ကရင်ပြည်နယ်၊ မြဝတီမြို့မှာ စက်တင်ဘာလ ၁၄ ရက်နေ့မတိုင်မီ ခရီးဝေးသွားကားတွေနဲ့ မြို့တွင်းသွားလာတဲ့ ကားတွေကို စစ်ကောင်စီတပ်တွေက လုံခြုံရေး ပိုမိုတင်းကျပ်စစ်ဆေးနေကာ စတေကာ အမည်းတပ်ဆင်ထားတဲ့ကားတွေကို ခွါချခိုင်းနေတယ်လို့ မြဝတီမြို့ခံတွေနဲ့ ခရီးသွားပြည်သူတွေက ပြောပါတယ်။

စက်တင်ဘာလ ၁၄ ရက်နေ့မှာ နယူးယောက်မြို့ ကုလသမဂ္ဂ အထွေထွေညီလာခံမှာ  မြန်မာအမြဲတမ်း ကိုယ်စားလှယ်ကို ရွေးချယ်ဖို့ရှိနေချိန် ထိုင်း-မြန်မာနယ်စပ် မြဝတီမြို့မှာ စစ်ကောင်စီ ရဲတပ်ဖွဲ့နဲ့ ဌာနဆိုင်ရာတို့က  ပူးပေါင်းပြီး လုံခြုံရေး တင်းကျပ် စစ်ဆေးနေကြတာ ဖြစ်ပါတယ်။

မြဝတီမြို့တွင်းမှာ သွားလာနေတဲ့ ကားတွေရော  ကရင်ပြည်နယ်တချို့နေရာတွေမှာ သွားလာနေတဲ့ စတေကာ အမည်းကပ်ထားတဲ့  ဘယ်ကားအမျိုးအစားကိုမဆို စတေကာအမည်းတွေ ခွာချခိုင်းတာမျိုး ရှိသလို နောက်နောင်ဆို တရားဥပဒေအရ ထိရောက်စွာ အရေးယူ ဆောင်ရွက်မယ်လို့ ပထမအကြိမ်  သတိပေးတာလည်း ရှိတယ်လို့ ဆိုပါတယ်။  

မြဝတီမြို့မှာ တစ်ရက်ကို ဈေးဝယ်ထွက်ချိန် မနက် ၆ နာရီမှ  မွန်းတည့်  ၁၂ နာရီအထိ ထွက်ခွင့်ရှိနေပေမဲ့ အရေးပေါ်ကိစ္စတွေကိုတော့ ဌာနဆိုင်ရာတွေကို အကြောင်းကြားပြီး သွားခွင့်ပြုတာရှိပါတယ်။