စစ်ကိုင်းတိုင်း၊ ခင်ဦးမြို့နယ် ယောက်သွားအိုင်ရွာမှာ အောက်တိုဘာ ၂၈ မနက်ပိုင်းက သတင်းပေးဒလန်လို့ အမည်ထွက်နေတဲ့ အမျိုးသားနှစ်ဦး အသတ်ခံလိုက်ရပါတယ်။

စစ်ကောင်စီ သတင်းပေးလို့ နာမည်ထွက်နေသူ ဦးညိုရင်နဲ့ ဦးဇော်လွင်တို့နှစ်ဦးဟာ မနက် ၉ နာရီလောက် နေအိမ်မှာ အသတ်ခံလိုက်ရတယ်လို့ ဒေသခံတွေကပြောပါတယ်။

“သူတို့နှစ်ဦးက စစ်တပ်ကို သတင်းပေးနေတဲ့ ပျူစောထီးအဖွဲ့ဝင် ဒလန်တွေလို့ နာမည်ကြီး နေတယ်။ အိမ်ပေါ်တက်သတ်သွားတာ၊ ဘယ်သူ သတ်တာလဲတော့ မသိရဘူး” လို့ ဒေသခံ တစ်ဦးကပြောပါတယ်။

သူတို့နှစ်ဦးဟာ စစ်ကောင်စီထံသတင်းပေး လုပ်ဆောင်နေတာကြောင့်  ဒလန်အဖြစ် ရှင်းလင်းခဲ့တာဖြစ်တယ်လို့ တောကြီးမြွေဟာက်(ခင်ဦး) အဖွဲ့က သတင်းထုတ်ပြန်ပါတယ်။

အောက်တိုဘာ ၄ ရက်ကလည်း ငါးတွင်းကြီးရွာအုပ်ချုပ်ရေးမှူး တစ်ဦးရဲ့သားဖြစ်သူ အသတ်ခံခဲ့ရပြီး ဒီနေ့အသတ်ခံရသူနှစ်ဦးကတော့ တောကြီးမြွေဟောက်အဖွဲ့ ဒလန်ရှင်းလင်းရေး လုပ်ဆောင်ခဲ့တာ ၄၆ ဦးမြောက်ဖြစ်တယ်လို့လည်း သိရပါတယ်။

စစ်ကိုင်းတိုင်း ထီးချိုင့်မြို့နယ်ထဲမှာ အောက်တိုဘာ ၂၈ မနက်ပိုင်းက မူးယစ်ဆေးဝါး သယ်ဆောင်လာသူ မိုးကျော်နဲ့ အောင်မျိုးခိုင်တို့ကို ဖမ်းမိခဲ့ပြီး မြို့နယ်ထွက်က ထွက်သွားဖို့ ပြည်နှင်ဒဏ်ပေးလိုက်တယ်လို့ ထီးချိုင့် ပြည်သူ့ကာကွယ်ရေးတပ်ဖွဲ့ Fox army(HPDF) က ထုတ်ပြန်ပါတယ်။

သူတို့နှစ်ဦးဟာ ထီးချိုင့်မြို့နယ် ကျောက်အိုက်ရွာမှာ  မူးယစ်ဆေးဝါး ဆပ်ပြာခွက် (၂၂)ခွက်ကို သယ်ဆောင်လာစဉ် ဖမ်းမိခဲ့တာဖြစ်ပြီး တော်လှန်ရေးကာလပြီးမှ နေအိမ်ကို ပြန်ကြဖို့နဲ့ ထီးချိုင့်မြို့နယ်ထဲမှာ နောက်တစ်ကြိမ် တွေ့ရှိပါက အသက်အာမခံမှု မရှိကြောင်း အသိပေးလိုက်တယ်လို့ ဆိုပါတယ်။

ဖမ်းမိတဲ့ အလေးချိန် တစ်ပိဿာခန့်ရှိ မူးယစ်ဆေးဝါးတွေကို အကုန်မီးရှို့ဖျက်ဆီးခဲ့ပြီး ငွေ ၁၀ သိန်း၊ ဖုန်းကို Fox army (HPDF) က သိမ်းဆည်းခဲ့ပြီး ဆိုင်ကယ်နဲ့ လက်ဝတ်ပစ္စည်းတွေကိုတော့ ပြန်ပေးလိုက်တယ်လို့ ဖော်ပြထားပါတယ်။