ဖင်လန်နိုင်ငံဟာ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်နဲ့ အစည်းအဝေးမှာ နေတိုး စစ်ရေးမဟာမိတ်အဖွဲ့ဝင်အဖြစ် ထပ်အတည်ပြုပြီးတဲ့နောက် အရန်စစ်သည်တွေဟာ စစ်ရေးနဲ့ လုံခြုံရေးသင်တန်းတွေမှာ မေ ၂၈ ရက်က ပါဝင်လေ့ကျင့်နေပါတယ်။

MPK ပြဲ့စာမာကီလေ့ကျင့်ရေးကွင်းမှာ သင်တန်းမှူးက စေတနာ့ဝန်ထမ်းစစ်သည်တွေကို ပြင်ဆင်ရေးနဲ့ လုံခြုံရေး သင်တန်းတွေ၊ စစ်ရေးစွမ်းရည်တွေကို သင်ကြားပေးတဲ့ အမျိုးသား ကာကွယ်ရေးသင်တန်းအဖွဲ့ရဲ့ သင်ရိုးတွေ သင်ကြားနေပါတယ်။

ဖင်လန်နဲ့ အိမ်နီးချင်း ရုရှားက ယူကရိန်းကို ဆက်လက် ကျူးကျော်နေဆဲမို့ သူ့သင်တန်းမှာ လာတက်တဲ့ လူတွေ ပိုများလာလိမ့်မယ်လို့ သင်တန်းမှူးက ယုံကြည်ထားပါတယ်။

စိတ်ဝင်စားသူတွေ များနေလို့ သင်တန်းတက်ဖို့ တောင်းဆိုသူတွေ ပိုများနေတယ်လို့ သူက ရိုက်တာ သတင်းဌာနကို ပြောပါတယ်။

စစ်သင်တန်းကို စေတနာ့ဝန်ထမ်း လာတက်သူ ပါစီ ပတ်ကီနန်က ယူကရိန်းစစ်ပွဲဟာ ဖင်လန်ပြည်သူတွေရဲ့ စိတ်ထဲမှာ ရှေ့တန်းအတွက် ကြိုတင် ပြင်ဆင်လာကြတယ်ဆိုတဲ့ အယူအဆကို ထပ်လောင်း အတည်ပြုပေးတယ်လို့ ပြောပါတယ်။

“လက်ရှိအခြေအနေက ဖင်လန်အတွက် ခြိမ်းခြောက်မှုလို့တော့ မခံစားရသေးပါဘူး။ ဒါပေမယ့် ယူကရိန်းက အခြေအနေကြောင့် ကျနော်တို့ အရာအားလုံးအတွက် ပြင်ဆင်ထားဖို့ လိုပြီဆိုတာ သေချာတယ်” လို့ သူက ပြောပါတယ်။

ဆွီဒင်နဲ့ ဖင်လန် သံတမန်တွေဟာ တူရကီနိုင်ငံမှာ မေ ၂၅ ရက်က တွေ့ဆုံခဲ့ကြပြီး နော်ဒစ်နိုင်ငံတွေ နေတိုး မဟာမိတ်အဖွဲ့ထဲ ဝင်တာကို ဆန့်ကျင်တဲ့ နေတိုးအဖွဲ့ဝင် တူရကီ စိတ်ကျေနပ်စေဖို့ ကြိုးပမ်းခဲ့ပါတယ်။

နေတိုးအဖွဲ့ရဲ့ လာမယ့် ထိပ်သီးညီလာခံကို ဇွန် ၂၉ နဲ့ ၃၀ မှာ မဒရစ်မြို့မှာ မကျင်းပမီ တူရကီနဲ့ ရလဒ်တချို့ရဖို့ အင်မတန် အရေးကြီးတယ်လို့ ဖင်လန်နိုင်ငံခြားရေးဝန်ကြီးက အမေရိကန် နိုင်ငံခြားရေးဝန်ကြီးကို မေ ၂၇ ရက်က ပြောခဲ့ပါတယ်။