၂၀၁ဝကမ္ဘာ့ဖလားပြိုင်ပွဲ မဲခွဲမှုမှာ အုပ်စုချောင်အောင်လုပ်ပေးဖို့ မြောက်ကိုရီးယားအသင်းက ကမ်းလှမ်းခဲ့ဖူးတယ်လို့ အင်္ဂလန်နည်းပြဟောင်း အဲရစ်ဆန်ကပြောပါတယ်။
အဲရစ်ဆန်ဟာ အဲဒီအချိန်က အင်္ဂလန်ကလပ် နော့ကောင်တီအသင်းမှာ ဘောလုံးဒါရိုက်တာအနေနဲ့ တာဝန်ယူချိန်ဖြစ်ပြီး ကမ္ဘာ့ဘောလုံးအဖွဲ့ချုပ်မှာလည်း အဖွဲ့ဝင်တစ်ဦးအဖြစ်တာဝန်ယူခဲ့တာပါ။
အဲရစ်ဆန်ဟာ နော့ကောင်တီ အသင်းပိုင်ရှင် ရက်ဆဲလ်ကင်းရဲ့ စီစဉ်မှုနဲ့ မြောက်ကိုရီးယားနိုင်ငံကို အလည်အပတ် သွားရောက်ချိန်မှာ မြောက်ကိုရီးယားဘောလုံးတာဝန်ရှိသူတွေနဲ့ တွေ့ဆုံခဲ့ပါတယ်။
အဲဒီလို တွေ့ဆုံချိန်မှာ ကမ္ဘာ့ဖလားအုပ်စုမဲခွဲမှုမှာ မြောက်ကိုရီးယားအသင်း အုပ်စုချောင်အောင်လုပ် ဆောင်ပေးဖို့ ကမ်းလှမ်းခံခဲ့ရတာပါ။
မြောက်ကိုရီးယားတာဝန်ရှိသူတွေက သူတို့ကို အကူအညီပေးနိုင်မလားလို့ ပြောချိန်မှာ ဘောလုံးတွေ၊ ဘောလုံးကန်ဖိနပ်တွေနဲ့ တခြားပစ္စည်းတွေအတွက် ကူညီပေးဖို့ ကမ်းလှမ်းတာထင်ခဲ့ပြီး ကူညီပေးနိုင်တယ်လို့ ပြန်ပြောခဲ့ကြောင်း အဲရစ်ဆန်ကပြောပါတယ်။
“သူတို့က အုပ်စုချောင်ဖို့ ကူညီပေးဖို့ပြောခဲ့တယ်။ ကျနော်အဲဒီလိုမလုပ်နိုင်ဘူး။ ဘယ်သူမှလည်း လုပ်ပေးလို့မရဘူး။ ဒါက လုံးဝမဖြစ်နိုင်တဲ့ကိစ္စဖြစ်ပြီး ကြံစည်ရုံနဲ့တင်ပြစ်မှုမြောက်တယ်လို့ သူတို့ကိုပြောခဲ့တယ်။ ဒါပေမယ့် ကျနော် လုပ်မပေးနိုင်ဘူးဆိုတာ သူတို့က မယုံကြည်ဘဲဖြစ်ခဲ့တယ်။ ကျနော်ကလုပ်မပေးချင်လို့ပေလို့ သူတို့ကထင်ခဲ့တယ်” လို့ အဲရစ်ဆန်ကပြောပါတယ်။
မြောက်ကိုရီးယားအသင်းဟာ အုပ်စုမဲခွဲချိန်မှာ ဘရာဇီး၊ ပေါ်တူဂီနဲ့ အိုဗရီကို့စ်တို့ ပါဝင်တဲ့ မရဏအုပ်စုမှာ ကျရောက်ခဲ့ပြီး ၃ ပွဲစလုံးရူံးနိမ့်ခဲ့ပါတယ်။
