ကရင်နီပြည်နယ်အတွင်းမှာရှိတဲ့ စစ်ဘေးရှောင်စခန်းတွေမှာ ဆန်နဲ့ စားနပ်ရိက္ခာ လုံလောက်မှုမရှိဘူးလို့ စစ်ဘေးရှောင်ကူညီရေးအဖွဲ့တွေဆီက သိရပါတယ်။
“စစ်ဘေးရှောင် ၂ သိန်းနီးပါးရှိတယ်၊ ၁,၀၀၀ ကျော်တယ် စစ်ဘေးရှောင်စခန်းတွေမှာ၊ ဆန်၊ ဆီ၊ ဆား၊ ဆေးဝါး၊ စားသောက်ကုန် အမိုးအကာ လိုအပ်ချက်များစွာရှိနေတယ်”လို့ ကရင်နီ လူသားချင်းစာနာထောက်ထားမှုဆိုင်ရာ အကူအညီပေးရေးအဖွဲ့ (KHAI) အဖွဲ့က ဒီဗွီဘီကို ပြောပါတယ်။
စစ်ကောင်စီက ကရင်နီပြည်နယ်အတွင်းမှာ စားနပ်ရိက္ခာ သယ်ယူပို့ဆောင်မှု ကန့်သတ်ထားပြီး ပစ္စည်းအများအပြား သယ်ယူပို့ဆောင်မှု ပိတ်ပင်ထားတာကြောင့်ရော အလှူရှင်ထောက်ပံ့မှု နည်းတာတွေကြောင့်ရော လိုအပ်ချက်တွေ များနေတယ်လို့ သိရပါတယ်။
စစ်ဘေးရှောင်တွေရဲ့ အခက်အခဲတွေနဲ့ ပတ်သက်ပြီး “တချို့စခန်းတွေ ရိက္ခာပြတ်လပ်နေတယ်။ အကူအညီလာတောင်းတာတွေလည်း ရှိတယ်။ NGO တွေနဲ့ နိုင်ငံတကာ အရပ်ဘက်အဖွဲ့အစည်းတွေကိုလည်း ကရင်နီကို ဝိုင်းကူစေချင်တယ်” KHAI အဖွဲ့ တာဝန်ရှိသူက ပြောပါတယ်။
ကရင်နီတိုက်ပွဲတွေအတွင်း စစ်ရှောင်စခန်းတွေကို စစ်ကြောင်းထိုးလို့ စစ်ဘေးရှောင် ပြည်သူတွေ ဘေးလွတ်ရာကို ရွှေ့ပြောင်းနေရတယ်လို့ ရှမ်းတောင်တော်လှန်ရေးအင်အားစုက မေ ၄ ရက်မှာ ထုတ်ပြန်ခဲ့ပါတယ်။
ကရင်နီ(ကယား)ပြည်နယ်ရှိ စစ်ဘေးဒုက္ခသည်စခန်း ၇ ခုမှာ စစ်ဘေးရှောင် ၂၀၀,၀၀၀ လောက်အတွက် စားနပ်ရိက္ခာအပြင် ရေရှားပါးမှုနဲ့ နွေရာသီ အလွန်ပူပြင်းတာကြောင့် သောက်ရေ၊ သုံးရေတွေ အရေးပေါ်လိုအပ်နေတယ်လို့ Job For Kayah အဖွဲ့ထံက သိရပါတယ်။
အဆိုပါ စစ်ဘေးရှောင်စခန်းတွေကိ ရေဂါလန် ၂,၀၀၀ ကားနဲ့ တခေါက်စာရေထည့်ရင် သုံးလေးရက်စာအတွက် သုံးရေအဆင်ပြေပေမဲ့ ချိုးရေအတွက်တော့ သုံးလို့မရဘူးလို့ သိရပါတယ်။ ရေသယ်တဲ့ကားခမှာ အနည်းဆုံး ၂၀,၀၀၀ ကျပ်ကနေ ၅၀,၀၀၀ ကျပ်ဝန်းကျင်အထိ ပေးရပါတယ်။
JFK မှ တာဝန်ရှိသူတဦးက “ကျနော်တို့ကနေတဆင့် ရေကားကိုဆက်သွယ်ပြီး Camp တွေဆီကို ပို့ခိုင်းရတာပါခင်ဗျ။ ခရီးအကွာအဝေးပေါ်မူတည်ပြီး စျေးအနည်းအများ ရှိသွားပါတယ်။ ရေတခေါက်ထည့်ရင် ၃ ရက်၊ ၄ ရက်စာလောက်တော့ ရတယ်။ ဒါက သုံးရေအတွက်ကိုပဲ ပြောတာပါ။ ရေချိုးဘာညာအတွက် မပါသေးဘူးဗျ” လို့ ပြောပါတယ်။
အခုအခါမှာ တခြားလိုအပ်ချက်တွေ ရှိနေပေမဲ့ ရေက သုံးရေအတွက်ရော သောက်ရေအတွက်ပါ နေ့စဥ်လိုအပ်နေတာမို့ ပိုအရေးကြီးတယ်လို့လည်း စစ်ဘေးရှောင်စခန်းတခုမှာ နေထိုင်တဲ့ အမျိုးသမီးတဦးက ဒီဗွီဘီကို ပြောပါတယ်။
“အခုချိန်က ရာသီဥတုလည်းပူသလို တောင်ပေါ်ရေရှားချိန်လည်း ဖြစ်နေတော့ သောက်ရေရော၊ သုံးရေရောက အဓိကပြဿနာဖြစ်နေတယ်။ ရေက မသောက်ဘဲလည်း မနေနိုင်ဘူးလေ။ နောက်ပြီး အပေါ့အလေးသွားတာကလည်း ကြာကြာထိန်းထားလို့မရတော့ ရေနဲ့ပတ်သက်ပြီး တော်တော်ဒုက္ခရောက်နေတယ်။”
လက်ရှိအချိန်မှာ ဖြစ်ပေါ်နေတဲ့ တိုက်ပွဲတွေကြောင့် ဒေါတမကြီးဘက်က စစ်ဘေးရှောင်တွေ ထပ်တိုးလာကာ အခြေခံစားသောက်ကုန်တွေဖြစ်တဲ့ ဆန်၊ ဆီ၊ ဆားတွေလည်း လိုအပ်နေသလို သုံးရေရမှ သောက်ရေအတွက် တဖန်ပြန်လည် ကျိုချက် သောက်သုံးနေရတာ ဖြစ်ပြီး ရေက အဓိကလိုအပ်နေတာဖြစ်တယ်လို့ JFK မှ တာဝန်ရှိသူတဦးက ပြောပါတယ်။
အခုချိန်မှာ ရေက မရှိမဖြစ်လိုအပ်နေတဲ့ အရေးပေါ်လိုအပ်ချက်တခု ဖြစ်တဲ့အတွက် ပြည်တွင်းပြည်ပမှ အလှူရှင်တွေအနေနဲ့ ဝိုင်းဝန်းကူညီပေးကြဖို့ကိုလည်း Job For Kayah မှ မေတ္တာရပ်ခံ တောင်းဆိုထားပါတယ်။
