ကမ္ဘာ့ရေနံစိမ်းစျေးနှုန်းနဲ့ ဒေါ်လာငွေလဲနှုန်း သတ်မှတ်ချက်  ကျဆင်းသွားပေမဲ့ ရန်ကုန် pက်သုံးဆီစျေးနှုန်းက ထပ်မံကျဆင်းခြင်းမရှိဘဲ ၁ လီတာကို ၁၇၃၀ ၀န်းကျင်မှာ စျေးငြိမ်နေပါတယ်။

ဧပြီ ၇ ရက်မှာ ၁ လီတာကို ကျပ် ၂၀၀၀ အောက် ရုတ်တရက် ကျဆင်းခဲ့ပြီးနောက် သီတင်းပတ်တပတ်လောက်ကြာတဲ့အထိ အဲဒီနှုန်းထားအတိုင်း  စျေးငြိမ်နေခဲ့တာပါ။

ကမ္ဘာ့ရေနံစျေးနှုန်းက ပြီးခဲ့တဲ့ မတ်လနှောင်းပိုင်းမှာ ရေနံစိမ်းတစည်း   အမေရိကန်ဒေါ်လာ ၁၂၀ အထက်ထိ  မြင့်တက်ခဲ့ပြီး  ဒီနေ့မှာ တစည်ကို  အမေရိကန်ဒေါ်လာ ၁၀၀ အောက်ကျဆင်းခဲ့ပါ တယ်။ 

တရုတ်နိုင်ငံက ကိုဗစ်ထိန်းချုပ်ဖို့ မြို့တွေကို လော့ဒေါင်းချတာကြောင့် လောင်စာဆီသုံးစွဲမှု လျော့သွားတာအပြင် အမေရိကန်နိုင်ငံက နောက် ၆ လအတွင်း အရန်လောင်စာဆီ စည်ပေါင်း သန်း ၂၄၀ ထုတ်ရောင်းဖို့ ကြေညာပြီးနောက် အခုလို ကမ္ဘာ့ရေနံဈေး လျော့ကျလာတာ ဖြစ်ပါတယ်။

ဒါအပြင့် စစ်ကောင်စီ ဗဟိုဘဏ်ဟာ မကြာသေးခင်က ဒေါ်လာငွေလဲနှုန်း သတ်မှတ်ပေးလိုက်တာကြောင့် ပြည်ပကနေ ဒေါ်လာနဲ့ ၀ယ်ယူရတဲ့ စက်သုံးဆီအပါအ၀င် ကုန်ပစ္စည်းတွေ စျေးနှုန်းကျဆင်းနိုင်တယ်လို့ စျေးကွက် စောင့်ကြည့်သူတွေက သုံးသပ်ပါတယ်။

ဗဟိုဘဏ်က ငွေလဲနှုန်း သတ်မှတ်ပြီးနောက် ဧပြီ ၇ ရက်မှာတော့ ၁ လီတာကို ၁၃၅ ကျပ်ကနေ ၂၀၀ နီးပါးအထိ စျေးရုတ်တရတ် ကျဆင်းခဲ့ပြီး လက်ရှိ ရန်ကုန်စျေးကွက်မှာ  အောက်တိန်း ၉၂ တစ်လီတာကို ၁၇၃၀ ကျပ်၊ အောက်တိန်း ၉၅ တစ်လီတာကို ၁၇၉၅ ကျပ်၊ ပရီမီယမ် ဒီဇယ် တစ်လီတာကို  ၁၉၇၀ ကျပ်၊ ဒီဇယ်တစ်လီတာကို ၁၉၅၀ ကျပ်နဲ့ စျေးငြိမ်နေတာ ဖြစ်ပါတယ်။ 

ပြီးခဲ့တဲ့  ဧပြီ ၆ ၇က်ကတော့   အောက်တိန်း ၉၂ တစ်လီတာကို ၁၈၆၅ ကျပ်၊ အောက်တိန်း ၉၅ တစ်လီတာကို ၁၉၄၀ ကျပ်၊ ပရီမီယမ် ဒီဇယ် ၁ လီတာကို  ၂၁၅၅ ကျပ်၊ ဒီဇယ်တစ်လီတာကို ၂၁၄၀ ကျပ် အသီးသီး ရှိခဲ့ပါတယ်။

စျေးနှုန်းကျဆင်းရခြင်းအကြောင်းကလည်း စစ်ကောင်စီရဲ့ ဖိအားပေး ညွှန်ကြားချက်အရ ကုမ္ပဏီကြီးတွေကလက်လီစျေးကို စျေးချရောင်းခြင်းကြောင့် ဖြစ်ပြီး လက်ကားစျေးကို လျှော့ချတာ မရှိတာကြောင့် တဆင့်ဝယ်ရောင်း လက်လီသမားတွေ အခက်ကြုံတွေ့နေရတယ်လို့ သိရပါတယ်။

စက်သုံးဆီလက်လီ အရောင်းဆိုင်လုပ်ငန်းရှင်တစ်ဦးက “ကုမ္ပဏီဆိုင်တွေက  ညွှန်ကြားချက်အရ လက်လီပဲ ချရောင်းပြီး၊ လက်ကားစျေးကို သိပ်မချဘူး။  အဲတော့ လက်လီသမားတွေ ခက်ကုန်တာပေါ့။ သယ်ယူစရိတ်ကရှိသေးတယ်။ ဆိုင်ကြီးတွေကလည်း  အမိန့်ကန့်သတ် ချက်အရသာ မဖြစ်မနေရောင်းနေရတာ။ တချို့လည်းရှုံးမှာကြောက်ပြီး၊ စျေးချမရောင်းချင်တော့ သင်္ကြန်နဲ့ ရောပြီးပိတ်ထားကြတယ်” လို့ ပြောပါတယ်။

စစ်ကောင်စီက စက်သုံးဆီ လုပ်ငန်းရှင်တွေကို ခေါ်ယူတွေ့ဆုံပြီး လက်လီစျေးနှုန်းကို သတ်မှတ်ဒေါ်လာ ငွေလဲနှုန်း ၁၈၅၀နဲ့ တွက်ချက် စျေးလျှော့ရောင်းချဖို့ မကြာသေးခင်က ဖိအားပေးညွှန်ကြားထားတယ်လို့လည်း ဆီဆိုင်လုပ်ငန်းရှင်တွေထံက သိရပါတယ်။