ရန်ကုန်တိုင်း၊ ကမာရွတ်မြို့နယ်၊ အမှတ် ၄ ရပ်ကွက်၊ ဘုရင့်နောင်လမ်းမကြီး အင်းဝဘဏ်ရှေ့မှာ ဧပြီ ၂၇ ရက် ည ၇ နာရီလောက်က အငှားယာဉ်မောင်းတဦး ဓားထိုးခံရပြီး သေဆုံးခဲ့တယ်လို့ ဒေသခံတွေက ပြောပါတယ်။
ကားငှားတဲ့ပုံစံနဲ့ လူ ၃ ယောက်က ကားကိုရပ်ခိုင်းပြီး ကားရပ်ပေးတဲ့အချိန် အငှားယာဉ်မောင်းဆီကနေ လုယက်ခဲ့တာလို့ ပြောပါတယ်။
“ကားငှားသလိုနဲ့ လူ ၃ ယောက်က ကားကိုတားတာ။ ကားရပ်တဲ့အချိန် ယာဉ်မောင်းကို ဓားထောက်ပြီး ပိုက်ဆံအိတ်၊ ဖုန်းတွေကို ဝင်လုလို့ အငှားယာဉ်မောင်းက ပြန်ခုခံတဲ့အတွက် လုယက်သူတွေက ဓားနဲ့ အချက်ပေါင်းများစွာထိုးပြီး ထွက်ပြေးသွားကြတာ” လို့ ဒေသခံတွေက ပြောပါတယ်။
ဓားထိုးခံရတဲ့ အငှားယာဉ်မောင်းကို နီးစပ်ရာ လူမှုကူညီရေးအသင်းကားနဲ့ ဆေးရုံကို ပို့ဆောင်ပေးခဲ့ရာ လမ်းမှာတင် သေဆုံးခဲ့တယ်လို့ ဒေသခံ လူမှုကူညီရေးအသင်းဆီက သိရပါတယ်။
အခင်းဖြစ်ပွားခဲ့တဲ့နေရာကို ည ၁၀ နာရီလောက်မှာ စစ်ကောင်စီတပ်နဲ့ လုံခြုံရေး လှည့်ကင်းအဖွဲ့တွေ ရောက်ရှိလာပြီး ဗဟိုလမ်း အောက်ပိုင်းမှာရှိတဲ့ လက်ဘက်ရည်ဆိုင်တွေ အပါအဝင် တခြား မသင်္ကာတဲ့ဆိုင်တွေကို စစ်ဆေးမေးမြန်းတာတွေ လုပ်ဆောင်သွားတယ်လို့ အနီးအနားမှာ နေထိုင်သူတွေက ပြောပါတယ်။
ကမာရွတ်မြို့နယ်အတွင်း ရပ်ကွက်တိုက်ခန်းနဲ့ လမ်းတွေပေါ်မှာ ခိုးဆိုးလုယက်မှုတွေ ပိုမိုများပြားလာပြီး စစ်ကောင်စီလက်အောက်ခံ မြို့နယ်ရဲတပ်ဖွဲ့က ပြစ်မှုကျူးလွန်သူတွေကို မဖမ်းဆီးနိုင်တဲ့အတွက် တရားဥပဒေစိုးမိုးမှု မရှိတော့တဲ့အပြင် ပြည်သူတွေအနေနဲ့ လုံခြုံမှုမရှိတော့ဘူးလို့ ရပ်ကွက်နေပြည်သူတွေဆီက သိရပါတယ်။
ရန်ကုန်မြို့၊ ကမာရွတ်မြို့နယ် အမှတ် ၁ ရပ်ကွက် ဗဟိုလမ်းမှာဖွင့်လှစ်ထားတဲ့ TT Diamond စိန်ဆိုင်မှာ နိုဝင်ဘာ ၂၄ ရက် နေ့လယ် ၁ နာရီလောက်က ဒုတိယအကြိမ် ဓားပြတိုက်ခံရပြီး ဆိုင်လုံခြုံရေးဝန်ထမ်းနှစ်ဦး ဒဏ်ရာရသွားတယ်လို့ ဆိုင်နဲ့နီးစပ်သူတဦးက ပြောပါတယ်။
“ဒီကနေ့ နေ့လယ် ၁ နာရီလောက်က ဖြစ်တာပါ။ ဆိုင်ထဲဝင်ဖို့လုပ်တာ ဆိုင်လုံခြုံရေးဝန်ထမ်းတွေက တားတဲ့အချိန်မှာ သေနတ်နဲ့ပစ်သွားတယ်။ လုံခြုံရေးနှစ်ဦး ဒဏ်ရာရသွားတယ်။”
အမည်မသိ လူသုံးဦးက အိမ်စီးကားပေါ်ကနေ ဆင်းလာပြီး TT Diamond ဆိုင်အတွင်း ဝင်ရောက်ဖို့လုပ်ချိန်မှာ ဆိုင်လုံခြုံရေးဝန်ထမ်းတွေက တားဆီးခဲ့ရာ လုယက်သူတွေက ဓားနဲ့ထိုး သေနတ်နဲ့ပစ်ခတ်တာကြောင့် ဝန်ထမ်းနှစ်ဦးအနက် တဦး ဝဲလက်ဖျံ ဓားဒဏ်ရာနဲ့ ကျန်တဦးမှာ ပေါင်ရင်းကျည်ထိမှန်ဒဏ်ရာ ရရှိခဲ့ပြီး ဒဏ်ရာရသူတွေကို လူနာတင်ကားနဲ့ ဆေးရုံပို့ဆောင်လိုက်တယ်လို့ ဆိုပါတယ်။
အဆိုပါဓားပြတိုက်မှုမှာ ဆိုင်ရှိပစ္စည်းတွေ မပါသွားဘူးလို့သိရပြီး လုယက်သူတွေဟာ စီးလာတဲ့ကားနဲ့ ဗဟိုလမ်းအတိုင်း လှိုင်မြို့နယ်ဘက်ကို မောင်းနှင်ထွက်ပြေးသွားတယ်လို့ သိရပါတယ်။
ဓားပြတိုက်မှုဖြစ်ပွားပြီးနောက် အဆိုပါ စိန်ရွှေရတနာဆိုင်ကို စစ်ကောင်စီတပ်ကား ၂ စီး၊ ရဲကား ၂ စီး၊ အင်အား ၂၀ ဝန်းကျင် ရောက်ရှိလာပြီး ဆိုင်အတွင်း မေးမြန်းစစ်ဆေးတာတွေ ပြုလုပ်ကာ ဗဟိုလမ်းမှာလည်း ပိတ်ဆို့စစ်ဆေးမှုတွေ ပြုလုပ်ခဲ့တယ်လို့ ဒေသခံတွေဆီက သိရပါတယ်။
ပြီးခဲ့တဲ့ ဩဂုတ် ၂၅ ရက်ကလည်း အဆိုပါ TT Diamond စိန်ဆိုင် လုယက်ခံခဲ့ရပြီး သိန်း ၁၀၀ ကျော်တန်ဖိုးရှိ ပလက်တီနမ်ဆွဲကြိုး အကုံး ၂၀ ပါသွားခဲ့ပါသေးတယ်။
