ကမာရွတ်မီဒီယာပူးတွဲတည်ထောင်သူ အယ်ဒီတာချုပ် ဦးဟံသာညိန်းကို အီလက်ထရောနစ် ဥပဒေ ပုဒ်မ ၃၃ (က) နဲ့ စစ်ကောင်စီရဲ့ အင်းစိန်ထောင်တွင်းအထူးတရားရုံးကနေ ဒီဇင်ဘာ ၂၆ ရက်မှာ  ထောင်ဒဏ်  ၅ နှစ်ထပ်မံချလိုက်တယ်လို့ သူ့ရဲ့ မိသားစုနဲ့ ရှေ့နေဆီကနေ သိရပါတယ်။

ဦးဟံသာညိန်းကို ပြီးခဲ့တဲ့ မတ်လ ၂၁ ရက်က ရာဇသတ်ကြီး ဥပဒေ ပုဒ်မ - ၅၀၅ (က) အတွက် အလုပ်ကြမ်းနဲ့ ထောင်ဒဏ် ၂ နှစ် ချမှတ်ခဲ့ပြီး ဒီနေ့မှာ နောက်ထပ်ထောင်ဒဏ် ၅ နှစ် အပြီးသတ်အမိန့်ချမှတ်ခဲ့တာကြောင့် စုစုပေါင်း ထောင်ဒဏ် ၇ နှစ်အထိ ချမှတ်ခံထားရတာဖြစ်ပါတယ်။

ဦးဟံသာညိန်းရဲ့ မိသားစုဝင်တယောက်က  “ကျမတို့မိသားစုလည်း ကျမတို့အစ်ကိုနဲ့အတူတူ ရဲရဲရင့်ရင့် ရင်ဆိုင်ဖြတ်သန်းနေကြပါတယ်။ မျှော်လင့်ထားပြီးသား ကိစ္စကြီးလည်း ဖြစ်တယ်။ တွက်ဆထားပြီးသားဖြစ်တဲ့အတွက်တော့ ထောင်ချခံရတဲ့ အစ်ကိုရော ကျမတို့ မိသားစုတွေရော ရင်ဆိုင်ဖြတ်သန်းကြပါမယ်” လို့ ပြောပါတယ်။

မနေ့က ဒီဇင်ဘာ ၂၅ ရက် ခရစ္စမတ်နေ့မှာ အသက် ၄၁ နှစ်ပြည့်သွားတဲ့ အယ်ဒီတာချုပ် ဦးဟံသာညိန်းဟာ သူ့ရဲ့ မွေးနေ့ကို အကျဉ်းထောင်ထဲမှာပဲ ဖြတ်သန်းခဲ့ရတာ ၂ နှစ်ရှိလာပါပြီ။

ရန်ကုန်အခြေစိုက် အွန်လိုင်းမီဒီယာတခုဖြစ်တဲ့ ကမာရွတ်မီဒီယာရုံးကို ၂ဝ၂၁ ခုနှစ်၊ မတ်လဆန်းပိုင်းက အာဏာသိမ်းစစ်ကောင်စီတပ်ဖွဲ့ဝင်တွေ ဝင်ရောက်စီးနင်းချိန် ကမာရွတ်မီဒီယာတည်ထောင်သူ ဦးနေသန်‌မောင်နဲ့အတူ ပူးတွဲတည်ထောင်သူ အယ်ဒီတာချုပ် ဦးဟံသာညိန်းလည်း  ဖမ်းဆီးခံလိုက်ရတာပါ။

စစ်ကောင်စီဘက်က အမေရိကန်နိုင်ငံသားခံယူထားသူ ဦးနေသန်မောင်ကို စွဲဆိုထားတဲ့အမှုကို ပြန်ရုပ်သိမ်းပြီး အမေရိကန်နိုင်ငံကို ပြန်ပို့ခဲ့ပါတယ်၊ သူတို့နှစ်ဦးဟာ စစ်ကြောရေးမှာ စစ်ကောင်စီတပ်ဖွဲ့ဝင်တွေရဲ့ လူမဆန်တဲ့ ညှဉ်းပန်းနှိပ်စက်မှုကို ရင်ဆိုင်ခဲ့ရကြောင်း ပြန်လွတ်လာတဲ့ ဦးနေသန်မောင်က မီဒီယာတွေကို ဖြေဆိုခဲ့ပါတယ်။

နယ်စည်းမခြား သတင်းထောက်များအဖွဲ့ RSF ရဲ့အကြိမ် ၃ဝ မြောက် နှစ်ပတ်လည်စာနယ်ဇင်းလွတ်လပ်ခွင့်ဆုအတွက် ကမ္ဘာတစ်ဝန်းက အဆိုပြုခံရသူ သတင်းထောက် ၁၅ ဦးနဲ့ သတင်းမီဒီယာတွေစာရင်းကို RSF က နိုဝင်ဘာလ ၁၄ ရက်နေ့က ထုတ်ပြန်ခဲ့ရာမှာ ဦးဟံသာညိန်းလည်း ပါဝင်ခဲ့ပါတယ်။

ဦးဟံသာညိန်းဟာ RSF ရဲ့သူရသတ္တိဆု ဆန်ခါတင်စာရင်းမှာ ပါဝင်ခဲ့တာဖြစ်ပြီး အကျင့်ပျက် ခြစားမှု၊ ဖိနှိပ်တဲ့အစိုးရတွေကို ထိန်းချုပ်ရေးအားထုတ်မှုတွေအတွက် အဆိုပြုခံခဲ့ရတာ ဖြစ်တယ်လို့လည်း RSF က ဖော်ပြပါတယ်။

သတင်းသမားတွေကို ဖမ်းဆီးထောင်ချမှုအဆိုးဝါးဆုံး ကမ္ဘာ့နိုင်ငံတွေအထဲ မြန်မာနိုင်ငံဟာ ထိပ်သီးနိုင်ငံတခု ဖြစ်လာပြီး အာဏာသိမ်းပြီးချိန်ကနေ လက်ရှိအချိန်အထိ ဖမ်းဆီးခံရတဲ့ သတင်းသမား ၁၅၄ ယောက်ရှိပါတယ်။

အကြမ်းဖက်စစ်ကောင်စီက ဖမ်းဆီးအကျဉ်းချထားတဲ့ မြန်မာသတင်းသမား ကိုဟန်သာငြိမ်းဟာ ပြင်သစ်အခြေစိုက် နယ်စည်းမခြား သတင်းထောက်များအဖွဲ့ RSF က နှစ်စဉ် ရွေးချယ်ချီးမြှင့်တဲ့ သတင်း လွတ်လပ်ခွင့်ဆု ဆန်ခါတင်စာရင်းမှာ ပါဝင်နေပါတယ်။

RSF က နှစ်စဉ် ရွေးချယ်ချီးမြှင့်တဲ့ ဒီဆုမှာတော့ ဆုအမျိုးအစားတွေအနေနဲ့ စာနယ်ဇင်းသမားတွေရဲ့ ရဲဝံ့စွန့်စားမှု၊ နောက်ဆက်တွဲ အကျိုးသက်ရောက်မှုနဲ့ လွတ်လပ်စွာ ရပ်တည်မှု စတဲ့ ခေါင်းစဉ် ၃ ခုအောက်မှာ ရွေးချယ်ချီးမြှင့်တာဖြစ်ပြီး အခုနှစ်မှာတော့ ကမ္ဘာတဝန်းက သတင်းသမား ၁၅ ဦးနဲ့ မီဒီယာအဖွဲ့အစည်းတွေကို ဆန်ခါတင် ရွေးချယ်ထားကာ ဒီစာရင်းမှာ ကိုဟန်သာငြိမ်းလည်း ပါဝင်နေတာပါ။

ကိုဟန်သာငြိမ်းဟာ အကျင့်ပျက်ခြစားမှုတွေနဲ့ ဖိနှိပ်တဲ့ အစိုးရကို တာဝန်ယူ တာဝန်ခံမှုရှိစေရေး ကြိုးပမ်းအားထုတ်မှုတွေအတွက် ဒီစာရင်းမှာ ပါဝင်လာတာဖြစ်တယ်လို့ RSF ထုတ်ပြန်ချက်မှာ ဖော်ပြပါတယ်။

ကမာရွတ်မီဒီယာ ပူးတွဲတည်ထောင်သူ ကိုဟန်သာငြိမ်းဟာ ပြီးခဲ့တဲ့ ၂၀၂၁ ခုနှစ်၊ မတ် ၉ ရက်မှာ ကိုနေသန်မောင်နဲ့အတူ ဖမ်းဆီးခံခဲ့ရတာဖြစ်ပြီး စစ်ကောင်စီရဲ့ လက်နက်ကိုင်တပ်ဖွဲ့ဝင်တွေ ကမာရွတ်မီဒီယာရုံးကို ဝင်ရောက်စီးနင်းပြီး ရုံးမှာရှိနေတဲ့ သူတို့နှစ်ယောက်ကို ဖမ်းဆီး ခေါ်ဆောင်သွားခဲ့တာ ဖြစ်ပါတယ်။

အမေရိကန်နိုင်ငံသားဖြစ်တဲ့ ကိုနေသန်မောင်ကိုတော့ ဇွန် ၁၄ ရက်နေ့မှာပဲ စစ်ကောင်စီက စွဲချက်တွေ ပြန်ရုပ်သိမ်းခဲ့ပြီး လွှတ်ပေးခဲ့တာဖြစ်ပြီး ကိုဟန်သာငြိမ်းကတော့ အင်းစိန်အကျဉ်းထောင်ထဲမှာ ခုချိန်တိုင် ဖမ်းဆီးခံထားရဆဲဖြစ်ကာ အလွန်အမင်း အကြမ်းဖက်မှုတွေ၊ ညှဉ်းပန်းနှိပ်စက်မှုတွေ၊ ခန္ဓာကိုယ်အနှံ့ မီးလောင်ဒဏ်ရာတွေ၊ မုဒိမ်းမှု ခြိမ်းခြောက်ခံရမှုတွေနဲ့အတူ အသက်အန္တရာယ်အထိ ခြိမ်းခြောက်ခံနေရတယ်လို့ ဆိုပါတယ်။

မြန်မာနိုင်ငံမှာ စစ်တပ်အာဏာသိမ်းပြီးနောက် သတင်းလွတ်လပ်ခွင့် ဆိတ်သုဉ်းသွားပြီး သတင်းမှန် ရေးသားထုတ်လွှင့်နေတဲ့ မီဒီယာတိုက်တွေရဲ့ သတင်းထောက်တွေကို စစ်ကောင်စီက အဓိကပစ်မှတ်ထား ဖမ်းဆီးလာတာကြောင့် သတင်းထောက်တွေ သတင်းယူဖို့ ပိုမိုခက်ခဲလာနေပါတယ်။

စစ်အာဏာသိမ်းပြီးတဲ့နောက် ဖမ်းဆီးသတ်ဖြတ်ခံရတဲ့ သတင်းသမား ၄ ယောက်နဲ့ အာဏာမသိမ်းခင်က သတ်ဖြတ်ခံရတဲ့ သတင်းသမား ၅ ယောက် စုစုပေါင်း ၉ ယောက် ရှိနေပြီး  ကျူးလွန်သူတွေ ပြစ်ဒဏ်မှ ကင်းလွတ်နေတယ်လို့  FEM အဖွဲ့နဲ့  ရန်ကုန်အခြေစိုက် သံရုံးတွေက ထုတ်ပြန်ထားပါတယ်။

ပြင်သစ်အခြေစိုက် နယ်စည်းမခြား သတင်းထောက်များအဖွဲ့ RSF ကတော့ ကမ္ဘာတဝန်း ဂျာနယ်လစ်တွေပေါ် ခြိမ်းခြောက်မှုတွေဟာ လတ်တလောနှစ်တွေမှာ ပိုပြီးအမျိုးအစား စုံလာတယ်လို့ သတိပေးထားပြီး ၂၀၂၂ ခုနှစ်အတွက် သတင်းလွတ်လပ်ခွင့် အညွှန်းကိန်းမှာတော့ မြန်မာနိုင်ငံဟာ နိုင်ငံပေါင်း ၁၈၀ ထဲ အဆင့် ၁၇၆ နေရာမှာ ရှိနေတာ ဖြစ်ပါတယ်။