အဆိပ်ခပ် ခိုင်းစေခံရသူတွေကို လူစိတ်ပျောက်ပြီး ရိုက်လည်းမနာမကျင် အသတ်ခံရမှာလည်း မကြောက်တဲ့ အဆင့်ထိရောက်စေတဲ့ မူးယစ်ဆေးဝါး‌တွေ တိုက်ကျွေးစေလွှတ် ယုတ်မာခဲ့ကြပါတယ်။

မူးယစ်ဆေးဝါးဆိုတာ မှန်ကန်စွာ အသုံးမချဘူးဆိုရင် လူတဦးအတွက်ဖြစ်ဖြစ်၊ နိုင်ငံတနိုင်ငံအတွက်ဖြစ်ဖြစ် အလွန်အန္တရာယ်ကြီးမားလှပါတယ်။ မူးယစ်ဆေးဝါးကို လွဲမှားစွာ သုံးစွဲကြတာကြောင့် အဖိုးတန်တဲ့ လူ့အသက်နဲ့ ဘဝတွေ မြောက်မြားစွာ ဆုံးရှုံးခဲ့ရသလို တိုင်းနိုင်ငံတွေ ဆင်းရဲဒုက္ခအဖုံဖုံ ရောက်ခဲ့ကြရပါတယ်။

ကမ္ဘာ့သမိုင်းကို ပြန်လည်စောင်းငဲ့ကြည့်လိုက်မယ်ဆိုရင် ၁၉ ရာစုမှာ ဖြစ်ပွားခဲ့တဲ့ ပထမ ဘိန်းစစ်ပွဲ (၁၈၄၀-၁၈၄၂) နဲ့ ဒုတိယဘိန်းစစ်ပွဲ (၁၈၅၆-၁၈၆၀) ဟာ ဗြိတိသျှကုန်သည်တွေ တရုတ်ပြည်ကို ဘိန်း‌တွေ အတားအဆီးမရှိ ရောင်းချနိုင်ရေးအတွက် ဗြိတိသျှတွေဟာ မူးယစ်ဆေးဝါးကို သူတို့ကိုယ်ကျိုးစီးပွားအတွက် လွဲမှားယုတ်ညံ့စွာ အသုံးချ အမြတ်ထုတ်ဖို့ ကြိုးစားခဲ့တဲ့ ကျူးကျော်စစ်ဖြစ်ပါတယ်။

အဲ့ဒီစစ်ပွဲမှာ ခေတ်‌နောက်ကျကျန်ရစ်တဲ့ တရုတ်တွေ စစ်ရှုံးခဲ့ရပြီး စက်မှုတော်လှန်ရေးကြောင့် တခေတ်စော တိုးတက်ပြီးသား ဗြိတိသျှတို့ စစ်နိုင်တာကြောင့် ဟောင်ကောင်ကျွန်းကို သိမ်းပိုက်ခွင့် ရသွားခဲ့ပါတယ်။ အဲ့ဒါအပြင် တရုတ်ပြည်သူတွေ ဘိန်းစွဲခဲ့ရပြီး စာရိတ္တပျက်ပြားမှု၊ ကျန်းမာရေးချို့ယွင်းမှုတွေ ခါးစည်းခံရရုံသာမက ကုန်ထုတ်စွမ်းအားတွေ ကျပြီး စီးပွားရေး အကြီးအကျယ် ထိခိုက်ပျက်စီးသွားခဲ့ရတာမို့ တရုတ်တွေကို “အရှေ့အာရှက လူမမာတွေ” လို့ ပြောစမှတ်ပြုခံံခဲ့ရလောက်အောင် ဘိန်းရဲ့ဒဏ်ကို ခံခဲ့ကြရပါတယ်။

ကဲ အခု မြန်မာနိုင်ငံမှာ ဘိန်းနဲ့ မူးယစ်‌ဆေးဝါး စိုက်ပျိုးထုတ်လုပ်မှု ဘယ်လိုကြီးထွားလာသလဲ ဆိုတာ ကြည့်ကြရအောင်။ မြန်မာနိုင်ငံဘက်မှာ ဘိန်းစိုက်ပျိုးထုတ်လုပ်မှု တဟုန်ထိုး မြင့်တက်လာစေတဲ့ အဓိကအကြောင်းတရားကတော့ ရှမ်းပြည်နယ်မြောက်ပိုင်းက ကိုးကန့်ဒေသ အပါအဝင် မြန်မာနိုင်ငံအရှေ့ပိုင်းနဲ့ မြောက်ပိုင်းဒေသတွေကို ၁၉၄၉ ခုနှစ်က တရုတ်ပြည်တွင်းစစ်ပွဲမှာ မော်စီတုံးရဲ့ ကွန်မြူနစ်တပ်တွေကို စစ်ရှုံးလာတဲ့ တရုတ်အမျိုးသားရေးဝါဒီ ကူမင်တန်တပ်တွေ ယူနန်ပြည်နယ်ဘက်ကနေ ဝင်ရောက်လာခဲ့ရာက စတင်ခဲ့တာပဲ ဖြစ်ပါတယ်။

မြန်မာတွေက တရုတ်ဖြူလို့ခေါ်ကြတဲ့ ကူမင်တန်တရုတ်တွေဟာ ကွန်မြူနစ် တရုတ်နီတပ်တွေနဲ့ ယှဉ်ပြိုင်ရာမှာ လက်နက်အင်အား တောင့်တင်းဖို့နဲ့ တော်လှန်ရေး အောင်ဖို့အတွက် တခုတည်းသောနည်းလမ်းအဖြစ် ဘိန်းစိုက်ပျိုးထုတ်လုပ်မှုကို အဓိက စီမံကိန်းချ လုပ်ဆောင်လာခဲ့ကြပါတယ်။ တရုတ်ဖြူ ကူမင်တန်တပ်တွေဟာ လျှို့ဝှက်အခြေစိုက် စစ်စခန်းတွေကို မြန်မာပြည်မြောက်ပိုင်းနဲ့ အရှေ့ပိုင်းဒေသ အပါအဝင် မြန်မာ-ထိုင်း-လာအို ၃ နိုင်ငံထိစပ်ရာ ရွှေတြိဂံဒေသ အနှံ့အပြားမှာ အခြေစိုက် ထူထောင်ခဲ့ကြပါတယ်။

ဒါကြောင့် ၁၉၅၀ ပြည့်လွန်နှစ်တွေမှာ ကူမင်တန်တွေရဲ့လက်အောက်က ရွှေတြိဂံဒေသဟာ ဘိန်းစိုက်ပျိုးထုတ်လုပ်မှုမှာ အရင်ကထက် ၁၀ ဆကနေ အဆ ၂၀ လောက်အထိ မြင့်တက်လာခဲ့ပါတယ်။ တနှစ်ကို ဘိန်း တန် ၃၀၀ ထုတ်လုပ်ရာကနေ တန် ၆၀၀ အထိ တိုးမြှင့်ထုတ်လုပ်လာခဲ့တယ်လို့ ဆိုပါတယ်။ ဒါပေမဲ့ မော်စီတုံးတို့ရဲ့ ကွန်မြူနစ်တပ်တွေကို လက်ယာအမျိုးသားရေးဝါဒီ ကူမင်တန်တွေ စစ်ရှုံးလို့ ၁၉၄၉ ခုနှစ်ကတည်းက ရွှေ့ထားတဲ့ ထိုင်ဝမ်ကျွန်းကို အပြီးဆုတ်ခွာသွားပေမဲ့လည်း အဲ့ဒီဒေသတွေဟာ ဘိန်းစိုက်ပျိုးထုတ်လုပ် ဖြန့်ဖြူးရာ ထိပ်တန်းဒေသတွေ ဖြစ်လာခဲ့တယ်။

၁၉၅၀ နှစ်များအတွင်းက ကိုးကန့်ဒေသကို အုပ်ချုပ်နေသူမှာ ကူမင်တန်အဖွဲ့ရဲ့ ကျောထောက်နောက်ခံရှိတဲ့ အောလစ်ဗ်ယန်းဆိုတဲ့ စစ်ဘုရင်မ ဖြစ်ပါတယ်။ ထိုင်းနိုင်ငံဘက် ဘိန်းတွေတင်ပို့နေရာက ၁၉၆၁ ခုနှစ်တွင် အောလစ်ဗ်ယန်း အဖမ်းခံခဲ့ရပြီးတော့ သူမအစ်ကိုဖြစ်သူ ဂျင်မီယန်း ဆက်ခံပြီး ဘိန်းလုပ်ငန်း ဆက်လုပ်ခဲ့ပါတယ်။ ဂျင်မီယန်းကို သူရဲ့လက်အောက်ခံ တပ်မှူးတဦးဖြစ်တဲ့ လော်စစ်ဟန်က ဖြုတ်ချခဲ့ပါတယ်။ လော်စစ်ဟန်ဆိုတာ Asia World ကုမ္ပဏီရဲ့ မန်နေးဂျင်းဒါရိုက်တာ စတီဗင်လော (ခေါ်) ဦးထွန်းမြင့်နိုင်ရဲ့ဖခင် ဖြစ်ပါတယ်။

၁၉၆၂ ခုနှစ်မှာ အရပ်သားအစိုးရထံက အာဏာလုယူခဲ့တဲ့ စစ်ဓားပြနေဝင်းဟာ လော်စစ်ဟန်ကို ဘိန်းစိုက်ခွင့်ပေး စည်းရုံးခဲ့ရာက မြန်မာနိုင်ငံမှာ ဘိန်းလုပ်ငန်း ကြီးကျယ်လာခဲ့ပြီး ဘိန်းဘုရင် လော်စစ်ဟန် ဖြစ်လာခဲ့ပါတယ်။ စစ်ဓားပြနေဝင်းရဲ့ အာဏာလု စစ်အစိုးရဟာ ‌ဗမာပြည်ကွန်မြူနစ်ပါတီ၊ ရှမ်းနဲ့ တခြားလက်နက်ကိုင်တွေကို တိုက်ဖို့ ရှမ်းပြည်နယ်ထဲက သူတို့ထိန်းချုပ်ထားတဲ့ နယ်မြေအားလုံးက လမ်းတွေမှာ နေဝင်းဦးဆောင်တဲ့ မြန်မာစစ်တပ်က ငွေရှာဖို့အတွက်နဲ့ ဒေသခံလက်နက်ကိုင်တွေကို ဖြိုခွင်းဖို့ ဘိန်းကုန်စည်ကူးသန်းမှုတွေ တရားဝင်လုပ်ကိုင်ခွင့်ပြုခဲ့ပါတယ်။

ရှမ်းပြည်နယ်မှာ အခြေစိုက်တဲ့ စစ်ဓားပြတပ်တွေဟာ ကိုယ့်တပ်တွေအတွက် ကိုယ် ငွေရှာနိုင်အောင် ရည်ရွယ်ပြီး ဘိန်းကုန်ကူးမှုကို တရားဝင်လုပ်ခွင့်ပေးခဲ့တာ ဖြစ်ပါတယ်။ အဲဒီမှာ မြန်မာဘိန်းတပ်မ‌တော်က စစ်ဗိုလ်ယုတ်ကြီးတွေ ဘိန်းနဲ့ ချမ်းသာကုန်ကြပါတယ်။ ရွှေတြိဂံဒေသမှာ နာမည်ဆိုးနဲ့ ကျော်ကြားခဲ့တဲ့ ဘိန်းဘုရင်တွေဖြစ်တဲ့ လော်စစ်ဟန်နဲ့ ခွန်ဆာတို့ ထွက်ပေါ်လာခဲ့တာ ဖြစ်ပါတယ်။

နေဝင်းရဲ့ စစ်ဓားပြတပ်နဲ့ မဟာမိတ်လုပ်ပြီး လော်စစ်ဟန်က ကိုးကန့်ဒေသကို အခြေပြုပြီး ခွန်ဆာက လွိုင်မော်ဒေသ ဗဟိုပြုလို့ ဘိန်းခင်းတွေ တိုးချဲ့၊ ဘိန်းလုပ်ငန်းတွေနဲ့ ချမ်းသာကြီးပွားခဲ့ကြတာ ဖြစ်ပါတယ်။ လော်စစ်ဟန်ကို ထိုင်းစစ်တပ်က မြန်မာနိုင်ငံအတွင်း ဝင်ဖမ်းခဲ့ပြီး မြန်မာနိုင်ငံသားဖြစ်တာမို့ မြန်မာနိုင်ငံကို ပြန်အပ်ခဲ့တာမို့ စစ်ဓားပြဗိုလ်နေဝင်း အရှက်ကွဲခဲ့ရပါသေးတယ်။ မတတ်သာတော့ဘဲ ၁၉၇၃ ခုနှစ်မှာ တသက်တကျွန်း ဟန်ပြထောင်ဒဏ် အပြစ်ပေးခဲ့ပြီး ၁၉၈၀ ခုနှစ်မှာ အထွေထွေလွတ်ငြိမ်းချမ်းသာခွင့် ဖန်တီးလို့ ပြန်လွှတ်ပေးခဲ့ပါတယ်။

အဲ့ဒီနောက် ၁၉၈၈ ခုနှစ်မှာ အာဏာထပ်လုခဲ့တဲ့ နဝတ စစ်ဓားပြအစိုးရ‌ တက်လာတဲ့အခါ ထောက်လှမ်းရေးမိစ္ဆာ ခင်ညွန့်တို့က လော်စစ်ဟန်ကို ဘိန်းလုပ်ငန်းက ရခဲ့တဲ့ နိုင်ငံခြားငွေတွေ တရားဝင်ပိုင်ဆိုင်ခွင့် ပေးခဲ့တာမို့ ရန်ကုန်မှာ အချမ်းသာဆုံး လုပ်ငန်းရှင်ကြီး ဖြစ်လာရုံသာမက ဗုဒ္ဓဘာသာဝင်တွေ အထွတ်အမြတ်ထား ပူဇော်ကြတဲ့ လေးဆူဓာတ်ပုံ မြတ်ရွှေတိဂုံ စေတီတော်ရဲ့ ရာသက်ပန် ဂေါပကအဖြစ် ဘိန်းဘုရင်ကို သူကောင်းပြုခဲ့ပါ‌သေးတယ်။

ဘိန်းရာဇာနဲ့ ကျေးဇူးခံ ကျေးဇူးစား ထောက်လှမ်းရေး ခင်ညွန့်လည်း အဲ့ဒီအခါက အစပြုလို့ ပြည်တွင်းပြည်ပ နိုင်ငံတကာနယ်ပယ်ထဲမှာ ဖိုးခင်ညွန့် (No.4) လို့ အမည်ဆိုးရခဲ့သလို သူတို့လက်ထက် မြန်မာနိုင်ငံ ခရီးသွားနှစ် အထိမ်းအမှတ်အဖြစ် နိုင်ငံခြားခရီးသွားတွေ လာအောင် ဆွဲဆောင်တဲ့ ကြော်ငြာအဖြစ် ဟံသာဝတီအဝိုင်းအလယ်မှာ ပြထားတဲ့ ဖိုးဝရုပ်တုလက်မှာ ကိုင်ထားတဲ့ လက်ကိုင်အိတ်ဖုံးအမည်းပေါ်မှာ ဟီးရိုးအင်း ဘိန်းဖြူအမှတ်သင်္ကေတ (No.4) ကို တစုံတယောက်က လက်ဆော့ရေးသွားတာမို့ ပြည်သူလူထုက ဟားတိုက်ရီမော ပြောင်လှောင်ခဲ့ကြပါသေးတယ်။

ဘိန်းဘုရင်ခွန်ဆာရဲ့ ဘိန်းလုပ်ငန်းကို ဆက်လက်လုပ်ကိုင်ကြတဲ့ ဝလူမျိုးစု လက်နက်ကိုင် တပ်ဖွဲ့ဟာလည်း နိုင်ငံခြားငွေ ကြွယ်ဝချမ်းသာကြတာကြောင့် ဘိန်းကရတဲ့ ဝင်ငွေတွေကို စစ်ဓားပြတပ်က ဗိုလ်ချုပ်ကြီးတွေ လက်ဝေခံပြီး ဝလူမျိုးစု လက်နက်ကိုင်ခေါင်းဆောင်တွေ ခြေထောက်ကို ဖက်နေကြတာဂာ သမ္မတရူးဖို့ ဘာမဆိုလုပ်ရဲတယ်ဆိုတဲ့ အာဏာလု စစ်ဓားပြ မင်းအောင်လှိုင်တို့တိုင်အောင် ဖြစ်ပါတယ်။

ဒါ‌ကြောင့်မို့လို့လည်း WY လို့ခေါ်တဲ့ ရာဘ / ယာဘ / ရာမ / ယာမ / မြင်းဆေး / ကြယ်သီး / အသီး ဆိုပြီး နာမည်မျိုးစုံ စိတ်ကြွရူးသွပ်ဆေးပြားကို မြန်မာနိုင်ငံထဲကနေ အကြီးအကျယ် ထုတ်လုပ်ဖြန့်ဖြူးတယ်ဆိုတာ ခိုင်လုံတဲ့အချက်ရှိတယ်လို့ ယူဆရတာကြောင့် အမေရိကန် အစိုးရက ဖမ်းမိအောင် သတင်းပေးနိုင်ပါက ဆုတော်ငွေ ဒေါ်လာ ၂ သန်း ပေးမယ်လို့ ကြေညာခံထားရတဲ့ “ဝ” တပ်ဖွဲ့အကြီးအကဲ ‘ပေါက်ယူချန်း’ ကို ပြည်သတ်သမား မင်းအောင်လှိုင်က ငှက်သိုက်ပူပူလေး ဆေးရုံအထိ လိုက်တိုက်ခဲ့တာ လူတိုင်းသိပြီး ဖြစ်ပါတယ်။

ဒီဆောင်းပါးကို နိဂုံးချုပ်ရင် ဗိုလ်ချုပ်အောင်ဆန်း တည်ထောင်ခဲ့တဲ့ မျိုးချစ်တပ်မတော်ကို ဘိန်းစားတပ်ဖြစ်သွားအောင် မူလပထမ စစ်အာဏာရှင် တဏှာရူးနေဝင်းက အစပြုလို့ အစိတ်သားသန်းရွှေတို့ ဖိုးခင်ညွန့်တို့ရဲ့ နဝတ၊ နအဖ စစ်ဓားပြ၊ ပြုပြင်‌ပြောင်းလဲရေး မျက်နှာဖုံးစွပ်ခဲ့တဲ့ ကြောင်ချီးသိန်းစိန်တို့ ချိတ်ထဘီဝတ် စစ်တပိုင်းဓားပြနဲ့ အခုနောက်ဆုံး မုသားကျွန် စစ်ဓားပြ မင်းအောင်လှိုင်ရဲ့ မီးရှို့ဓားပြအဖွဲ့အထိ လက်နက်ကိုင် လူမျိုးစု ဘိန်းကုန်သည်တွေနဲ့ ပုလင်းတူ ဘူးဆို့ ‘လက်ဝေခံခဲ့ရုံသာမက မူးယစ်ဆေးဝါးနဲ့ ဘိန်းလုပ်ငန်းရဲ့ နောက်ကွယ်က ပံ့ပိုးကူညီကြတဲ့ လက်မည်းကြီးတွေ’ ဖြစ်ခဲ့ကြပါတယ်။

နောက်ဆုံးတော့ မူးယစ်ဆေးဝါးကျွေးပြီး စစ်တိုက်ခိုင်း၊ ပြည်သူကိုသတ်ခိုင်းတာ ခံရရင်း အာဏာရှင် ခါးပိုက်ဆောင်တပ်က လက်ပါးစေ လူမိုက် လူ့အန္ဓ စစ်ဗိုလ် စစ်သား ရဲသားတွေဟာ တစတစ မူးယစ်ဆေးစွဲလာကြတာမို့ မူးယစ်ဆေးဝါးရဲ့ သခင်တပိုင်း ကျွန်ရိုင်းလည်းဖြစ်တဲ့ စစ်ရာဇဝတ်ဂိုဏ်း (သို့) မြန်မာ့ဘိန်းတပ်မတော်လို့ အမည်ပေး ကင်ပွန်းတပ်ရင် မှားမယ်မထင်ကြောင်းပါ။

မင်းကောင်းချစ်