မကွေးတိုင်း၊ ဆောမြို့နယ်မှာ စက်တင်ဘာ ၁၄ ရက် မနက်ပိုင်းက ကျောက်ထုရဲစခန်းထဲက ကင်းပတ်ထွက်လာတဲ့ ရဲတယောက်နဲ့ စစ်ကောင်စီတပ်သားတယောက် ချုံခိုတိုက်ခိုက်ခံရပြီး သေဆုံးခဲ့တယ်လို့ ကျောက်ထု-PDF (YRPA) ပြန်ကြားရေးတာဝန်ခံ ဗိုလ်ရန်ကင်းက ဒီဗွီဘီကို ပြောပါတယ်။
“ကျောက်ထုရဲစခန်းထဲကနေ ဆိုင်ကယ်တစီးနဲ့ ကင်းပတ်ထွက်လာတဲ့ ရဲတယောက်နဲ့ စစ်(...)တယောက်ကို ဒီနေ့ စက်တင်ဘာ ၁၄ ရက်နေ့ မနက် ၇ နာရီခွဲလောက်မှာ ကျနော်တို့ ကျောက်ထု-PDF က ရဲဘော်တွေ ခြုံခိုတိုက်ခိုက်ခဲ့လို့ ၂ ယောက်စလုံး ပွဲချင်းပြီး သေဆုံးခဲ့တယ်။ ကျနော်တို့က သူတို့ဆီက လက်နက်ခဲယမ်းကို သိမ်းဆည်းနိုင်ဖို့ ကြိုးစားပေမဲ့ ရဲစခန်းနဲ့ နီးကပ်နေတာကြောင့် နောက်က စစ်ကူတွေလိုက်လာလို့ ရဲဘော်တွေ အထိအခိုက် အကျအဆုံးမရှိဘဲ ပြန်ဆုတ်ခဲ့တယ်။”
ကျောက်ထုဒေသမှာ စက်တင်ဘာ ၉ ရက် မနက်ပိုင်းကလည်း စစ်ကောင်စီစစ်ကြောင်းနဲ့ PDF ပူးပေါင်းတပ်ဖွဲ့တွေ တိုက်ပွဲဖြစ်ပွားပြီး စစ်ကောင်စီဘက်က ၄ ယောက်ထက်မနည်း သေဆုံးကာ ၁၀ ယောက်ကျော်လောက် ဒဏ်ရာရခဲ့တယ်လို့ ကျောက်ထု PDF (YRPA) ကနေ သိရပါတယ်။
နှစ်ဖက်တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ရန်ကုန်တိုင်း၊ ဆိပ်ကြီးခနောင်တိုမြို့နယ်၊ ဆမားဒူးဝါးရပ်ကွက်အနီးမှာ ဒီနေ့ မနက် ၁၁ နာရီလောက်က ကင်းလှည့်နေတဲ့ ရဲတပ်ဖွဲ့ဝင်တစ်ဦး ဓားနဲ့ခုတ်ခံရတယ်လို့ မြို့ခံတွေက ပြောပါတယ်။
ဓားခုတ်ခံရသူမှာ ဒုတပ်ကြပ်တင်ထွန်းအောင်ဖြစ်ပြီး မြို့နယ်တွင်းလုံခြုံရေး လှည့်ကင်းလှည့်နေချိန် ဆမားဒူးဝါးရပ်ကွက်၊ ငုဝါလမ်းအရောက်မှာ နောက်ဆုံးဆိုင်ကယ်နဲ့လိုက်ပါလာစဥ် ဓားနဲ့ခုတ်ခံရတာလို့ ဆိုပါတယ်။
ဒုတပ်ကြပ် တင်ထွန်းအောင်ကို မြို့နယ်ဆေးရုံ တင်ပို့ထားရတယ်လို့ သိရပါတယ်။ ဓားနဲ့ခုတ်ခဲ့တဲ့ အမျိုးသားကို ဖမ်းဆီးရမိရေး စစ်တပ်နဲ့ရဲတွေက အပူတပြင်း ရှာဖွေနေတယ်လို့ သိရပါတယ်။
