မြောက်ကိုရီးယားဒရုန်းများ ကျူးကျော်မှုအပေါ် စစ်ရေးတုံ့ပြန်ပြင်ဆင်ရန် တောင်ကိုရီးယား သမ္မတ အမိန့်ပေး
တောင်ကိုရီးယားသမ္မတ ယွန်းဆွတ်ခ်ယိုးဟာ နိုင်ငံရဲ့ လေပိုင်နက်ကို ချိုးဖောက် ကျူးကျော်လာတဲ့ မြောက်ကိုရီးယား မောင်းသူမဲ့ ဒရုန်းလေယာဉ်တွေကို စစ်ရေးတုံ့ပြန်မှုအပေါ် ပြန်မွမ်းမံပြင်ဆင်ဖို့ ဒီဇင်ဘာ ၂၉ ရက်မှာ အမိန့်ပေးခဲ့ပါတယ်။
ဒီဇင်ဘာ ၂၆ ရက်က မြောက်ကိုရီးယား မောင်းသူမဲ့ လေယာဉ် ၅ စင်း တောင်ကိုရီးယားကို ဖြတ်ကျော်ဝင်ရောက်ခဲ့ပြီး တောင်ကိုရီးယားစစ်တပ်က တိုက်လေယာဉ်တွေ၊ တိုက်ခိုက်ရေး ဟယ်လီကော်ပတာတွေနဲ့ အသည်းအသန် တုံ့ပြန်ခဲ့ပေမဲ့လည်း တောင်ကိုရီးယားနိုင်ငံပေါ်မှာ နာရီပေါင်းများစွာ ပျံသန်းနေတဲ့ ဒရုန်းတွေကို ပစ်ချနိုင်ဖို့ ပျက်ကွက်ခဲ့ပါတယ်။
မြောက်ကိုရီးယားရဲ့ နျူးကလီးယားနဲ့ ဒုံးကျည်ခြိမ်းခြောက်မှုတွေ ကြီးထွားလာချိန်မှာပဲ တောင်ကိုရီးယားရဲ့ လေကြောင်းရန်ကာကွယ်ရေးအပေါ် ဝေဖန်မှုတွေရှိတဲ့ကြားက သမ္မတယွန်းဟာ ဒယ်ဂျွန်းရှိ အစိုးရပိုင် ကာကွယ်ရေး ဖွံ့ဖြိုးတိုးတက်ရေး အေဂျင်စီ (ADD) ကို သွားရောက်ခဲ့ပြီး နိုင်ငံရဲ့ ကင်းထောက်စွမ်းရည်နဲ့ ကြားဖြတ်တားဆီးနိုင်စွမ်းရည်တို့ကို စစ်ဆေးခဲ့ပါတယ်။
“ကျနော်တို့ရဲ့ လေပိုင်နက်ကို ချိုးဖောက်လာပြီး ပျံသန်းနေတဲ့ ပစ္စည်းအားလုံးကို ဆန့်ကျင်တဲ့ ကျွန်ုပ်တို့ရဲ့ တုံ့ပြန်မှုစနစ်တခုလုံးကို ပြန်သုံးသပ်သင့်ကြောင်းနဲ့ ကိုယ့်ဆီမှာ မလုံလောက်တာရှိရင် ချက်ချင်း ပြန်မြှင့်တင်သင့်တယ်” လို့ ADD မှ စစ်တပ်အရာရှိတွေနဲ့ တွေ့ဆုံချိန်မှာ သမ္မတ ယွန်းက ပြောပါတယ်။
သမ္မတ ယွန်းဟာ ၂၀၁၇ ခုနှစ်နောက်ပိုင်း ပထမဆုံးအဖြစ် ဒီဇင်ဘာ ၂၆ ရက်က ကျူးကျော်မှုအပေါ် စစ်တပ်ရဲ့ကိုင်တွယ်မှုကို ပြစ်တင်ရှုတ်ချခဲ့ပြီး ဒရုန်းယူနစ်တွေကို အရှိန်အဟုန်နဲ့ အားဖြည့်ပေးဖို့လည်း တိုက်တွန်းခဲ့ပါတယ်။
