စစ်ကိုင်းတိုင်း ကသာမြို့ရှိ ခရစ်ယာန်သင်္ချိုင်းမှာ ဆောက်လုပ်ထားတဲ့ ခရစ်ယာန် အသင်းတော်များ ကောင်စီရဲ့ သုသာန်ဇရပ်က မူလီ နတ်ချောင်း နတ်ခေါင်းတွေ အကုန်လုံးနီးပါး ဖြုတ်ခိုးခံလိုက်ရတယ်လို့ ဧပြီ ၂၈ ရက်မှာ လူမှုကူညီရေးအသင်း တာဝန်ရှိသူ တဦးက ပြောပါတယ်။
"မိုးရွာတဲ့အချိန်မှာ သုံးဖို့ ဆောက်ထားတာ ၄ နှစ် ရှိပါပြီ။ ခုက ဖြတ်လို့ ရသလောက် အကုန်ဖြုတ်သွားတော့ တိုင်နေရာတွေရွှေ့ကုန်ပြီး လေတိုက်ရင်ပြိုကျမယ့်အနေအထား ဖြစ်နေတယ်။"
ခရစ်ယာန်သုသာန်ဇရပ်ကိုတည်ဆောက်ထားတာ ၄ နှစ်နီးပါးရှိလာပြီး ကိုဗစ်ကာလ ကြားခံ သွားတာမို့ အသုံးမပြုရသေးကြောင်းနဲ့ ပျက်စီးမှုတွေကို ဂဟေဆော်ပြီး ပြန်ပြုပြင်ရမယ်လို့ ဆိုပါတယ်။
ကသာမြို့ခံတဦးက "အမှိုက်ကောက်တဲ့သူတွေ အမှိုက်ပုံလာမွှေလို့ ကလေးပါလာရင် အဲဇရပ်ထဲ နေခိုင်းကြ၊ အနားယူကြနဲ့၊ ဇရပ်ပတ်ဝန်းကျင်က အမှိုက်ပုံလိုဖြစ်နေတာ။ အိုးဝယ် ဒန်ဝယ် သံချောင်းအဟောင်း ခိုးရာပါပစ္စည်းဝယ်တဲ့ ဆိုင်တွေကလည်းများလာတော့ အမှိုက်မွှေတာ တောင်အလှည့်နဲ့ပဲ။ မနက်တွေဆို အထုပ်တွေ လေးငါးထုပ်ဆွဲအိမ်ရှေ့ကဖြတ်နေကြတာပဲ" လို့ ပြောပါတယ်။
အာဏာသိမ်းမှုဖြစ်စဥ်နောက်ပိုင်းမှာ ကသာမြို့အနီးတဝိုက်က ကျေးရွာတွေကို လေယာဥ်နဲ့ ဗုံးကြဲသလို ရွာထဲဝင်ရောက်ပစ်ခတ်တဲ့ ဖြစ်စဥ်တွေကြောင့် ကချင်နှစ်ခြင်းခရစ်ယာန်အသင်းတော်မှာ စစ်ဘေးရှောင်မိသားစုတွေ ရှိနေကြတယ်လို့ သိရပါတယ်။
ဒီလိုဖြစ်စဥ်တွေကို အခွင့်ကောင်းယူပြီး မရိုးသားတဲ့ နည်းလမ်းတွေနဲ့ လုပ်ကိုင်စားသောက်သူတွေ တစခန်းထနေကြတာလို့ မြို့ခံတွေက ပြောပါတယ်။
မြို့အနီးအနားမှာလည်း ပစ်ခတ်မှုတွေမကြာခဏရှိတတ်တာကြောင့် စည်ပင်အမှိုက်ကားတွေ လည်း မြို့ပြင် ငါးမိုင်ထိသွား မပစ်ရဲကြဘူးလို့ ဆိုပါတယ်။
စစ်ကိုင်းတိုင်းအထက်ပိုင်း၊ ကသာမြို့နယ် ဧရာဝတီမြစ်အရှေ့ခြမ်း၊ ရွှေလီမြစ်ရဲ့ တောင်ဘက်ခြမ်းက လှေဘို၊ အင်းကြီး၊ မယ်ငို၊ တက်တူရွယ်နဲ့ သာယာကုန်းကျေးရွာတွေကို စစ်ကောင်စီတပ်ဖွဲ့တွေက ဖေဖော်ဝါရီ ၁၁ ရက်ကစပြီး မီးရှို့ခဲ့ပြီး ရွာကနေ ပြန်ထွက်သွားတဲ့အချိန် မြေမြှုပ်မိုင်းတွေ ထောင်ထားခဲ့တာကြောင့် ကျေးရွာက ပြည်သူတွေ နေရပ်မပြန်နိင်သေးသလို ရွာကိုပြန်လာဖို့ အခက်အခဲဖြစ်နေကြပါတယ်။
ကသာမြို့နယ် ပ.က.ဖ တာဝန်ခံက “(--)တွေ ဆုတ်သွားတော့ ရွာတွေကို မြေမြှုပ်မိုင်းထောင်ထားခဲ့တယ်။ မနေ့က အင်းကြီးရွာကို ပြန်ကြည့်ဖို့ ပြန်လာတဲ့ ကလေးတယောက် ဆိုင်ကယ်စီးလာရင်း ရွာမှာ မိုင်းထိတယ်။ ဆိုင်ကယ်တော့ တော်တော်လေးပျက်စီးသွားတယ်၊ လူကတော့ ဒဏ်ရာရတယ်။ ပြီးတော့ နွားတကောင်လည်း မိုင်းနင်းမိပြီးတော့ သေသွားတယ်။ အဲလို မိုင်းတွေထောင်ထားတော့ ရွာကိုပြန်ဝင်ဖို့ ခက်နေတယ်။ မီးတွေလည်း ရှို့ခံထားရတယ်။ နေအိမ်တွေ ဘယ်လောက်ရှို့ခံရတယ် ဆိုတာတွေလည်း ရွာကိုသွားမရတော့ မသိနိုင်သေးဘူး။”လို့ ပြောပါတယ်။
မီးရှို့ခံထားရတဲ့ ကျေးရွာတွေကိုတော့ ပြည်သူ့ကာကွယ်ရေးတပ်ဖွဲ့တွေက လုပ်ဆောင်သင့်တာတွေ လုပ်ဆောင်ပြီး လုံခြုံစိတ်ချရတဲ့အချိန်မှ ကျေးရွာက ပြည်သူတွေကို ရွာထဲပြန်ဝင်ခိုင်းဖို့ အစီအစဉ်တွေ ပြုလုပ်ထားတယ်လို့လည်း တာဝန်ရှိသူတွေကနေ သိရပါတယ်။ ကျေးရွာကို ပြည်သူတွေ ပြန်မဝင်နိုင်သေးတာဟာ စစ်ကောင်စီ ကင်းပုန်းတွေ ရှိနေနိုင်တာနဲ့ စစ်ကောင်စီတပ်ဖွဲ့တွေ ထောင်ထားတဲ့ မြေမြှုပ်မိုင်းတွေကြောင့် ဖြစ်တယ်လို့ သိရပါတယ်။
မီးရှို့ခံရတဲ့ ကျေးရွာ ၅ ရွာမှာ အင်းကြီးနဲ့ လှေဘိုရွာဟာ အိမ်ခြေ ၃၀၀ ကျော်ရှိတဲ့ ရွာကြီးတွေဖြစ်သလို ကျန်သုံးရွာဟာ အိမ်ခြေ ၁၅၀ ကနေ ၂၀၀ ကြားရှိတဲ့ ရွာတွေဖြစ်ပြီး မီးရှို့ခံရတဲ့ နေအိမ်အတိအကျကိုတော့ မသိရသေးဘူးလို့ ကသာမြို့နယ် ပ.က.ဖ တာဝန်ခံက ပြောပါတယ်။
“ဒီ အင်းကြီးနဲ့ လှေဘိုရွာက ရွာအကြီးတွေဖြစ်တယ်။ အိမ်ခြေအရေအတွက် များနိုင်တာ ရွာလုံးကျွတ်နီးပါး ရှို့ခံရတာက အင်းကြီးရွာဖြစ်မယ်။ လှေဘိုကတော့ တဝက်ကျော်ကျော် ရှို့ခံရတယ်။ မယ်ငိုနဲ့ တက်တူရွာလည်း ရွာလုံးကျွတ် ရှို့ခံရတယ်လို့ပဲ ကြားသေးတယ်။ အခက်အခဲအမျိုးမျိုးကြောင့် အတိအကျ မသိရသေးဘူး။ အိမ်တချို့တွေကတော့ ခြံဝန်းတွေ ဝေးတော့ မလောင်ဘဲ ကျန်ခဲ့တဲ့အိမ်တွေလည်း ရှိတယ်။”
ရွာတွေကို မီးရှို့ခဲ့တဲ့ စစ်ကောင်စီစစ်ကြောင်းဟာ ဖေဖော်ဝါရီ ၁၄ ရက် မနက်ပိုင်း ရွာကနေ ထွက်ခွာသွားခဲ့ပြီး ထီးချိုင့်မြို့နယ်ဘက်ကို စစ်ကြောင်းထိုး ထွက်သွားတယ်လို့ သိရပါတယ်။
ကသာမြို့နယ်က ကျေးရွာတွေဟာ စစ်ကောင်စီ စစ်ကြောင်းထိုးပြီး ရွာထဲဝင်လာတဲ့အချိန် ထွက်ပြေးတိမ်းရှောင်လေ့ရှိကြပြီး စစ်ကြောင်းတွေ ပြန်ထွက်သွားတဲ့အချိန် ရွာတွေကို ပြန်ဝင်လေ့ရှိတာ ဖြစ်ပါတယ်။
