ကနေဒါနိုင်ငံ ကွီဘက်မြို့ရှိ စိန့်လောရန့်မြစ်ရဲ့ ရွှံ့နွံဧရိယာမှာ မတ် ၃၀ ရက်က ရဲတွေ ဆယ်ယူရရှိခဲ့တဲ့ ရုပ်အလောင်း ၆ ခုဟာ အမေရိကန်နိုင်ငံထဲကို တိတ်တဆိတ်ဝင်ရောက်ဖို့ ကြိုးပမ်းနေတဲ့ မိသားစု ၂ စုကနေ လာတာဖြစ်ပြီး မွေးကင်းစကလေးတယောက် ပျောက်ဆုံးနေဆဲ ဖြစ်ကြောင်း ရဲတပ်ဖွဲ့က မတ် ၃၁ ရက်မှာ ပြောကြားပါတယ်။

အဲဒီမိသားစု ၂ စုမှာ တစုက ရိုမေးနီးယားနွယ်ဖွားဖြစ်ပြီး ကျန်တစုက အိန္ဒိယနိုင်ငံသားတွေလို့ ယူဆရကြောင်း အက်ကွယ်ဆက်စ်နီ  ရဲဌာနက လက်ထောက်ရဲချုပ် လီအန် အို ဘရိုင်ယန်က သတင်းစာရှင်းလင်းပွဲမှာ ပြောကြားခဲ့ပါတယ်။ 

သေဆုံးသူ ၆ ဦးဟာ အရွယ်ရောက်ပြီးသူ ၅ ဦးနဲ့ အသက် ၃ နှစ်အောက် ကလေးတဦး ဖြစ်ပါတယ်။ 

သေဆုံးတဲ့ ကလေးနဲ့ ပျောက်ဆုံးနေတဲ့ မွေးကင်းစ ကလေး ၂ ဦးစလုံးဟာ ရိုမေးနီးယား မိသားစုနဲ့ ဆက်စပ်နေပြီး ကနေဒါနိုင်ငံကူးလက်မှတ်တွေ ပါရှိကြောင်း အို ဘရိုင်ယန်က ပြောပါတယ်။

သေဆုံးရခြင်း အကြောင်းရင်းကို ဆုံးဖြတ်ဖို့ ရဲတပ်ဖွဲ့ဟာ မွန်ထရီရယ်မြို့မှ ရင်ခွဲစစ်ဆေးမှုနဲ့ အဆိပ်ဗေဒ စစ်ဆေးမှု ရလဒ်တွေကို စောင့်ဆိုင်းနေပါတယ်။ 

အမေရိကန်သမ္မတ ဂျိုးဘိုင်ဒင် နဲ့ ကနေဒါဝန်ကြီးချုပ် ဂျပ်စ်တင် ထရူးဒိုး တို့ဟာ တရားမ၀င် နယ်စပ်ဖြတ်ကျော်မှုတွေကနေ ကနေဒါနိုင်ငံကို လာရောက်ကြတဲ့ ခိုလှုံခွင့်တောင်းခံသူတွေကို ရပ်တန့်ဖို့ ပြီးခဲ့တဲ့ အပတ်ကမှ သဘောတူခဲ့ကြပါတယ်။ 

ဒါပေမယ့် မိသားစုတွေက ကနေဒါကို မလာဘဲ အမေရိကန်ကို သွားချင်ကြတာကြောင့် ကွီဘက်မြို့ရှိ ရော့ခ်ဆံမ် လမ်း အပါအဝင် တရားဝင်မဟုတ်တဲ့ နယ်စပ်ဝင်ပေါက်တွေ အားလုံးကို ပိတ်တဲ့ သဘောတူညီချက်ဟာ ဒီနေရာမှာ ဒီလို မဖြစ်သွားသင့်ဘူးလို့ အက်ကွယ်ဆက်စ်နီ ရဲတပ်ဖွဲ့က ပြောပါတယ်။ 

နှစ်စပိုင်းကတည်းက အက်ကွယ်ဆက်စ်နီနယ်မြေကို အသုံးပြုပြီး အမေရိကန်ကို လျှို့ဝှက် ဝင်ရောက်ဖို့ ကြိုးစားကြတဲ့သူတွေ တိုးလာပြီးတော့ ဖြစ်ရပ် ၄၈ ခုကို မှတ်တမ်းတင်ထားပြီး ကြောင်း၊ အများစုမှာ အင်ဒီးယန်း သို့မဟုတ် ရိုမေးနီးယားတွေဖြစ်ကြောင်း အို ဘရိုင်ယန် က ပြောပါတယ်။ 

မြန်မာ့နွေဦးတော်လှန်ရေးမှာ ရှေ့တန်းကနေ ပါဝင်နေကြတဲ့ ဒေါနတော်လှန်ရေးရဲဘော်တွေ ရိုက်ကူးတဲ့ “ဖိုးမောင် ပြန်လာပြီ” ရုပ်ရှင်ပြပွဲနဲ့ ရန်ပုံငွေဈေးရောင်းပွဲကို ကနေဒါနိုင်ငံ၊ ဗန်ကူးဗားမြို့၊ ဆာရေးရှိ Gateway မြန်မာခရစ်ယာန်ဘုရားကျောင်းမှာ ဒေသစံတော်ချိန် ဇန်နဝါရီ ၁၄ ရက်က ကျင်းပပါတယ်။

ဒီရုပ်ရှင်ပြပွဲကို   ရုပ်ရှင်လက်မှတ်တစောင်လျှင် ကနေဒါဒေါ်လာ ၁၂ ဒေါ်လာနှုန်းနဲ့ ပွဲစဉ် ၂ ပွဲခွဲပြီး ပြသရာမှာ ရာနဲ့ချီတဲ့ ကနေဒါရောက် မြန်မာပြည်သားတိုင်းရင်းသားတွေ လာရောက် အားပေးကြည့်ရှုခဲ့ ကြပါတယ်။

ဒီပြပွဲမှာ မြန်မာပြည်တွင်း တော်လှန်ရေးနယ်မြေတွေအသီးသီးမှာ တိုက်ပွဲဝင်နေကြတဲ့ တော်လှန်ရေးရဲဘော်တွေကလည်း  ဗီဒီယိုရုပ်သံတွေပေးပို့ကာ စစ်မြေပြင်တိုက်ပွဲတွေ အခြေအနေကို သတင်းစကားပါးခဲ့သလို  တော်လှန်ရေးအောင်မြင်ဖို့ ပါဝင်ကူညီပေးကြဖို့ အသီးသီးတိုက်တွန်းပြောကြားခဲ့ပါတယ်။

ဒီပွဲကနေရတဲ့ ရုပ်ရှင်လက်မှတ်ရောင်းရငွေတွေကိုတော့ ရုပ်ရှင်အဖွဲ့ထံလှူဒါန်းသွားမှာဖြစ်ပြီး  မြန်မာရိုးရာအစားအစာတွေ ရောင်းချလို့ရတဲ့ အလှူငွေတွေကိုတော့ မြန်မာပြည်တွင်း လိုအပ်တဲ့ လူသားခြင်းစာနာအကူအညီအတွက် ပေးပို့သွားမယ်လို့ ပွဲစီစဉ်သူတွေထံက သိရပါတယ်။

ဒီရုပ်ရှင်ကားကတော့ မြန်မာစာပေလောကမှာ ထင်ရှားတဲ့ စာရေးဆရာကြီးမင်းသုဝဏ်ရဲ့ "ဖိုးမောင် လာပြီ" ဆိုတဲ့ ကဗျာကိုကျောရိုးယူပြီးတော့ တော်လှန်ရေးမှာ ကျဆုံးခဲ့တဲ့ ရဲဘော်လေးတယောက်ကို ဇာတ်ကောင်ထားလို့ ရိုက်ကူးထားခဲ့တာပါ။

ဇာတ်ညွှန်းနဲ့ ဒါရိုက်တာအဖြစ် တပ်စုမှူး တိုက်မောင်းက တာဝန်ယူရိုက်ကူးထားတာဖြစ်ပြီး ဒေါနစစ်ကြောင်းထဲမှာရှိတဲ့ ရဲဘော်တွေရော၊ တော်လှန်ရေးနယ်မြေထဲက ရဲဘော်တွေပါ စုပေါင်းသရုပ်ဆောင် ဖန်တီးထားကြပါတယ်။

တော်လှန်ရေးအတွက် ရန်ပုံငွေ ရရှိနိုင်ဖို့ ဖန်တီးတင်ဆက်လိုက်တဲ့ ဒီရုပ်ရှင်ကို ကနေဒါအပြင် တခြားနိုင်ငံတွေမှာလည်းပြသနေပြီး  လက်မှတ် တစောင်ကို စင်ကာပူဒေါ်လာ ၁၂ ဒေါ်လာ၊ အမေရိကန်ဒေါ်လာ ၁၀၊ ထိုင်းဘတ် ၃၀၀ စသဖြင့် နိုင်ငံအလိုက် သတ်မှတ်ထားပြီးတော့ သက်ဆိုင်ရာ နိုင်ငံတွေအလိုက် Fundraiser တွေကတဆင့် ဝယ်ယူနိုင်မှာ ဖြစ်ပါတယ်။

မြန်မာနိုင်ငံကပရိတ်သတ်တွေအတွက်လည်း ရုပ်ရှင်လက်မှတ်တစောင်ကို မြန်မာငွေကျပ် ၂ သောင်းနှုန်းနဲ့ ကြည့်ရှုနိုင်ဖို့ ဖိတ်ခေါ် ထားပါတယ်။