ကချင်ပြည်နယ်၊ လိုင်ဇာမြို့နယ်ရှိ အကြီးဆုံး စစ်​ရှောင်စခန်း ၁ ခုဖြစ်တဲ့ ရှအစ်ယန် စစ်​ရှောင် စခန်းမှာ မတ်လ ၁၃ ရက်​နေ့ နေ့လယ် ၁ နာရီလောက်က မီး​လောင်ကျွမ်းမှု ဖြစ်ပွားခဲ့​တယ်လို့ စစ်​ရှောင်တွေက ပြောပါတယ်။

“နေ့လယ် ၁ နာရီ ဝန်းကျင်က။ ရှအစ်ယန် စစ်​ရှောင်စခန်းရပ်ကွက် ၁ က လဖိုင်အိမ်ပါ။ အိမ် ၁ အိမ်ပဲ။ အားလုံး ​လောင်သွားတယ်။ ဘာမှမရလိုက်ဘူး။ လူက​တော့ ဘာမှမဖြစ်ဘူး။ တခြားအိမ်​နီးချင်းတွေ​ကိုတော့ မကူးဘူး” လို့ အဲဒီ စစ်​ရှောင်စခန်း ရပ်ကွက် ၃ မှာ ​နေထိုင်သူ ၁ ဦး က ​ပြောပါတယ်။

အဲဒီအိမ်က အိမ်ရှင်အမျိုးသမီး မီးဖွား​နေလို့ ​အိမ်ရှင် အမျိုးသားပါ ​ဆေးခန်း​ရောက်​နေပြီး အဘွား ဖြစ်သူက ​ဆေးခန်းကို ထမင်းသွားပို့ချိန် ​ရေ​နွေးကျိုတဲ့ လျှပ်စစ်ကွိုင်ကြိုး အပူလွန်ကဲပြီး မီး​လောင် မှု ဖြစ်ပွားခဲ့တာလို့ အဲဒီစစ်​ရှောင်စခန်းမှာ ​နေထိုင်သူ ၁ ဦး က ​ပြောပါတယ်။

"နေအိမ်မှာ က​လေးငယ်​တွေပဲ ကျန်ခဲ့တာ။ မိသားစုဝင် ၉ ​ယောက်ရှိတယ်။ မိဘ ၂ ပါးနဲ့ က​လေး ၆ ​ယောက်၊ အဘွားရယ်။ လောင်သွားတာက ၁ အိမ်တည်းပဲ။ လူ​တွေအားလုံး ဘေးပတ်ဝန်းကျင် အိမ်​တွေကို မီးမကူးဖို့ပဲ တားနိုင်ခဲ့တာ။ အဲဒီအိမ်ကို​တော့ ဘာမှလုပ်လို့မရနိုင်ခဲ့ဘူး။  အကုန်​လောင်သွားတယ်။ ဘာတခုမှမရလိုက်ဘူး။”

အခက်အခဲအကျပ်အတည်းကာလမှာ အခုလို ဖြစ်သွားတာကြောင့် စားစရာမရှိ၊ ခြုံစရာ ​စောင်မရှိ အ​အေးလွန်ကဲတဲ့ဒေသမှာ ဒုက္ခဖြစ်ခဲ့ရတယ်လို့ ဆိုပါတယ်။

စစ်တပ်နဲ့ ကချင်လွတ်မြောက်ရေးတပ်မတော် (KIA) တို့အကြား တိုက်ပွဲပြင်းထန်ခဲ့တာ​ကြောင့် ၂၀၁၀၊ ၂၀၁၁ ခန့်ကတည်းက အကြိမ်ကြိမ်တိမ်းရှောင်လာကြတဲ့ ပါ​ဂျော်ဝ် ရှအစ်ယန် စစ်​ရှောင်စခန်းမှာ ရပ်ကွက် ၅ ခုရှိပြီး အိမ်​ခြေ ၃၉၀ လောက်ရှိတယ်လို့ သိရပါတယ်။