စစ်ကောင်စီလက်အောက်ခံ စီးပွားကူးသန်းဝန်ကြီးဌာနက ထုတ်ပြန်တဲ့ ၂၀၂၂ အတွက် ကားတင်သွင်းခွင့်မူဝါဒကြောင့် ကားအရောင်းစင်တာတွေ ပိတ်ရမယ့် အခြေအနေမျိုးနဲ့ ကြုံတွေ့နေရတယ်လို့ ကားအရောင်းစင်တာဖွင့်လှစ် ကားရောင်းချသူတွေက ပြောပါတယ်။
စစ်ကောင်စီက ပြည်တွင်းမှာ အမေရိကန်ဒေါ်လာ လိုအပ်ချက် ရှိနေတာကြောင့် ကားပါမစ် (ပြည်ပမှ ကားအသစ်တင်သွင်းခွင့်) တွေကို ၂၀၂၁ ခုနှစ်၊ စက်တင်ဘာလကတည်းက ရပ်ဆိုင်းခဲ့တာဖြစ်ပြီး ၂၀၂၂ ခုနှစ်အတွက် ကားတင်သွင့်ခွင့်မူဝါဒ ထွက်ရှိလာတဲ့အခါမှာလည်း ကားသစ်တင်သွင်းခွင့်ကို ကားအရောင်းစင်တာတွေကို ချန်လှပ်ထားပါတယ်။
ဒီမူဝါဒကြောင့် ကားအရောင်းစင်တာအများစုက ရပ်တည်ဖို့တောင် ခက်ခဲနေတဲ့အကြောင်း ကားအရောင်းစင်တာ လုပ်ငန်းရှင်တဦးက “သူက ၂ မျိုး ရှိတယ်ဗျ။ brand new car showroom (ကားအရောင်းပြခန်း) နဲ့ အရောင်းစင်တာ ကမတူဘူး။ လုပ်ငန်းလိုင်စင်အမျိုးအစားလည်း မတူးဘူးနော်။ showroom တွေက အသစ်ကိုပေးတဲ့ dealer လိုင်စင်ယူထားတဲ့ သူတွေ။ သူတို့က အရေအတွက် နည်းတယ်။ Toyota တို့ ဘာတို့ပေါ့ဗျာ။ သူတို့ကိုတော့ အသစ်တင်သွင်းခွင့် ပြန်ပေးထားပါတယ်။ ပေးတယ်ဆိုတာကလည်း အရေအတွက်တော့ ကန့်သတ်ထားတယ်။ အရင်တုန်းက အစီး ၂၀၀ ပေးရင် အခုက တခါပေးရင် အစီး ၂၀ နဲ့ နောက်ထက်ရဖို့အတွက် ထပ်စောင့်ဖို့ကလည်း ဘယ်လောက်အထိ စောင့်ရမလဲ မသိဘူး။ ဆိုတော့ ကားအရောင်းပြခန်းသမားတွေက နည်းနည်းတော်သေးတယ်။ ကားအရောင်းစင်တာတွေကတော့ ပိတ်ရမလို ဖြစ်နေပြီ။ ဘာလို့လဲဆို အရောင်းစင်တာတွေကိုတော့ လုံးဝမပေးဘူး။ ဇီးရိုးပဲ။ လုံးဝမပေးတဲ့အတွက် သူတို့တွေက ရပ်တည်ဖို့ ခက်လာပြီး အများစုက ပိတ်ရမလို ဖြစ်နေရပြီ” လို့ ပြောပါတယ်။
ဒီအကျိုးဆက်ကြောင့် ရန်ကုန်ကားဝယ်ရောင်းစျေးကွက်မှာ ကားသစ်တွေရဲ့စျေးနှုန်းက တက်သွားခဲ့ပြီး အရောင်း အဝယ်ကတော့ အေးသွားပါတယ်။
ပြည်တွင်းမှာ SKD စနစ်နဲ့ထုတ်လုပ်ပြီး ကားသစ်ရောင်းချနေတဲ့ car showroom ပိုင်ရှင်တဦးက “သူတို့ရဲ့မူဝါဒကတော့ ပြည်တွင်းထုတ်လုပ်မှုကို အားပေးတာပေါ့နော်။ ဒါကြောင့် MIC ခွင့်ပြုချက်နဲ့ SKD ထုတ်ကားတွေကို မပိတ်ထားဘူး။ ပြီးတော့ brand new ကားစျေးကွက်မှာတော့ SKD က ၈၀ ရာခိုင်နှုန်းလောက် ရှိတာကြောင့် စျေးကွက် အပေါ်မှာ အများကြီးတော့ ရိုက်ခတ်မှု မရှိနိုင်ပေမယ့် ကားအရောင်းစင်တာတို့၊ အရောင်းပြခန်းထောင်ထားတဲ့ သူတွေကတော့ လုပ်ရကိုင်ရတာ ခက်ခဲကျပ်တည်းသွားတာပေါ့” လို့ ပြောပါတယ်။
လက်ရှိပြည်တွင်းမှာ ဒေါ်လာဈေးတက်နာနဲ့အတူ ကားဈေးကွက်မှာ SKD ကားတွေ စျေးတက်နေတယ်လို့ သိရပါတယ်။
ဒါ့အပြင် သင်္ဘောတင်ခတွေလည်း ၄ ဆ၊ ၅ဆ တက်သွားတဲ့အတွက်ကြောင့် ပြည်ပကသွင်းတဲ့ ကားတွေလည်း စျေးတွေကတက်သွားကာ အရောင်းအဝယ်တွေ အေးနေတယ်လို့ သိရပါတယ်။
မြန်မာပြည်တွင်း ကားအရောင်းစင်တာတွေ မော်တော်ယာဉ်တင်သွင်းခွင့်လျှောက်ထားမှုအတွက် လုပ်ငန်းဆောင်တာတွေကို လာမယ့် ၂၀၂၂ ဇန်နဝါရီလ ၃ ရက်က စပြီး ပြန်လည်လက်ခံဆောင်ရွက်သွားမယ်လို့ စစ်ကောင်စီ စီးပွားကူးသန်းဝန်ကြီးဌာနလက်အောက်ခံ ကုန်သွယ်ရေးဦးစီးဌာနက ထုတ်ပြန်ထားပါတယ်။
ဒါပေမဲ့ ဒါဟာ မော်တော်ယာဉ်အသစ်၊ အဟောင်းအတွက် တင်သွင်းခွင့်ကို ပြန်လက်ခံတာမဟုတ်တဲ့အတွက် အများက ထင်နေကြသလို ကားတင်သွင်းခွင့်တွေ ပြန်ပေးတာမဟုတ်ဘူးလို့ ကားအရောင်းစင်တာပိုင်ရှင်တဦးက ဒီဗွီဘီကို ပြောပါတယ်။
“အမှန်က အဲ့လို မဟုတ်ဘူးဗျ။ သူတို့ နားလည်မှုလွဲကြတာ။ ကားအသစ်ရယ်၊ အဟောင်းရယ် တင်သွင်းခွင့်ကို ပြောနေတာ မဟုတ်ဘူး။ အမှန်တကယ်က လုပ်ငန်းတွေ ရပ်ဆိုင်းသွားတာကို ရည်ညွှန်းတာပါ။ လုပ်ငန်းတွေ ရပ်ဆိုင်းသွားတာကို ပြန်ပြီးတော့ ဖွင့်ပေးတာပါ။ အများက ထင်နေသလို ကားတွေ ပြန်တင်သွင်းခွင့်ပြုတာ မဟုတ်ဘူး။ သူတို့ ထုတ်ပြန်ချက်နဲ့ သူတို့ ပြန်ရှုပ်နေတာ။”
စစ်ကောင်စီက ပြည်တွင်းမှာ အမေရိကန်ဒေါ်လာ လိုအပ်ချက်ရှိနေတာကြောင့် ကားပါမစ် (ပြည်ပမှ ကားအသစ်တင်သွင်း ခွင့်) တွေကို ပြီးခဲ့တဲ့ စက်တင်ဘာလကတည်းက ရပ်ဆိုင်းခဲ့တာပါ။
ဒီအကျိုးဆက်ကြောင့် ရန်ကုန်ကားဝယ်ရောင်းစျေးကွက်မှာ ကားစျေးက တက်သွားခဲ့ပြီး အရောင်းအဝယ်လည်း လိုက်တယ်လို့ ကားဝယ်ရောင်းလုပ်ကိုင်သူတဦးကလည်း ပြောပါတယ်။
“ကားပါမစ် ပိတ်ပိတ်ချင်းကာလတုန်းက နည်းနည်းဝယ်လိုအားများခဲ့တယ်။ တဘက်ကလည်း အဲ့အချိန်က ဒေါ်လာတန်ဖိုးက တက်နေတာလည်း ပါတာပေါ့နော်။ ဒါကြောင့် တချို့ကလည်း ဒေါ်လာအစား ကားဝယ်လိုက်ကြတာပေါ့နော်။ ပြီးတော့ နောက်တချက်က ကားပါမစ်ပိတ်ပေမယ့် SKD ကတော့ မပိတ်ထားဘူးနော်။ ဒါပေမယ့် SKD ထုတ်ကားတွေက ကိုဗစ်ကြောင့် စက်ရုံတွေ မလည်နိုင်ကြသေးဘူး။ အခုတော့ စက်ရုံတွေက ပြန်လည်နေကြပြီနော်။ အဲ့တော့ ကျနော် ထင်တယ်။ ဒီဇင်ဘာအကုန်လောက်ဆိုရင် SKD ထုတ်ကားတွေ ပြန်ထွက်ကြလိမ့်မယ်။ ဆိုတော့ ကားရှားသွားတဲ့ အကြောင်းအရင်းက SKD မလည်ကြတဲ့ အချက်တခုလည်း ပါတယ်။ ဒါပေမဲ့ SKD စက်ရုံတွေကိုတော့ ဘယ်သူမျှ ပိတ်ခိုင်းတာတော့မဟုတ်ဘူး။ ကိုယ့်ဘာသာပိတ်ကြတာလေ။ အဲ့အချက်တွေစုံပြီးတော့ ကားစျေးက တက်သွားခဲ့ပါ။ အရောင်းအဝယ်တွေလည်း ကောင်းခဲ့တယ်။ ပြီးခဲ့တဲ့ စက်တင်ဘာလကုန်နဲ့ အောက်တိုဘာလဆန်းအချိန်တုန်းကလေ။ ဒါပေမဲ့ အခုတော့ အရောင်းအဝယ်တွေကလည်း ပြန်အေးသွားပြီနော်။ စျေးကတော့ မကျဘူး။ ဘာလို့လဲဆို ဝယ်ထားတဲ့ သူက နှစ်ဆင့်ဖြစ်သွားလို့လေ။ လက်ရှိကားစျေးကလည်း အေးပါတယ်။”
စစ်ကောင်စီလက်အောက်ခံ ကုန်သွယ်ရေးဦးစီးဌာနအနေနဲ့ အရောင်းစင်တာ၊ အရောင်းပြခန်းတွေရဲ့ မော်တော် ယာဉ်တင်သွင်းခွင့်လျှောက်ထားမှုတွေကို စိစစ် ခွင့်ပြုဆောင်ရွက်ပေနေပြီး ၂၀၂၁ခုနှစ် မကုန်ခင် နှစ်ချုပ်စာရင်းရှင်းလင်းတာနဲ့ လိုအပ်တဲ့ ပြင်ဆင်မှုတွေ ဆောင်ရွက်ဖို့ရှိတယ်လို့ ထုတ်ပြန်ချက်မှာ ဖော်ပြပါတယ်။
ဒါကြောင့် အရောင်းစင်တာပြခန်းတွေက မော်တော်ယာဉ်တင်သွင်းခွင့်လျှောက်ထားမှုတွေကို ၂၀၂၁ ဒီဇင်ဘာ ၁၇ ရက်အထိ လက်ခံဆောင်ရွက်ပေးမှာဖြစ်ပြီး ၂၀၂၂ ခုနှစ်အတွက် တင်သွင်းခွင့်လျှောက်ထားတာကို ၂၀၂၂ ဇန်နဝါရီ ၃ ရက်ကစတင် ပြန်လည်ဆောင်ရွက်ပေးမယ်လို့ ဆိုပါတယ်။
