သန်းကြွယ်သူဌေးကြီး အီလွန်မက်စ်ပိုင်ဆိုင်တဲ့  ဦးနှောက်ချစ်ပ်ပြားကုမ္ပဏီ နျူရာလင့်ခ် (์Neuralink) က တီထွင်ဖန်တီးထားတဲ့ ဦးနှောက်ထိန်းချုပ် ကြိုးမဲ့ကိရိယာကို လာမယ့် ၆ လအတွင်း လူသားတွေနဲ့ လက်တွေ့စမ်းသပ်တော့မယ်လို့ နိုဝင်ဘာ ၃၀ ရက်က ပြောလိုက်ပါတယ်။

နျူရာလင့်ခ်ဟာ ကုမ္ပဏီဟာ မသန်စွမ်းလူနာတွေကို ပြန်လည်လှုပ်ရှားလာစေနိုင်ပြီး ဆက်သွယ်နိုင်မယ့် ဦးနှောက်ချစ်ပ်ပြား ကြားခံပစ္စည်းကို ဖန်တီးစမ်းသပ်နေတာပါ။

ဆန်ဖရန်စစ္စကို ပင်လယ်ကွေ့ဧရိယာနဲ့ တက္ကဆက်ပြည်နယ် အော်စတင်မြို့တို့မှာ အခြေစိုက်ထားတဲ့ နျူရာလင့်ခ်ဟာ ပြီးခဲ့တဲ့နှစ်တွေကတည်းက တိရစ္ဆာန်တွေနဲ့ စမ်းသပ်နေခဲ့တာဖြစ်ပြီး လူသားတွေနဲ့ စမ်းသပ်ဖို့ကိုတော့ အမေရိကန် စည်းကမ်းထိန်းသိမ်းရေး ခွင့်ပြုချက်ကို တောင်းခံထားတာပါ။

နျူရာလင့်ခ် ကုမ္ပဏီပိုင်ရှင် အီလွန်မက်စ်က လွန်ခဲ့တဲ့တစ်နှစ်က အများပြည်သူကို နောက်ဆုံးချပြခဲ့တဲ့ တင်ပြချက်မှာ ကွန်ပျူတာဂိမ်းကို သူ့ဖာသာ စဉ်းစားရင်း ကစားပြခဲ့တဲ့ ဦးနှောက်ချပ်စ်ပြား တပ်ဆင်ထားတဲ့ မျောက်တကောင်လဲ ပါဝင်နေပါတယ်။

မက်စ်ဟာ ဦးနှောက်ထဲက ချပ်စ်ပြားကတဆင့် လျှပ်စစ်ပစ္စည်းတွေ ထိန်းချုပ်တာအပြင် အကြောသေနေတဲ့လူတွေ ပြန်လှုပ်ရှားလာနိုင်ဖို့နဲ့ အဲလ်ဇိုင်းမား၊ ပါကင်ဆန်နဲ့ ရူးသွပ်မှု စတဲ့ ဦးနှောက်ဆိုင်ရာ ရောဂါတွေကို ကုသလာနိုင်ဖို့ ရည်ရွယ်ထားတာပါ။

ဉာဏ်ရည်တုနည်းပညာနဲ့ ဦးနှောက်ကို ပေါင်းစည်းမယ့်အကြောင်းလည်း ပါဝင်ပါတယ်။ နျူရာလင့်ခ်ရဲ့ နယ်ပယ်တူပြိုင်ဘက် စင်ခရုန်းကတော့ အမေရိကန်ပြည်ထောင်စုမှာ ပထမဆုံးအနေနဲ့ သူတို့ဖန်တီးထားတဲ့ ကိရိယာကို လူနာတစ်ဦးနဲ့ ဇွန်လထဲမှာစမ်းသပ်ခဲ့ပြီး မှတ်ကျောက်တင်နိုင်ခဲ့ပါတယ်။