နိုင်ငံတကာအသိုက်အဝန်းက လျစ်လျူရှု သစ္စာဖောက်တယ်လို့ မြန်မာနိုင်ငံသားတွေ ခံစားနေရကြောင်း ကုလအထွေထွေညီလာခံမှာ အရှေ့တီမော သမ္မတက ပြောကြားလိုက်ပါတယ်။

စက်တင်ဘာ ၂၃ ရက်နေ့ ကုလသမဂ္ဂအထွေထွေ ညီလာခံမိန့်ခွန်းမှာ အရှေ့တီမောနိုင်ငံ သမ္မတဟိုဆေး ရာမို့စ်ဟော်တာက  မြန်မာ၊ အာဆီယံနဲ့ ယူကရိန်းနိုင်ငံအကြောင်းတို့ကို ထည့်သွင်းပြောကြေားခဲ့ပါတယ်။

အရှေ့တီမောနိုင်ငံဟာ ကမ္ဘာ့ရာသီဥတုအပြောင်းအလဲနဲ့ ကိုဗစ်ကပ်ရောဂါကို ရင်ဆိုင်ခဲ့ရကြောင်း၊ ဒါ့ပေမဲ့ ကိုဗစ်ရောဂါရဲ့ဒဏ်ကို အနည်းဆုံးခံစားရတဲ့နိုင်ငံ ဖြစ်ခဲ့ကြောင်း၊ ကိုဗစ်ကပ်ဘေးကို ကျော်လွှားနိုင်ဖို့ ကူညီပေးခဲ့ကြတဲ့ နိုင်ငံတွေကို ကျေးဇူးတင်ကြောင်း သမ္မတက ပြောပါတယ်။

မြန်မာ၊ အာဖဂန်နစ္စတန်၊ ယီမင်နဲ့ ယူကရိန်းအစရှိတဲ့ နိုင်ငံတွေမှာ လူတွေဖန်တီးတဲ့ ပြဿနာတွေနဲ့ ဘေးအန္တရာယ်တွေ ကြုံတွေ့နေကြရပေမယ့် တီမောလက်စတေးမှာတော့ အေးချမ်းတည်ငြိမ်နေတယ်လို့ ဆိုပါတယ်။ 

အရှေ့တီမောနိုင်ငံမှာ ရာဇဝတ်မှုဖြစ်ပွားတာ အလွန်နည်းပြီး လုယက်မှုနဲ့ အုပ်စုဖွဲ့ စီစဉ်ကျူးလွန်တဲ့ ရာဇဝတ်မှုတွေမရှိကြောင်း ပြောပါတယ်။ 

၉၈ ရာခိုင်နှုန်းသော ကက်သလစ်ဘာသာကိုးကွယ်သူတွေဟာ လူနည်းစုပရိုတက်စတင့်နဲ့ မွတ်စလင်ဘာသာ ကိုးကွယ်သူတွေနဲ့အတူ ငြိမ်းချမ်းစွာအတူယှဉ်တွဲနေထိုင်ကြပြီး လူမျိုးစုနဲ့ ဘာသာရေး ပြဿနာတွေ မရှိဘူးလို့ ဆိုပါတယ်။

အာဆီယံအဖွဲ့ဝင်နိုင်ငံဖြစ်ရတာဟာ အရှေ့တီမောနိုင်ငံရဲ့ တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးအတွက် အရေးပါပြီး အဖွဲ့ဝင်နိုင်ငံတခုမှာ ပဋိပက္ခတွေ ပြဿနာတွေရှိလာတဲ့အခါ အခြားအဖွဲ့ဝင်နိုင်ငံတွေလည်း ရှောင်လွှဲမရအောင် ထိခိုက်လာမယ်လို့ ပြောပါတယ်။

ရုရှားရဲ့ကျူးကျော်စစ်ကို ခုခံနေရတဲ့ ယူကရိန်းကို အကူအညီပေးရတာကြောင့် အခြားဒုက္ခသည်ပြဿနာတွေနဲ့ ရင်ဆိုင်နေရတဲ့ နိုင်ငံတွေကို ကူညီထောက်ပံ့နေတာတွေ မလျော့ချသင့်ဘူးလို့လည်း သမ္မတ ရာမို့စ်ဟော်တာက  ဆိုပါတယ်။ 

မြန်မာနိုင်ငံသားတွေဟာလည်း နိုင်ငံတကာအဖွဲ့အစည်းတွေက လျစ်လျူရှုထားပြီး သစ္စာဖောက်တယ်ဆိုပြီး ခံစားနေရတယ်လို့ ပြောပါတယ်။ 

ယူကရိန်းတော်လှန်ရေးအတွက် စစ်လက်နက်အကူအညီတွေနဲ့ ဒုက္စသည်တွေအတွက် အကူအညီတွေပေးသလို မြန်မာနိုင်ငံက စစ်ဘေးသင့်ပြည်သူတွေအတွက် ဘာကြောင့်မကူညီကြတာလဲလို့ မြန်မာနိုင်ငံသားတွေက မေးနေကြပြီလို့ ဆိုပါတယ်။ 

မြန်မာနိုင်ငံရဲ့ ပဋိပက္ခတွေဟာ အိမ်နီးချင်းနိုင်ငံတွေရဲ့ လုံခြုံရေးကိုပါ ထိခိုက်နေကြောင်းနဲ့ ထပ်ပြီးဆိုးလာနိုင်ချေရှိတယ်လို့ ပြောပါတယ်။ 

မြန်မာ၊ ယူကရိန်းနဲ့ တခြားနိုင်ငံတွေက ပဋိပက္ခတွေအတွက် အဘက်ဘက်က သက်ဆိုင်ရာ အဖွဲ့အစည်းအစုံပါဝင်တဲ့ ဆွေးနွေးညှိနှိုင်းမှုတွေ လိုအပ်ကြောင်းနဲ့ မြန်မာစစ်တပ်ဟာ ပြင်ပဖိအားတွေကနေ ခုခံကာကွယ်နေရပါတယ်ဆိုတဲ့ ဆင်ခြေပေးလို့မရတော့ဘူးလို့ သမ္မတ ရာမို့စ်ဟော်တာက ပြောပါတယ်။