ရန်ကုန်တိုင်းဒေသကြီး ရွှေလုပ်ငန်းရှင်အသင်း အလုပ်အမှုဆောင် အစည်းအဝေး ဆုံးဖြတ်ချက်အရ မီးလင်းအခေါက်ရွှေ ၁၀ ပိဿာကျော်ကို အောက်တိုဘာ ၁၂ ရက်နေ့ မွန်းလွဲ ၁ နာရီကနေ ၃ နာရီအတွင်း ရောင်းချပေးသွားမယ်လို့ သိရပါတယ်။ 

ရွှေလုပ်ငန်းရှင်များအသင်းဝင်ကလွဲရင် မည်သူမဆို ၁ ကျပ်သားကနေ ၁၀ ကျပ်သားအထိ တကြိမ်စီ ဝယ်ယူနိုင်တယ်လို့ ဆိုပါတယ်။ 

ဝယ်ယူချင်သူတွေအနေနဲ့ ရန်ကုန်တိုင်း ပန်းဘဲတန်းမြို့နယ် ရွှေဘုံသာလမ်းမှာ မှတ်ပုံတင်မိတ္တူ သန်ခေါင်စာရင်းမိတ္တူနဲ့အတူ လာရောက် ဝယ်ယူနိုင်တယ်လို့ ကြေညာထားပါတယ်။ 

ရွှေလုပ်ငန်းရှင်များ အသင်းဝင်တွေနဲ့ ရွှေကုန်သည်တွေ အနေနဲ့လည်း ရွှေတံဆိပ် အသစ်နဲ့ ရွှေအရောင်းပွဲတော်မှာ ပါဝင်ရောင်းချချင်တယ်ဆိုရင် အသင်းရုံးတည်ရှိရာကို လာရောက် စာရင်းပေးသွင်းကြဖို့ကိုလည်း ဖိတ်ခေါ်ထားပါတယ်။ 

မန္တလေးရွှေလုပ်ငန်းရှင်များအသင်းကလည်း အောက်တိုဘာလ ၇ ရက် မွန်းလွဲပိုင်းက အကယ်ဒမီ(မီးလင်း) အခေါက်ရွှေ တကျပ်သားကို ၂၅ သိန်း ၄ သောင်း သတ်မှတ်ပြီး လူတဦးကို အလေးချိန် တဆယ် ကျပ်သားရှိ အကယ်ဒမီ(မီးလင်း)အခေါက်ရွှေ တပိုင်းနှုန်းနဲ့ ရောင်းချပေးခဲ့ပါတယ်။ 

ရန်ကုန်ရွှေဈေးကွက်မှာ အကယ်ဒမီ(မီးလင်း) ရွှေဈေးက တကျပ်သားကို ကျပ် ၂၇ သိန်းနီးပါး ရှိခဲ့ရာကနေ အောက်တိုဘာ ၇ ရက်က ကျပ် ၂၅ သိန်း ၈ သောင်းအထိ ဈေးကျဆင်းခဲ့ပါတယ်။