စစ်ကိုင်းတိုင်း၊ ကလေးမြို့နယ်အ‌ခြေစိုက်၊ ကလေးပြည်သူ့ကာကွယ်ရေးတပ်ဖွဲ့ရဲ့ တပ်ရင်းတခုဖြစ်တဲ့ ကလေး PDF တပ်ရင်း-၆ က တော်လှန်ရေးမှာ အဓိကကျတဲ့ လက်နက်ဝယ်ယူနိုင်ရေးအတွက် “ပေးဆပ်သူတို့ရဲ့အိမ်ပြန်လမ်း” မဲအစောင်ရေ ၃,၀၀၀ ပရောဂျက် ပြုလုပ်နေပါတယ်။

စစ်ကောင်စီကို ခုခံတော်လှန်ဖို့ လက်နက်ခဲယမ်းဝယ်ယူနိုင်ရေး ရန်ပုံငွေအင်အားနည်းလာတာကြောင့် ရန်ပုံငွေရှာတဲ့အနေနဲ့ အခုလို ပရောဂျက် ပြုလုပ်ရတာလို့ ကလေး PDF အဖွဲ့ဝင် မချောစုအောင်က ပြောပါတယ်။

အဆိုပါကံစမ်းမဲမှာ မဲပေါက်တဲ့သူတွေအတွက် ပထမဆုအနေနဲ့ ပေးဆပ်သူတို့ရဲ့အိမ်ပြန်လမ်း ပန်ချီကား၊ ဒုတိယဆုအနေနဲ့ iPhone 14 pro 128gb နဲ့ တတိယဆုအတွက်ကတော့ ၁၀ သိန်းတန် ရွှေဆွဲကြိုးတကုံး၊ တခြားနှစ်သိမ့်ဆုတွေအနေနဲ့ ၂ သိန်းတန်လက်စွပ် ၅ ခု စီစဉ်ထားတယ်လို့ ဆိုပါတယ်။

“ပေးဆပ်သူတို့ရဲ့ အိမ်ပြန်လမ်း” ကံစမ်းမဲလက်မှတ်ကို အမေရိကန်၊ ဂျပန်၊ စင်ကာပူ၊ တောင်ကိုရီးယား စတဲ့ ပြည်တွင်းပြည်ပက မြန်မာနိုင်ငံသားတွေ ဝယ်ယူအားပေးနိုင်ပြီး ကံစမ်းမဲတစောင်ကို မြန်မာငွေ ၂၀,၀၀၀ ကျပ် ကျသင့်မှာဖြစ်တယ်လို့ ဆိုပါတယ်။

ကလေးခရိုင် အမှတ်-၆ တပ်ရင်းရဲ့ ပြန်ကြားရေးတာဝန်ခံ ရဲဘော် ကိုဂျပန်ကြီးက “ကျနော်တို့ ကံစမ်းမဲရောင်းချနေတာ တပတ်ရှိပါပြီ။‌ အစောင်ရေ ၇၀၀ ပဲ ရောင်းချရသေးပါတယ်။ ကံစမ်းမဲလက်မှတ်တွေ ဝယ်ယူအားပေးကြပါ။ ကျနော်တို့ အသက်ပေးပြီး စစ်အာဏာရှင်ကို တိုက်ထုတ်ပါ့မယ်။ မိဘပြည်သူ‌တွေအနေနဲ့ မိမိတို့တပ်ရင်းကို ကူညီတဲ့အနေနဲ့ ဝယ်ယူအားပေးကြဖို့နဲ့ မဲအစောင်ရေ ၃,၀၀၀ ပြည့်မှသာ ကံစမ်းမဲဖွင့်ပေးမှာဖြစ်တယ်”လို့ ပြောပါတယ်။

ကလေး PDF တပ်ရင်း-၆ က တပ်ဖွဲ့ဝင်တွေဟာ တခြား မြေပြင်မှာရှိတဲ့ တော်လှန်ရေးတပ်ဖွဲ့တွေနဲ့အတူပူးပေါင်းပြီး စစ်အာဏာရှင်ကို တိုက်ခိုက်နေတဲ့အဖွဲ့တဖွဲ့ ဖြစ်ပါတယ်။

စစ်ကိုင်းတိုင်း၊ ကလေးမြို့နယ်အခြေစိုက်၊ ကလေး PDF တပ်ရင်း-၂ က “အိမ်လွမ်းသူအတွက် Gun တလက်” ဆိုတဲ့ခေါင်းစဉ်နဲ့ တပ်ရင်းရဲ့ ပထမဆုံး Challenge ကို စတင်ပြုလုပ်လိုက်ပါတယ်။

အဆိုပါ Challenge ကို အောက်တိုဘာ ၁ ရက်က‌‌နေ ၂၁ ရက်အထိ ရက်ပေါင်း ၂၁ ရက်အတွင်း AK တလက်နဲ့ ကျည်ကာ ၁၀ ခုအတွက် သိန်း ၁၅၀ ပြည့်တဲ့အထိ ခေါ်ယူသတ်မှတ်ထားတာ ဖြစ်ပါတယ်။

ကလေး PDF တပ်ရင်း-၂ တာဝန်ခံက “တော်လှန်ရေး အချိန်ကြာလာတာနဲ့အမျှ တော်လှန်ရေးရဲဘော်တွေရဲ့ အိမ်ကိုလွမ်းနေတဲ့စိတ်တွေဟာ ပိုတိုးလာခဲ့ပါပြီ။ အခုလိုကာလမှာတော့ အိမ်လွမ်းတဲ့စိတ်တွေဟာ ပိုတိုးလာခဲ့တာပေါ့ဗျာ။ ကျနော်တို့ တပ်ရင်း-၂ အနေနဲ့ အိမ်ကိုလွမ်းနေတဲ့ ရဲဘော်တွေရဲ့ လွမ်းစိတ်တွေကို ဖြေသိမ့်ပေးနိုင်ဖို့ ‘အိမ်လွမ်းသူအတွက် Gun တလက်’ ဆိုတဲ့ တပ်ရင်းရဲ့ ပထမဆုံး challenge မှာ အားဖြည့်ကူညီပေးဖို့ အားလုံးကို တိုက်တွန်းပါရစေဗျ” လို့ ပြောပါတယ်။

ဆက်လက်ပြီး “လှူဒါန်းပေးလိုသော ပြည်တွင်းက မိဘပြည်သူများအနေနဲ့ ကလေး PDF အမှတ်-၂ တပ်ရင်းရဲ့ ဖေ့စ်ဘွတ်ခ်စာမျက်နှာကတဆင့် ပါဝင်လှူဒါန်းနိုင်ပြီး ပြည်သူသာလျှင် အဓိကမို့ ပြည်တွင်းပြည်ပက မိဘပြည်သူတွေအနေနဲ့ project ပြည့်မီအောင် လှူဒါန်း‌ပေးကြလိမ့်မယ်လို့ ယုံကြည်ကြောင်း” သူက ပြောပါတယ်။