ပြီးခဲ့တဲ့နှစ် မတ်လ ၃ ရက်နေ့က မုံရွာမြို့၊ ဘုရားနီလမ်း (အာဇာနည်လမ်း)မှာ စစ်ကောင်စီရဲ့ ပစ်ခတ်မှုကြောင့် ကဗျာဆရာကေဇဝင်း အပါအဝင် ကျဆုံးခဲ့သူ ၉ ဦးရဲ့ ဂူဗိမာန် အုတ်ဂူတွေကို စစ်ကောင်စီက လာရောက်ဖြိုဖျက်သွားတယ်လို့ ဒေသခံတွေက ပြောပါတယ်။ 

ဆားကျင်းသုသာန်မှာရှိတဲ့ ဂူဗိမာန်တွေကို မတ်လ ၅ ရက်နေ့ နေ့လယ်ပိုင်းက လာရောက် ဖြိုဖျက်ခဲ့ကြတာဖြစ်ပြီး ပြန်လည်ထွက်ခွာတဲ့အချိန်မှာ သေနတ်တွေပါ ပစ်ဖောက်သွားတယ်လို့ ဆိုပါတယ်။   

အခုလို ဆောင်ရွက်ခဲ့တာနဲ့ ပတ်သက်လို့ သမိုင်းဝင်အာဇာနည်တွေကို သမိုင်းကနေ ပျောက်ကွယ်အောင် လုပ်နေတဲ့လုပ်ရပ်သာဖြစ်ပြီး ပြည်သူတွေအနေနဲ့ သွေးမအေးဖို့နဲ့ စစ်ကောင်စီကို အမြစ်ဖြတ်ပြီး ဆက်လက်တော်လှန်ပေးဖို့ကို မုံရွာတက္ကသိုလ်ကျောင်းသားများ သမဂ္ဂက ထုတ်ပြန်ထားပါတယ်။ 

စစ်အာဏာရှင်​တော်လှန်​ရေး ၇၅ ရက်​မြောက်​နေ့အဖြစ် စစ်ကိုင်းတိုင်း ယင်းမာပင်မြို့နယ်နဲ့ ဆားလင်းကြီးမြို့နယ်တို့က ​ကျေးလက်​နေပြည်သူ​တွေ စု​ပေါင်းသပိတ်ကို ​မေလ ၂၄ ရက်​​နေ့က ဆက်လက်ပြုလုပ်ခဲ့ကြပါတယ်။

ဆန္ဒပြပွဲမှာ စစ်အာဏာရှင်ဆန့်ကျင်​ရေးနဲ့ စစ်ကျွန်ပညာ​​ရေး အလိုမရှိ​ကြောင်း စတဲ့​ကြွေး​ကြော်သံ​​တွေနဲ့အတူ ဒီမိုက​ရေစီ ​တောင်းဆိုရင်း အကြမ်းဖက်စစ်​ကောင်စီရဲ့လက်ချက်နဲ့ ကျဆုံးခဲ့ရတဲ့ ကဗျာဆရာ ​ကေဇဝင်းရဲ့ ၃၉ နှစ်​မြောက် အမှတ်တရ​မွေး​နေ့ဆု​တောင်းပွဲကိုပါ ပြုလုပ်ခဲ့ကြတာပါ။

ကဗျာဆရာ ​ကေဇဝင်းဟာ မတ်လ ၃ ရက်​နေ့က မုံရွာမြို့ဆန္ဒပြပွဲမှာ အကြမ်းဖက်စစ်​ကောင်စီရဲ့ အကြမ်းဖက် ပစ်ခတ်သတ်ဖြတ်မှုကြောင့် ကျဆုံးခဲ့တာဖြစ်ပါတယ်။

​ဆန္ဒပြပွဲကို လမ်း​လျှောက်သပိတ်နဲ့  ထိုင်သပိတ်တို့အပြင် ကဗျာဆရာ ​ကေဇဝင်းရဲ့ အမှတ်တရ ကဗျာ​တွေကိုလည်း ရွတ်ဖတ်ဂုဏ်ပြုခဲ့ကြပါတယ်။