ပါကစ္စတန်နိုင်ငံမြို့တော် အစ္စလာမာဘတ်က စစ်ဆေးရေးဂိတ်တစ်ခုမှာ ဒီဇင်ဘာ ၂၃ ရက် မနက်ပိုင်းက အသေခံကားဗုံး ဖောက်ခွဲမှုတစ်ခုအတွင်း ရဲ တယောက် အပါအဝင် လူ ၃ ယောက်သေဆုံးပြီး တခြားသူ ၆ ယောက် ထက်မနည်း ဒဏ်ရာရရှိခဲ့ပါတယ်။
မနက် ၁၀ နာရီ ၁၅ မိနစ်လောက်မှာ အစ္စလာမာဘတ် ရဲတပ်ဖွဲ့ဟာ အမျိုးသားတယောက်နဲ့ အမျိုးသမီးတယောက် မောင်းနှင်လာတဲ့ ကားကို တွေ့ရှိခဲ့ကာ ရဲတွေက ကားကိုရပ်ပြီး ရှာဖွေချိန်မှာတော့ အဲဒီအမျိုးသားက ဗုံးကို ဖောက်ခွဲလိုက်တာပါ။
ပေါက်ကွဲမှု ဖြစ်ပြီးပြီးချင်းမှာပဲ ရဲတပ်ဖွဲ့ဝင်တွေဟာ ပေါက်ကွဲမှုဖြစ်ပွားတဲ့နေရာကို ဝိုင်းရံလိုက်ပြီး အဲဒီဧရိယာပြင်ပကို ပိတ်ဆို့ခဲ့ပါတယ်။
ဗုံးခွဲတိုက်ခိုက်မှုဟာ နိုင်ငံရဲ့ ပါလီမန်နဲ့ အဆင့်မြင့်ရုံးတွေဆီကို ဦးတည်နေတဲ့ လမ်းမကြီး တစ်ခုပေါ်ရှိ ရဲဌာနချုပ်အနီးမှာ ဖြစ်ပွားခဲ့တာပါ။
ဒီအကြမ်းဖက်လုပ်ရပ်ကို ဒီဇင်ဘာ ၂၃ ရက်မှာ ပါကစ္စတန်ဝန်ကြီးချုပ် ရှာဘက်စ် ရှာရစ်ဖှ် က ရှုတ်ချလိုက်ပါတယ်။
နောက်ပိုင်းမှာ ပါကစ္စတန် တာလီဘန်လို့ လူသိများတဲ့ တယ်ရိခ် အီ တာလီဘန် ပါကစ္စတန် (TTP) အဖွဲ့က အသေခံဗုံးခွဲမှုမှာ တာဝန်ရှိကြောင်း ထုတ်ဖော်ပြောဆိုခဲ့ပြီး သူတို့ရဲ့ခေါင်းဆောင်တစ်ဦး သေဆုံးမှုအတွက် လက်စားချေတာ လို့ ဆိုပါတယ်။
