ရုရှားနိုင်ငံခြားရေးဝန်ကြီးဌာနက အမေရိကန် သမ္မတ ဂျိုးဘိုင်ဒင် အပါအဝင် အမေရိကန်နိုင်ငံသား ၉၆၃ ယောက်နဲ့ ကနေဒါနိုင်ငံသား ၂၆ ယောက်တို့ပါဝင်တဲ့ စာရင်းကို မေ ၂၁ ရက်က ထုတ်ပြန် လိုက်ပြီး သူတို့ကို ရုရှားနိုင်ငံထဲဝင်ခွင့် ရာသက်ပန် တားမြစ်ပိတ်ပင်လိုက်တယ်လို့ ပြောပါတယ်။
အမေရိကန်က ရုရှားဆန့်ကျင်ရေး ဒဏ်ခတ်ပိတ်ဆို့တာတွေကို တုံ့ပြန်တဲ့အနေနဲ့ အမေရိကန် နိုင်ငံသားစာရင်းကို ထုတ်ပြန်တာလို့ ဝန်ကြီးဌာနက ကြေညာပါတယ်။
ဒါ့အပြင် ရန်လိုတဲ့ အမေရိကန်ရဲ့ လုပ်ရပ်တွေဟာ သင့်တော်တဲ့ တုံ့ပြန်မှုတွေကို ဆက်ပြီး လက်ခံ နေရလိမ့်မယ်လို့လည်း ပြောပါတယ်။
ဒီစာရင်းထဲမှာ အမေရိကန်ဒုသမ္မတ ကာမာလာ ဟာရစ်၊ ဖေ့စ်ဘွတ်ခ်လူမှုကွန်ရက် တည်ထောင်သူ မာ့ခ် ဇူကာဘက်နဲ့ အမေရိကန်နိုင်ငံခြားရေး ဝန်ကြီးဟောင်း ဟီလာရီ ကလင်တန်တို့လည်း ပါဝင်ပါတယ်။
ရုရှားက ထိပ်တိုက်တွေ့ဖို့ ကြိုးစားတာမဟုတ်ဘဲ ရိုးသားပြီး အပြန်အလှန် လေးစားမှုရှိတဲ့ ဆွေးနွေးရေးကို လမ်းဖွင့်ထားတယ်လို့လည်း ကြေညာချက်က ပြောပါတယ်။
တကယ်တော့ ဘိုင်ဒင်သာမက နိုင်ငံခြားရေးဝန်ကြီး အန်ထော်နီ ဘလင်ကန်၊ ကာကွယ်ရေး ဝန်ကြီး လွိုက်ဒ် အော်စတင်နဲ့ ပူးတွဲစစ်ဦးစီး အရာရှိချုပ်များအဖွဲ့ဥက္ကဋ္ဌ မာ့ခ် မိုင်လေ တို့ကို မတ်လလယ်တည်းက ရုရှားနိုင်ငံဆီ လည်ပတ်ခွင့် တားမြစ်ပိတ်ပင်ပြီးသားပါ။
ရုရှားနိုင်ငံခြားရေးဝန်ကြီးဌာနဟာ အဲဒီနေ့မှာပဲ ကနေဒါဝန်ကြီးချုပ် ဂျပ်စတင် ထရူဒူရဲ့ ဇနီး အပါအဝင် ကနေဒါ နိုင်ငံသား ၂၆ ယောက်ကိုလည်း ရုရှားနိုင်ငံထဲဝင်ခွင့် ရာသက်ပန် တားမြစ် ပိတ်ပင်တယ်လို့ သီးခြား ကြေညာချက် ထုတ်ပြန်ခဲ့ပါတယ်။
ဒါဟာ ကနေဒါက ရုရှားကို ဆန့်ကျင်ပြီး ဒဏ်ခတ်ခဲ့လို့ လက်တုံ့ပြန်တာလည်း ဖြစ်ပါတယ်။
ကနေဒါနိုင်ငံအတွင်း လက်ရှိ အာဏာရအစိုးရရဲ့ ရန်လိုတဲ့ လုပ်ရပ်တွေကို တုံ့ပြန်တဲ့အနေနဲ့ နီးကပ်တဲ့ အနာဂတ်မှာ တုံ့ပြန်ဆောင်ရွက်ချက်တွေ ဆက်လာဦးမယ်လို့လည်း ရုရှားက ပြောပါတယ်။
ကနေဒါက ရုရှားနိုင်ငံသား ၁၄ ယောက်ကို ဒဏ်ခတ်မှုအသစ် ချမှတ်ကြောင်း ကြေညာပြီး ရုရှားနိုင်ငံဆီကို ဇိမ်ခံပစ္စည်းတွေနဲ့ ကွန်ပျူတာဆိုင်ရာ ပစ္စည်းကိရိယာတွေအပါအဝင် ပစ်မှတ်ထားတဲ့ ကုန်စည်တင်ပို့မှု တားမြစ်ချက် ထုတ်ပြန်အပြီး နောက်နေ့မှာ ခုလို ကြေညာတာလည်း ဖြစ်ပါတယ်။
ပေကျင်းမှာ ရက်ပေါင်း ၁,၀၀၀ ကျော် အဖမ်းခံထားရတဲ့ ကနေဒါနိုင်ငံသား နှစ်ဦးဟာ တရုတ်လေပိုင်နက်မှထွက်ခွာလာပြီး ကနေဒါနိုင်ငံကို စနေနေ့အစောပိုင်းမှာ ပြန်ရောက်လာ လိမ့်မယ်လို့ ဝန်ကြီးချုပ်ဂျက်စတင်ထရူးဒိုးက စက်တင်ဘာ ၂၄ ရက်က သတင်းထောက်တွေကို ပြောကြားခဲ့ပါတယ်။
လွန်ခဲ့တဲ့ ၁၂ မိနစ်လောက်က Michael Kovrig နဲ့ Michael Spavor တို့ တရုတ်လေပိုင်နက်မှ ထွက်ခွာသွားပြီး သူတို့အိမ်ပြန်လာနေကြပြီလို့ ထရူးဒိုးက ပြောသွားတာပါ။
ဒီလူနှစ်ယောက်ဟာ မယုံကြည်နိုင်စရာ ခက်ခဲတဲ့ဒုက္ခကို ကျော်ဖြတ်ခဲ့ပြီး လွန်ခဲ့တဲ့ ရက် ၁,၀၀၀ လောက်မှာ သူတို့ဟာ ခွန်အား၊ ဇွဲ၊ ခံနိုင်ရည်နဲ့ကျေးဇူးတရားတို့ကို ပြသခဲ့တယ်လို့လည်း ဝန်ကြီးချုပ်ထရူးဒိုးက ပြောပါတယ်။
၂၀၁၈ ဒီဇင်ဘာလတုန်းက ဟွာဝေးနည်းပညာကုမ္ပဏီလိမိတက်ရဲ့ ဘဏ္ဍာရေးအရာရှိချုပ် မုံဝမ်ကျိုကို အမေရိကန် ဖမ်းဝရမ်းနဲ့ ဗန်ကူဗာလေဆိပ်မှာ ကနေဒါရဲတပ်ဖွဲ့က ဖမ်းဆီးလိုက်ပြီး သိပ်မကြာခင်မှာပဲ ကနေဒါနိုင်ငံသားနှစ်ဦးဖြစ်တဲ့ စီးပွားရေးလုပ်ငန်းရှင် Michael Spavor နဲ့ သံတမန်ဟောင်း Michael Kovrig တို့ တရုတ်နိုင်ငံမှာ ဖမ်းဆီးခံလိုက်ရတာပါ။
ဩဂုတ်လတုန်းက Spavor ကို သူလျှိုလုပ်မှုအတွက် တရုတ်တရားရုံးတစ်ခုက ထောင်ဒဏ် ၁၁ နှစ် ချမှတ်ခဲ့ပါတယ်။
ပေကျင်းကတော့ မုံဝမ်ကျူအမှုနဲ့ ကနေဒါနိုင်ငံသား ၂ ယောက်ရဲ့အမှုဟာ ဆက်စပ်မှု မရှိကြောင်း အခိုင်အမာ ပြောဆိုထားပေမယ့် ထရူးဒိုးရဲ့ လစ်ဘရယ်အစိုးရကတော့ တရုတ်ဟာ ဓားစာခံအသုံးချ သံတမန်ရေးမှာ ပါဝင်ပတ်သက်ခဲ့တယ်လို့ စွပ်စွဲလိုက်ပါတယ်။
ဝန်ကြီးချုပ် ထရူးဒိုး စကားမပြောခင်လေးမှာပဲ ကနေဒါမီဒီယာတွေကနေ ဟွာဝေဘဏ္ဍာရေး အရာရှိချုပ် မုံဝမ်ကျိုဟာ အမေရိကန်အာဏာပိုင်တွေနဲ့ သဘောတူညီမှုရပြီးနောက် တရုတ်ကို ပြန်သွားပြီလို့ ဖော်ပြကြပါတယ်။
