တူရကီနိုင်ငံသားတွေအတွက် ဆူဒန်ကိုစေလွှတ်ခဲ့တဲ့ စစ်တပ်ရဲ့ ကယ်ဆယ်ရေးလေယာဉ် ပျက်စီးမှုကို မြေပြင်ရှိအဖွဲ့တွေက စစ်ဆေးနေကြပြီး မကြာခင်မှာ ပြန်ပြုပြင်ပြီးနိုင်မယ်လို့ မျှော်လင့်ရကြောင်း တူရကီကာကွယ်ရေးဝန်ကြီး ဟူလူစီအက်ကာက ပြောပါတယ်။
တူရကီ ကယ်ဆယ်ရေးလေယာဉ်ဟာ ခါတွမ်မြို့တော်အပြင်ဘက်ရှိ ဝါဒီဆေယစ်ဒ်နာ လေဆိပ်ကို ဆင်းသက်နေတုန်း အရန်အမြန်ထောက်ပံ့ရေးတပ်ဖွဲ့ (RSF) က တူရကီ ကယ်ဆယ်ရေး လေယာဉ်ကိုပစ်ခတ်ခဲ့တာကြောင့် သူ့ရဲ့လောင်စာဆီစနစ် ပျက်စီးသွားခဲ့ကြောင်း ဆူဒန်စစ်တပ်က သောကြာနေ့အစောပိုင်းမှာ ပြောကြားခဲ့ပါတယ်။
RSF ကတော့ အဲဒီလေယာဉ်ကို ပစ်ခတ်ခြင်းမရှိကြောင်း ငြင်းဆိုထားပြီး ဆူဒန်စစ်တပ်က အလိမ်အညာတွေ ဖြန့်နေတာ လို့ ဆိုပါတယ်။
RSF တပ်ဖွဲ့တွေဟာ သဘောတူထားတဲ့ လူသားချင်းစာနာမှုဆိုင်ရာ အပစ်အခတ်ရပ်စဲရေးကို ညသန်းခေါင်ကျော်ချိန်ကတည်းက စွဲစွဲမြဲမြဲ ကတိကဝတ် လိုက်နာထားကြောင်းနဲ့ အာဒမန် မှာရှိတဲ့ ဝါဒီဆေယစ်ဒ်နာ လေဆိပ်ရဲ့ ကောင်းကင်ယံမှာ ဘယ်လေယာဉ်ကိုမှ ပစ်မှတ်ထား ပစ်ခတ်ခဲ့တယ် ဆိုတာ မမှန်ပါဘူး” လို့ RSF ရဲ့ ထုတ်ပြန်ချက်မှာ ဖော်ပြထားပါတယ်။
တူရကီကာကွယ်ရေးဝန်ကြီးဌာနဟာ အဲဒီလေယာဉ် ပစ်ခတ်ခံခဲ့ရကြောင်း အတည်ပြုခဲ့ပြီး ထိခိုက်ဒဏ်ရာရသူတွေ၊ သေဆုံးမှုတွေ မရှိခဲ့ကြောင်းလည်း ပြောကြားခဲ့ပါတယ်။
လေယာဉ်ပျက်စီးမှု အနည်းငယ်ရှိသွားတာကိုလည်း စုံစမ်းစစ်ဆေးနေကြောင်း အက်ကာက ပြောပါတယ်။ ဆူဒန်မှာ ကျန်နေသေးတဲ့ နိုင်ငံသားအားလုံးကို ကယ်ထုတ်ဖို့အတွက် နောက်ထပ် စစ်လေယာဉ် ၅ စီးကို စေလွှတ်ထားတယ်လို့လည်း သူက ဆိုပါတယ်။ ဆူဒန်စစ်တပ်ကတော့ အဲဒီလေယာဉ်ကို ပြန်ပြုပြင်ထားကြောင်း ပြောပါတယ်။
