ရခိုင်ပြည်နယ်၊ စစ်တွေ-ပုဏ္ဏားကျွန်း ကားလမ်းပိတ်ထားတာကြောင့် ဘင်္ဂလားဒေ့ရှ်နိုင်ငံသို့ ရေထွက်ကုန်တွေတင်ပို့သူတွေအခက်ကြုံနေပြီး  တောင်ကုတ်ကနေတဆင့်ပို့ဖို့ ကြိုးစားနေတာကြောင့် လမ်းခရီးကြန့်ကြာ အရှုံးပေါ်နေတယ်လို့  ငါးမြစ်ချင်းတင်ပို့တဲ့ ကုန်သည်တွေက ပြောပါတယ်။

မြန်မာဘက်ကနေ ဘင်္ဂလားဒေ့ရှ်နိုင်ငံသို့ ရေထွက်ကုန်တွေတင်ပို့ရာမှာ မောင်တောနယ်စပ် ကုန်သွယ်ရေးစခန်းကို အဓိကထားတင်ပို့နေကြရာက စစ်ကောင်စီက မောင်တော-အငူမော်လမ်းကို သြဂုတ် ၁၄ ရက်ကစပြီး ဒီကနေ့အထိ ပိတ်ထားလို့ မောင်တောနယ်စပ်ကုန်သွယ်ရေးစခန်းကနေ ငါးမြစ်ချင်းတင်ပို့မှုဟာ အောက်တိုဘာလက စလို့ လုံးဝရပ်သွားခဲ့တာ​ပါ။

ဒါကြောင့် စစ်တွေရွှေမင်းဂံဆိပ်ကမ်းကနေ ဘင်္ဂလားဒေ့ရှ်ဘက်ကို ငါးမြစ်ချင်းတွေ တင်ပို့ခဲ့ကြရာမှာလည်း အခုတဖန် တိုက်ပွဲတွေကြောင့် စစ်တွေ-ပုဏ္ဏားကျွန်းလမ်းကို ထပ်ပိတ်ထားလို့ ငါးကုန်သည်တွေ အခက်အခဲတွေနဲ့ ကြုံတွေ့နေကြရတာပါ။

ဒေသခံ ငါးမြစ်ချင်းကုန်သည်တဦးက “စစ်တွေ-ပုဏ္ဏားကျွန်းလမ်းကို နိုဝင်ဘာ ၁၀ ရက်နေ့ကတည်းက ပိတ်ထားတာ။ ဒီနေ့အထိပြန် မဖွင့်သေးဘူး။ သူတို့ပြောတာကတော လုံခြုံရေးအရ ယာယီပိတ်ထားတာလိုပြောတယ်။ ဘယ်နေ့ပြန်ဖွင့်မယ်ဆိုတာ အတိအကျမသိရဘူး။ ငါးမြစ်ချင်းကားတွေအားလုံး ပြန်လှည့်ပြီး တောင်ကုတ်ကတဆင့် တင်ပို့နိုင်ဖို့ကြိုးစားနေကြတယ်။ တောင်ကုတ်ကနေ ပို့ရင်လည်း ရေယာဥ်တွေကို စစ်တွေလာပြီး စစ်ဆေးခံရမှာဆိုတော့ အချိန်တွေများစွာကြန့်ကြာမယ်။ ရေခဲတွေအရည်ပျော်ကုန်ပြီး ငါးအရည်အသွေးကျဆင်းသွားမယ်။ ဆုံးရှုံးမှုတွေများစွာ ရင်ဆိုင်နေကြရတယ်"လို့ ပြောပါတယ်။

စစ်တွေ-ပုဏ္ဏားကျွန်းကား လမ်းပိတ်ထားလို့ ငါးမြစ်ချင်းကား အစီးရေ ၃၀ လောက် ငါးတန်ချိန် ၁၅၀ ကျော် ပျက်စီးသွားပါက ငွေကျပ် သိန်း သောင်းနဲ့ချီဆုံးရှုံးသွားနိုင်တဲ့အတွက် တောင်ကုတ်ကနေတဆင့် ဘင်္ဂလားဒေ့ရှ်သို့ အမြန်ဆုံးတင်ပို့နိုင်ဖို့ ကြိုးစားနေကြရပါတယ်။

ငါးမြစ်ချင်းကုန်သည်တယောက်က "ငါးကားတွေရဲ့ အအေးခန်းတွေကို အချိန်ကြာမြင့်စွာ စက်နှိုးထားရတာက ဆီစျေးတွေတက်နေတာကြောင့် ကုန်ကျမှုအပိုင်းများစွာရှိနေတယ်။ ကုန်သည်တွေအနေနဲ့ အရှုံးနဲ့ရင်ဆိုင်နေကြရပြီး များစွာအခက်တွေ့နေရတယ်။"လို့ ပြောပါတယ်။

စစ်ကောင်စီတပ်နဲ့ ရက္ခိုင့်တပ်တော်(AA)တို့အကြား စစ်ရေးပဋိပက္ခကြောင့် စစ်တွေ-ပုဏ္ဏားကျွန်း လမ်းကို ပြီးခဲ့တဲ့နိုဝင်ဘာလ ၁၀ ရက်ကစလို့ အကန့်အသတ်မရှိ စစ်ကောင်စီက ပိတ်ထားလိုက်တာကြောင့် လတ်တလော ကုန်တင်ကားတွေနဲ့ ခရီးသည်တင်ကားတွေ အပါအဝင် ကားအစီးရေ ၃၀၀ လောက် ပိတ်မိနေပါတယ်။

ရခိုင်ပြည်နယ်၊ စစ်တွေ-ပုဏ္ဏားကျွန်းကားလမ်း ပိတ်ထားတာကြောင့် စစ်တွေမှာ ကုန်စိမ်း ဟင်းသီးဟင်းရွက်တွေ ပြတ်လပ်ပြီး စျေးမြင့်တက်နေလို့ ပြည်သူတွေ အခက်တွေ့နေရတယ်လို့ သစ်သီးပွဲရုံပိုင် ရှင်တွေနဲ့ ဟင်းသီးဟင်းရွက်ရောင်းချသူတွေက ပြောပါတယ်။

စစ်တွေမှာ သစ်သီးမျိုးစုံရောင်းတဲ့ အမျိုးသမီးတယောက်က “လက်ကျန်တွေကို ရောင်းနေရတာ။ ဒီနေ့တရက်စာပဲ ကျန်တော့တယ်။ ကားလမ်းတွေ ပိတ်ထားတယ်ဆိုတော့ မနက်ဖြန်ဆိုရင် ရောင်းစရာမကျန်တော့ဘူး။ ဟင်းသီးဟင်းရွက်တွေလည်း မကျန်တော့ဘူး။ ငရုတ်သီးက စျေးအမြင့်ဆုံးဖြစ်နေတယ်။ ရခိုင်မှာက ဆောင်းရာသီမှ စိုက်ပျိုးသီးနှံတွေ စိုက်ကြတာ။ ရန်ကုန်ကလာတဲ့ ဟင်းသီးဟင်းရွက်တွေကိုပဲ အားထားနေကြရတာလေ” လို့ ပြောပါတယ်။

စစ်ကောင်စီတပ်နဲ့ ရက္ခိုင့်တပ်တော် (အေအေ) တို့ရဲ့ စစ်ရေးပဋိပက္ခကြောင့် စစ်တွေ-ပုဏ္ဏားကျွန်းလမ်းကို နိုဝင်ဘာ ၁၀ ရက် မနက်ကစပြီး အကန့်အသတ်မရှိ စစ်ကောင်စီက ပိတ်ထားလိုက်တာကြောင့် ကုန်တင်ကားတွေနဲ့ ခရီးသည်တင်ကားတွေ အပါအဝင် ကားအစီးရေ ၂၀၀ လောက်အထိ ပိတ်မိနေတယ်လို့ ဒေသခံတွေဆီက သိရပါတယ်။

ရခိုင်ပြည်နယ်မှာ ဆောင်းရာသီမှသာ ဟင်းသီးဟင်းရွက်နဲ့ ဆောင်းသီးနှံတွေ စိုက်ပျိုး ကြရတာကြောင့် မန္တလေး၊ ရန်ကုန်၊ အောင်ပန်း စတဲ့မြို့တွေက အသီးအနှံတွေကို ရခိုင်ပြည်သူတွေ မှီခိုနေကြရတာပါ။

ကားလမ်းတွေကို အမ်းမြို့နယ်မှ စတင်စစ်ဆေးပြီး အဆင့်ဆင့်စစ်ဆေးခံရကာ ကျောက်တော်စစ်ဆေးရေးဂိတ်မှာ တညအိပ်ရသလို စစ်တွေမြို့အဝင် ကျောက်တန်းစစ်ဆေးဂိတ်မှာပါ တညထပ်အိပ်နေရတာကြောင့် ကုန်စိမ်းတွေ ပျက်စီးပြီး ကုန်စျေးနှုန်းမြင့်တက်လာလို့ ဆင်းရဲသား ပြည်သူတွေ အခက်တွေ့နေကြရတယ်လို့ ကုန်စည်ပွဲရုံပိုင်ရှင် အမျိုးသမီးတယောက်က ပြောပါတယ်။

“ကျမတို့ ဒီနေ့ မနက်ကတည်းက ဟင်းသီးဟင်းရွက်တွေ ဝင်လာမယ့်ကားတွေကို စောင့်နေခဲ့ကြတယ်။ ကားတစီးမှ ဝင်မလာတော့ ဘာမှဝယ်မရခဲ့ပါဘူး။ ငရုတ်သီးအစိမ်း ၁ ပိဿာ ကို ၂၀,၀၀၀ နဲ့တောင် ရှာမရတော့ဘူး။ ကွမ်းရွက် တဘီရာ (အရွက် ၈၀) ကို ၇၀၀၀ ကျပ်အထိ စျေးမြင့်သွားပါတယ်။ စစ်တွေမှာက နယ်ကလာတဲ့ ကွမ်းရွက်တွေကို မှီခိုနေကြရတာ။ တော်တော်လေး အခက်တွေ့နေကြတယ်။ နောက်ဆို ပိုဆိုးလာမယ်ထင်ပါတယ်။”

လက်ရှိ စစ်တွေ-ပုဏ္ဏားကျွန်းလမ်းမှာ ပိတ်မိနေကြတဲ့ကားတွေအနက် ခရီးသည်တင် မှန်လုံကားငယ်တချို့ လာရာလမ်းအတိုင်း လှည့်ပြန်သွားကြပေမဲ့ ကုန်တင်ကားကြီးတွေကတော့ လှည့်ပြန်သွားရင် ဆုံးရှုံးနစ်နာမှု များပြားနိုင်တဲ့အတွက် ​အရဲစွန့်ကာ စောင့်ဆိုင်းနေကြရတယ်လို့ ကုန်တင်ကားမောင်းသူ တယောက်က ပြောပါတယ်။