စစ်ကိုင်းတိုင်း၊ ကလေးမြို့နယ်အခြေစိုက် ကလေးပြည်သူ့ကာကွယ်ရေး LDF တပ်ဖွဲ့က ပြည်သူတွေရဲ့ ထောက်ပံ့ကူညီမှုတွေနဲ့ လက်နက်တွေ ထုတ်လုပ်နိုင်ခဲ့ပြီလို့ ဇွန် ၂၂ ရက်မှာ အသိပေး ထုတ်ပြန်ပါတယ်။
လက်နက်ဝယ်ယူရတာ ခက်ခဲပြီး သယ်ယူရာမှာလည်း လမ်းကြောင်းအခက်အခဲတွေကြောင့် ကိုယ်တိုင်ထုတ်လုပ်တပ်ဆင်နိုင်အောင် ကြိုးစားလုပ်ဆောင်နေကြတယ်လို့ ကလေး LDF တာဝန်ခံက ဒီဗွီဘီကို ပြောပါတယ်။
“ထုတ်လုပ်နိုင်တဲ့ လက်နက်ကြီးအမျိုးအစားတွေကတော့ လက်နက်ကြီး ၄၀ မမ၊ ၅၀ မမ၊ ၆၀ မမတွေဖြစ်တယ်။ အဲ့ဒီလက်နက်ကြီးတွေကို ထုတ်လုပ်နိုင်ဖို့ အချိန်တလနီးပါး ကြာမြင့်ခဲ့တယ်။ လက်နက်ကြီးထုတ်လုပ်စဉ် မတော်တဆ ပေါက်ကွဲမှုကြောင့် ရဲဘော်အချို့ ထိခိုက်ဒဏ်ရာရတာတွေ ရှိခဲ့တယ်။”
အခုထက်ပိုပြည့်စုံတဲ့ လက်နက်တွေ ထုတ်လုပ်တပ်ဆင်နိုင်ဖို့ ပြည်သူလူထုအနေနဲ့ တတ်နိုင်သရွေ့ ပါဝင်လှူဒါန်းပေးကြဖို့နဲ့ မိမိတို့တပ်ဖွဲ့ဘက်ကလည်း စစ်အာဏာရှင် ကျဆုံးသည်အထိ အစွမ်းကုန် ခုခံတော်လှန်သွားမယ်လို့ ပြည်သူ့ကာကွယ်ရေးတပ်ဖွဲ့ LDF က ဆိုပါတယ်။
လက်ရှိမှာတော့ စစ်ကောင်စီတပ်ဖွဲ့တွေက ကလေးနယ်က ကျေးရွာတွေကို စစ်ကြောင်းထိုးဝင်ရောက်ကာ နေအိမ်တွေကို မီးရှို့ဖျက်ဆီးနေပြီး ဒေသခံတွေကို ဖမ်းဆီးနှိပ်စက် သတ်ဖြတ်နေတာလည်း ဖြစ်ပါတယ်။
ကလေးမြို့နယ်အတွင်းမှာ စစ်ကောင်စီတပ်ဖွဲ့တွေနဲ့ ကလေး PDF တပ်ဖွဲ့တွေကြား စစ်ရေးတင်းမာနေပြီး တိုက်ပွဲတွေ ဖြစ်ပွားနေတာကြောင့် ဒေသခံတွေအနေနဲ့ ကလေး-ဂန့်ဂေါလမ်းကို အသုံးမပြုကြဖို့လည်း ကလေး PDF က မေတ္တာရပ်ခံထားပါတယ်။
