ရုရှားနိုင်ငံ၊ စိန့်ပီတာစဘတ်မြို့က ကဖေးဆိုင်အတွင်း ဧပြီ ၂ ရက်က ပေါက်ကွဲမှုကြောင့် ထင်ရှားတဲ့ ရုရှားစစ်ရေးဘလော့ဂါ ဗလာဒလန်တာတာစကီ သေဆုံးခဲ့တယ်လို့ ရုရှား သတင်းဌာနတွေက ထုတ်ပြန်ပါတယ်။

ဒီပေါက်ကွဲမှုဟာ ဖောက်ခွဲရေးပစ္စည်းတခုကြောင့် ဖြစ်ရတာလို့လည်း သတင်းရင်းမြစ်တွေကို ကိုးကားဖော်ပြပါတယ်။

ယူကရိန်းမှာ ရုရှားအတွက် စစ်တိုက်ပေးနေတဲ့ ကြေးစားစစ်တပ် ဝဂ္ဂနာအုပ်စုကို ပိုင်ဆိုင်သူ ပရီဂေါ့ရှင်ပိုင်တဲ့ ကဖေးဆိုင်မှာ ပေါက်ကွဲတာလို့ စိန့်ပီတာစဘတ်မြို့ခံ အင်တာနက် စာမျက်နှာတခုက ရေးပါတယ်။

ဘလော့ဂါ တာတာစကီရဲ့ နာမည်အရင်းက မက်ဆင်မ်ဖိုမင်ဖြစ်ပြီး တယ်လီဂရမ် ကွန်ရက်ပေါ်မှာ နောက်လိုက် ၅၆၀,၀၀၀ ကျော် ရှိသူပါ။ သူဟာ ယူကရိန်းနိုင်ငံအတွင်း ရုရှားစစ်ပွဲနဲ့ ပတ်သက်လို့ မကြာခဏ ဝေဖန်ပြောဆိုတဲ့ ဩဇာကြီးတဲ့ စစ်ရေးဘလော့ဂါတွေထဲမှာ အထင်ရှားဆုံးသူလည်း ဖြစ်ပါတယ်။

ယူကရိန်းနိုင်ငံအတွင်း ဒေသလေးခုကို ရုရှားက သိမ်းယူကြောင်း ကြေညာတဲ့ စက်တင်ဘာ အခမ်းအနားကိုတက်ခွင့်ရ လူရာချီထဲမှာ တဦးအပါအဝင်ဖြစ်ပြီး ဒီလုပ်ရပ်ကို တရားမဝင်ဘူးလို့ နိုင်ငံအများစုက ကုလသမဂ္ဂမှာ ပြောဆိုရှုတ်ချခဲ့ပါတယ်။

ပေါက်ကွဲမှုကြောင့် တခြားလူ ၆ ယောက်လည်း ဒဏ်ရာရတယ်လို့ RIA သတင်းဌာနက ပြောပါတယ်။ ဘယ်သူ့မှာ တာဝန်ရှိတယ်ဆိုတဲ့ ညွှန်ပြချက်တစုံတရာလည်း မရှိသေးပါဘူး။

တာတာစကီကို တမင်ပစ်မှတ်ထားတာ ဖြစ်ခဲ့ရင် ဒါဟာ ယူကရိန်းစစ်ပွဲနဲ့ ပတ်သက်လို့ ရုရှားမြေပေါ်မှာ အထင်ကရ ဒုတိယမြောက်လုပ်ကြံမှု ဖြစ်လာမယ်လို့ ရိုက်တာသတင်းဌာနက ကြေညာပါတယ်။

မော်စကိုမြို့တော်နားမှာ ဩဂုတ်လတုန်းက အစွန်းရောက် အမျိုးသားရေးဝါဒီတဦးရဲ့ သမီးဖြစ်သူ ဒါယာ ဒူဂျီနာ ကားဗုံးခွဲခံရအပြီး သေဆုံးမှုကို ယူကရိန်းသူလျှိုတွေက လုပ်တာလို့ ရုရှားရဲ့ ပြည်ထောင်စုလုံခြုံရေးဌာနက စွပ်စွဲခဲ့ပါတယ်။ ယူကရိန်းအစိုးရကတော့ ပတ်သက်မှုကို ငြင်းခဲ့ပါတယ်။

ရုရှရဲ့ဝဂ္ဂနာ ကြေးစားစစ်တပ် အကြီးအကဲ ယက်ဗ်ဂျေညီ ပရီဂေါ့ရှင်ကတော့ သူ့တပ်တွေဟာ ယူကရိန်းနိုင်ငံအတွင်း ဘတ်ခ်မွတ်မြို့ရဲ့ အုပ်ချုပ်ရေးအဆောက်အဦအပေါ်မှာ ရုရှားအလံကို လွှင့်ထူပြီးပြီလို့ ဧပြီလ ၂ ရက် နှောင်းပိုင်းမှာ ပြောလိုက်ပါတယ်။ 

တရားဝင်ရှုထောင့်ကနေ ပြောရရင် ဘတ်ခ်မွတ်မြို့ကို သိမ်းပြီးပြီလို့ ပရီဂေါ့ရှင်က သူ့ရဲ့ တယ်လီဂရမ် အကောင့်ကနေ တင်လာတဲ့ ရုပ်သံထဲမှာ ပြောခဲ့ပါတယ်။

အလံရဲ့ အောက်မှာ ဗလာဒလန် တာတာစကီအတွက် ကောင်းမွန်တဲ့ အမှတ်တရဆိုတဲ့ စာသားကို ရေးထားတယ်လို့လဲ ပရီဂေါ့ရှင်က ပြောခဲ့ပါသေးတယ်။