ကရင်ပြည်နယ်၊ ကျုံဒိုးမြို့နယ်မှာ ဧပြီ ၃ ရက်က ရိုးမဟာရွာ၊ မနီကုန်းအပိုင်းကို စစ်ကောင်စီတပ်က လက်နက်ငယ်တွေနဲ့ ပစ်ခတ်လို့ ကလေးငယ် ၁ ဦး ကျဉ်ဆန်ထိမှန် သေဆုံးခဲ့တယ် ဒေသခံတွေထံက သိရပါတယ်။
မနေ့ မနက် ၈ နာရီလောက်က စစ်ကောင်စီသားတွေဟာ တိုက်ပွဲမဖြစ်ဘဲ ကျေးရွာအတွင်းကို လက်နက်ငယ်တွေနဲ့ ပစ်ခတ် ဝင်ရောက်လာတာကြောင့် အိမ်ရှေ့ ဆိုင်ကယ်ပြင်ဆိုင်ထဲမှာရှိနေတဲ့ ကလေးငယ်တစ်ဦး ကျည်ထိမှန်သေဆုံးခဲ့တယ်လို့ ကျေးရွာသူတဦး ကပြောပါတယ်။
"ရွာထဲကိုဝင်လာတဲ့အချိန် သေနတ်တွေနဲ့ပစ်တော့ အကုန်လုံးကပြေးပုန်းကြတယ်။ ဘယ်တပ်ကမှန်းမသိလိုက်ဘူး။ ကလေးက အပြင်သွားနေတဲ့ သူ့အဖေကို ဆိုင်ထဲမှာ ထိုင်စောင့်နေရင်း စစ်ခွေးတွေက ရမ်းသန်းပစ်တော့ထိသွားတာ။”
ပစ်ခတ်မှုကြောင့် အသက် ၁၂ နှစ် အရွယ် စောဝေသာလီထွန်းဟာ ပေါင်မှာ ကျည်ထိမှန်ခဲ့တဲ့ ဒဏ်ရာကြောင့် ဆေးရုံကို ပို့ဆောင်ခဲ့ပေမဲ့ လမ်းမှာပဲ သေဆုံးသွားခဲ့ပါတယ်။
ဧပြီ ၂ ရက် ညနေ ၆ နာရီဝန်းကျင်မှာလည်း ငါးတိုင်ရေပူကျေးရွာကို ခမရ ၅၄၆ တပ်က လက်နက်ကြီးနဲ့ပစ်ခတ်လို့ အမျိုးသမီးကြီးတယောက် ဗိုက်မှာဒဏ်ရာရရှိခဲ့ပြီး ဆေးကုသမှုခံယူနေရပါတယ်။
ကရင်ပြည်နယ်မှာ ၂၀၂၁ ခုနှစ် မှ ၂၀၂၃ ခုနှစ် မတ်လအထိ စစ်ဘေးရှောင်ဦးရေ ၅ သိန်းကျော်ရှိပြီး တိုက်ပွဲအတွင်း ထိခိုက်ဒဏ်ရာရရှိသူ ၈၄၁ ဦးနဲ့ သေဆုံးသူ ၅၂၂ ဦးထိ ရှိလာပြီးဖြစ်တယ်လို့ Karen Women’s Organization−KWO ရဲ့ စာရင်းတွေအရ သိရပါတယ်။
ထိုင်းနိုင်ငံ၊ ဘူရီရမ်ခရိုင်မှာ အမျိုးသမီးတဦးက ဗန်ကားထဲမှာ ၃ နှစ်အရွယ် ကလေးငယ်တဦးကို ၂ နာရီကြာ ပိတ်ထားမိခဲ့လို့ ကလေးငယ် အသက်ရှူကျပ်ကာ သေဆုံးခဲ့ရတယ်လို့ The Thaiger ထိုင်းသတင်းဌာနက ဖော်ပြပါတယ်။
အသက် ၃၃ နှစ်အရွယ်ရှိ ဖစ်စမိုင် ဆိုသူ အမျိုးသမီးက သားဖြစ်သူ အသက် ၃ နှစ်အရွယ် ကလေးငယ်ကို ကားထဲမှာ မေ့ပြီး ပိတ်ထားမိခဲ့တဲ့ အတွက် မတ်လ ၂၃ ရက် နေ့လယ် ၃ နာရီလောက်မှာ ဘန်ဘွားမြူနီစပယ် ကယ်ဆယ်ရေးအသင်းကို အကူအညီ တောင်းခံခဲ့တာမှာ ကယ်ဆယ်ရေးအဖွဲ့တွေရောက်လာပြီး ဆေးရုံပို့ခဲ့ပေမဲ့ ကလေးက လမ်းမှာပဲ သေဆုံးခဲ့ရတာလို့ သိရပါတယ်။
အဆိုပါ အမျိုးသမီးဟာ စားသောက်ဆိုင်ပိုင်ရှင်ဖြစ်ပြီး ကျောင်းရက်ရှည် ပိတ်ထားတဲ့အတွက် သားသမီးဖြစ်တဲ့ ၆ နှစ်အရွယ် ကလေးတဦး၊ ၃ နှစ်အရွယ် ကလေးတဦးနဲ့ ၁ နှစ်အရွယ် ကလေးတဦးတို့ကို သူရဲ့စားသောက်ဆိုင်ကို ခေါ်ဆောင်လာခဲ့ပြီး သူနဲ့အတူ သားသမီး ၃ ယောက်စလုံး ဆင်းလာပြီအထင်နဲ့ အလုပ်တွေ ဆက်လုပ်နေခဲ့ရာ အချိန်အတော်ကြာ သားလတ်ဖြစ်သူ ဂန်းကိုမတွေ့တဲ့အတွက် လိုက်လံရှာဖွေရာ ကားထဲမှာ ပိတ်မိနေခဲ့တာကို တွေ့ရှိပြီး ကယ်ဆယ်ရေးအဖွဲ့တွေကို အကူအညီ တောင်းခဲ့တာလို့ ဖော်ပြထားပါတယ်။
ရဲအရာရှိတွေ ဆက်လက်စစ်ဆေးရာမှာတော့ အသက် ၆၄ နှစ်ရှိပြီဖြစ်တဲ့ သေဆုံးသူရဲ့ အဘွားဖြစ်သူက သူ့သမီးပြောသလို ကလေးက ကားပေါ်ကဆင်းလာပြီး ဆော့ကစားနေတာကို မတွေ့ခဲ့ဘူးလို့ ထွက်ဆိုခဲ့တဲ့အတွက် သေဆုံးသူကလေးက ဘာအတွက် ကားထဲပိတ်မိပြီး သေဆုံးရတယ်ဆိုတာကို ဆက်လက်စစ်ဆေးသွားမယ်လို့ သိရပါတယ်။
ဆက်လက်စစ်ဆေးရာ သေဆုံးသူကလေးငယ်ဟာ ပိတ်မိခဲ့တဲ့ ကားနောက်ခန်းနေရာမှာ အန်ထားတာတွေနဲ့ ကားမှန်မှာ ကုတ်ခြစ်ထားတဲ့လက်ရာတွေ တွေ့ရတဲ့အတွက် မသေခင်မှာ ကားထဲကထွက်နိုင်ဖို့ ကြိုးစားခဲ့ပုံရတယ်လို့ ရဲမှူး အနူပရမ်က The Taiger ကို ပြောပါတယ်။
ထိုင်းနိုင်ငံမှာ ပြီးခဲ့တဲ့နှစ်က ကျောင်းကားပေါ်မှာ ၇ နှစ်အရွယ် ကျောင်းသူတဦး တနေကုန် ပိတ်မိခဲ့တဲ့အတွက် ကားဆရာနဲ့ ကျောင်းဆရာမဖြစ်သူကို အရေးယူခဲ့ပြီး နိုင်ငံမှာ အခုလိုကိစ္စတွေ မဖြစ်စေဖို့အတွက် ကလေးငယ်တွေ ကားထဲပိတ်မိရင် ဟွန်းတီးခိုင်းဖို့ မိဘတွေ ကျောင်းဆရာမတွေကို ညွှန်ကြားခဲ့တယ်လို့ သိရပါတယ်။
Source-The Thaiger
