မွန်ပြည်နယ်  ရေးမြို့နယ်မှ ထွက်ရှိတဲ့ ရေး ဒူးရင်းသီး ရာသီအဖွင့် စံချိန်တင်ဈေး ရရှိတယ်လို့ ခြံသမားတွေက  ပြောပါတယ်။

ပြီးခဲ့တဲ့နှစ်ရာသီ အဖွင့်ဈေးက ကျပ် ၃,၀၀၀ အထိသာ ရပေမဲ့ ဒီနှစ် အဖွင့်ဈေးက ကျပ် ၅,၀၀၀ ကနေ ရိုးရိုးရှယ်သီးက ကျပ် ၈,၀၀၀ အထိ ဈေးရရှိနေပါတယ်။

ဒေသခံ ခြံသမားတဦးက “ဒီနှစ်က ရာသီဥတုလည်း ပူပြင်းတယ် ဒူးရင်း ပန်းတွေ ရာသီဥတုဒဏ်ကြောင့် ပျက်စီးတာတွေနဲ့ ကြုံရတာကြောင့် အရင်နှစ်တွေထက် ဒူးရင်းသီးက ရရှိမယ်လို့တော့ မထင်ဘူး။  အခုရာသီ အဖွင့်ဈေးကောင်းပေမဲ့ အသီးက မရှိရင် နောက်လတွေမှ အသီးက ပိုမိုထွက်ရှိမယ်ဆိုတော့ ဒီထက် ပိုမိုဈေးကောင်းရမှ ခြံတွေရဲ့ ကုန်ကျစရိတ်နဲ့သာ တွက်ခြေကိုက်မယ်” လို့ ပြောပါတယ်။

ဒေသခံ ကုန်သည်တဦးက “ရာသီအဖွင့်ဈေးမှာ ရိုးရိုးအသီးက ကျပ် ၅,၀၀၀ နဲ့ ၈,၀၀၀ ကျပ် ကြားမှာ ဈေးကောင်းပေးဝယ်ရပေမဲ့ အခုချိန်က ရာသီအစမို့ အသီးက သိပ်မဝင်သေးဘူး။ အခုလို သယ်ယူစရိတ်ကြီးမြင့်တာရယ်၊ လမ်းခရီးမှာ ကြန့်ကြာမှုနဲ့တွေ့ကြုံရတဲ့အခါ ဆုံးရှုံးမှုတွေ ရှိလာနိုင်တယ်” လို့   ပြောပါတယ်။

ထွက်ရှိလာတဲ့ ရေး ဒူးရင်းသီးတွေထဲမှ မွန်ပြည်နယ်၊ ရန်ကုန်နဲ့ ပဲခူးအထိ တင်ပို့ရောင်းရပြီး  စစ်တပ်အာဏာသိမ်းတဲ့ ၁ နှစ်ကျော်ကာလအတွင်း စံချိန်တင်ဈေးတွေ ရရှိလာပေမဲ့ အခုလို နိုင်ငံရေးအကျပ်အတည်းကာလမှာ ဈေးကြီးပေးဝယ်ယူစားသုံးမယ့်လူမရှိမှာကို စိုးရိမ်ရတယ်လို့ ဆိုပါတယ်။

ရေးမြို့နယ်မှာ ရိုးရိုးဒူးရင်းသီးအပြင် ထိုင်းမျိုးစပ် ဒူးရင်းသီးတွေကိုလည်း တောင်သူတွေ တဖြည်းဖြည်း ပိုပြီးစိတ်ဝင်တစား စိုက်ပျိုးလာကြပါတယ်။