မိုးသည်းထန်စွာ ရွာသွန်းပြီး ရေတိုက်စားမှုကြောင့် စစ်ကိုင်းတိုင်း၊ ရေဦး-ကလေးမြို့သွား မဟာမြိုင်လမ်းပိုင်း စက်တင်ဘာ ၁၉ ရက်နေ့ မနက် ၇ နာရီလောက်က ပျက်စီးသွားတာကြောင့် ခရီးသွားကား ရာနဲ့ချီ ပိတ်ဆို့နေတယ်လို့ ဒေသခံတွေက ပြောပါတယ်။
အဆိုပါ ပျက်စီးသွားတဲ့ လမ်းပိုင်းဟာ မင်းကင်းမြို့နယ်၊ ပျဉ်ကိုင်းကျေးရွာအနီ မိုင်တိုင် ၆၃ မိုင်နဲ့ ၆၄ မိုင်ကြားမှာ ပျက်စီးတာလို့ ဒေသခံတွေက ပြောပါတယ်။
“ညက မိုးရွာတာများတော့ ကားလမ်းကို ရေကျော်ပြီး ရေတိုက်စားကာ လမ်းပျက်တာပါ။ သွားလို့တော့ မရနိုင်လောက်ဘူး။ ကွင်းလမ်းလည်း မရှိဘူး ထင်တယ်ဗျ။ သွားရမလားဆိုပြီး ကားသေးတစီး မောင်းကြည့်တော့ ရေထဲပါသွားသေးတယ်။ နောက်ထပ်ကုန်ကားတစီးလည်း ထပ်မောင်းကြည့်တယ်၊ အဲကားကတော့ ချောက်ထဲကျပြီး မှောက်သွားသေးတယ်။ လူအသေအပျောက်တော့ မရှိဘူး။ ကားကတော့ ခေါင်းကတော့ ပိန်ရှုံ့သွားတယ်” လို့ ကားသမားတဦးက ပြောပါတယ်။
အခုလို ကားလမ်း ပျက်စီးသွားတာ တနေရာတည်း မဟုတ်ဘဲ လေး ငါးနေရာလောက် တာဘောင်ကျိုးကျ ပျက်စီးသွားတာလို့ ဒေသခံတွေက ပြောပါတယ်။
“ပိတ်မိနေတာက ရေဦးဘက်ကနေ ကလေးကို သွားမယ့်ကားတွေရော၊ ကလေးဘက်ကနေ ရေဦး ဘက်သွားမယ့် ကားတွေရော နှစ်ဖက်ပိတ်မိနေတာ။ အစီးအရေကတော့ အနည်းဆုံး ၁၀၀ အထက်မှာရှိမယ်။ တချို့က လမ်းပျက်တာ မသိတော့ ထပ်ရောက်လာတာတွေလည်း ရှိတယ်။ တချို့ကားတွေကတော့ လာလမ်းအတိုင်း နောက်ကြောင်းပြန်မောင်းတဲ့ ကားတွေလည်းရှိတယ်ဗျ” လို့ ဒေသခံရွာသားတဦးက ပြောပါတယ်။
အဆိုပါ ကလေး-ရေဦးလမ်းကို မဟာမြိုင်လမ်းလို့ ဒေသတွင်းမှာ ခေါ်ဆိုကြပြီး အဲဒီလမ်းဟာ မန္တလေး၊ မုံရွာ၊ ရွှေဘိုကနေ မြန်မာပြည်အထက်ပိုင်း ကလေး၊ တမူးကိုသွားတဲ့ အရေးပါတဲ့ လမ်း ဖြစ်တယ်လို့ ဒေသခံတွေက ပြောပါတယ်။
သင်္ကြန်ရုံးပိတ်ရက်မှာ နေရပ်ပြန်သူတွေနဲ့ ပင်လယ်ကမ်းခြေဒေသကို အပန်းဖြေသွားတဲ့ ခရီးသွားကားတွေများတာကြောင့် ရန်ကုန်- ပုသိမ် ကားလမ်း ဧရာဝတီတိုင်းအဝင်မှာ ဧပြီ ၉ ရက် ဒီနေ့ မနက်ပိုင်းက စတင်ကာ ကားတွေရာချီ လမ်းပိတ်ဆို့နေပါတယ်။
ညောင်တုန်း ပန်တိုင်ဂိတ်မှာ ယာဉ်စစ်ဆေးရေးဂိတ်ရှိတာကြောင့် လာတဲ့ ကားအရေအတွက်များလို့ စစ်ဆေးတဲ့နေရာမှာ ကြန့်ကြာပြီး ကားတန်းခုလို ပိတ်သွားတာဖြစ်တယ်လို့ ဒေသခံတွေက ပြောပါတယ်။
"ဒီမနက်ပိုင်း စပိတ်တာ အဓိကပိတ်တာတော့ ပန်တိုင်ဂိတ်မှာ နာရီပိုင်း လောက်စောင့်မယ်ထင်တယ်။ အဓိကတော့ ကမ်းခြေသွားတဲ့ ကားတွေနဲ့ နေရပ်ပြန်တဲ့ သူတွေများလို့ ပိတ်သွားတာ"လို့ ခရီးသွားတဦးက ပြောပါတယ်။
ရန်ကုန် - ပုသိမ်ကားလမ်း ပန်တိုင်ဂိတ်မှာ ကမ်းခြေလာတဲ့ ဧည့်သည်ကားတွေနဲ့ နေရပ်ပြန်တဲ့ ခရီးသွားကားတွေကို မှတ်ပုံတင်နဲ့ ကိုဗစ်ထောက်ခံစာ စစ်ဆေးတာတွေကြောင့် ခုလို ကားတန်း ရာနဲ့ချီပိတ်သွားတာလို့ ဆိုပါတယ်။
သင်္ကြန်ပိတ်ရက်အတွက် ကမ်းခြေဒေသတွေဖြစ်တဲ့ ချောင်းသာနဲ့ ငွေဆောင်မှာ ရှိတဲ့ တည်းခိုခန်းတွေနဲ့ ဟိုတယ်တွေမှာတော့ အခန်းအားလုံးနီးပါ ဘိုကင်တွေနဲ့ ပြည့်နေပြီဖြစ်တယ်လို့ ဒေသခံ ဟိုတယ်ခရီးသွား လုပ်ငန်းရှင်တွေထံက သိရပါတယ်။
