ဗြိတိန်ဝန်ကြီးချုပ် ဘောရစ်ဂျွန်ဆင်ရဲ့နေရာကို ဆက်ခံဖို့အတွက်  စည်းရုံးနေသူ တဦးဖြစ်တဲ့  ဝန်ကြီးချုပ်လောင်း လစ်ဇ်ထရပ်စ်စ်က အခုအချိန်ဟာ  ပုံမှန်အတိုင်း စီးပွားရေးလုပ်ဖို့ အချိန်မဟုတ်ဘူးလို့ ဇူလိုင် ၂၁ ရက်မှာ ပြောဆိုလိုက်ပါတယ်။ 

လစ်ဇ်ထရပ်စ်စ်ဟာ သူ့ရဲ့ပြိုင်ဘက် ရီရှီဆူနက်ခ်ကို ၂၄ မှတ် အသာရထားကြောင်း မနေ့ ထုတ်ဝေတဲ့ ကွန်ဆာဗေးတစ်ပါတီအဖွဲ့ဝင်တွေရဲ့ YouGov စစ်တမ်းတခုမှာ ဖော်ပြပါတယ်။ 

ထရပ်စ်စ်က အလုပ်ချိန်ပြင်ပမှာ မိသားစုဝင်တွေ ဒါမှမဟုတ် ကလေးတွေကို အချိန်ပေး စောင့်ရှောက်နေရသူတွေကို အခွန်လျှော့ပေးချင်ကြောင်း သူ့စည်းရုံးရေးအဖွဲ့က  ဇူလိုင် ၂၁ ရက်မှာ ပြောကြားခဲ့ပါတယ်။ 

သူ့ရဲ့ထိပ်တန်းပြိုင်ဘက် ဘဏ္ဍာရေးဝန်ကြီးဟောင်း ရီရှီဆူနက်ခ်ကလည်း အခွန်လျှော့ချဖို့ စီစဉ်နေပေမယ့် ၁၀ ရာခိုင်နှုန်းနီးပါး လည်ပတ်နေတဲ့ ငွေကြေးဖောင်းပွမှုကို တကြိမ်တခါ လောက်ပဲ ထိန်းချုပ်နိုင်မယ်လို့ ပြောထားဖူးပါတယ်။ 

သူ့ပြိုင်ဘက်ကိုလည်း အခွန်တွေ လျှော့ချပေးမယ်ဆိုတဲ့ စိတ်ကူးယဉ်ကတိတွေ ပေးနေတာ ဖြစ်ကြောင်း ရီရှီဆူနက်ခ်က စွပ်စွဲခဲ့ပါတယ်။ 

လက်ရှိ ဗြိတိန်နိုင်ငံခြားရေး၀န်ကြီးဖြစ်တဲ့ ထရပ်စ်စ်ဟာ တနှစ်ကို ခန့်မှန်းခြေ ပေါင် ၃၀ ဘီလီယံ ကုန်ကျမယ့် အခွန်လျှော့ချမှုဆိုင်ရာ တခြားကတိကဝတ်တွေကိုလည်း ပေးထားတာဖြစ်ပါတယ်။ 

အခုသီတင်းပတ်တွေအတွင်း နောက်ဆုံး ဆန်ကာတင် ဝန်ကြီးချုပ်လောင်း ၂ ဦး ဟာ အကြိတ်အနယ် ယှဉ်ပြိုင်ကြမှာဖြစ်ပြီး အနိုင်ရသူကို စက်တင်ဘာ ၅ ရက်မှာ ကြေညာမှာ ဖြစ်ပါတယ်။