အသင်းနောက်ခံလူ ကိုင်လီဝေါ်ကာရဲ့လုပ်ရပ်ဟာ မိုက်မဲပြီး ၃ ပွဲပယ်ပြစ်ဒဏ်နဲ့ ထိုက်တန်တယ်လို့ မန်စီးတီးနည်းပြ ဂွါဒီယိုလာက ပြောပါတယ်။
ဝေါ်ကာဟာ ဂျာမန်ကလပ်လိုက်ဇစ်ကို ၂ ဂိုး ၁ ဂိုး နဲ့ ရှုံးနိမ့်ခဲ့တဲ့ ချန်ပီယံလိဂ်အုပ်စု နောက်ဆုံးပွဲစဉ်မှာ တိုက်ရိုက်အနီကတ်ပြပြီး ထုတ်ပယ်ခံခဲ့ရတာပါ။
လိုက်ဇစ်တိုက်စစ်မှူး အန်ဒရီဆေးလ်ဗားကို အနောက်ကနေ ဖြတ်ကန်ခဲ့တာကြောင့် တိုက်ရိုက် အနီထိခဲ့ပြီး ၃ ပွဲပယ်ပြစ်ဒဏ်ချမှတ်ခံခဲ့ရပါတယ်။
ဝေါ်ကာအနေနဲ့ အမှတ်မလိုအပ်တော့တဲ့ ပွဲစဉ်မှာ မလိုအပ်တဲ့ ပြစ်ဒဏ်ကျူးလွန်မှုဟာ မိုက်မဲတဲ့လုပ်ရပ်ဖြစ်ပြီး ဒေါသထွက်စရာကောင်းခဲ့တယ်လို့ နည်းပြဂွါဒီယိုလာက ပြောပါတယ်။
“မိုက်မဲတဲ့ အရာတခုလုပ်ခဲ့တာဖြစ်လို့ သူက ၃ ပွဲပယ်ပြစ်ဒဏ်နဲ့ ထိုက်တန်ပါတယ်။ ဒီလိုလုပ်ရပ်မျိုးမှာ ကိုင်လီအပေါ် ကျနော်စာနာပေးနိုင်မှာမဟုတ်ပါဘူး။ သူ့လုပ်ရပ်အတွက် အခုထိတောင် ဒေါသထွက်နေဆဲပါ။ ဒီကိစ္စက မလုပ်သင့်ဘူးဆိုတာ သူလည်း သိတာဖြစ်လို့ သူနဲ့ ဆွေးနွေးစရာမလိုပါဘူး။ မန်ယူနိုက်တက်နဲ့ပွဲကို ကြည့်မယ်ဆိုရင် သူက ကျနော်တို့အတွက် အရေးပါတဲ့ ကစားသမားဆိုတာသိကြမှာပါ။ လိုက်ဇစ်နဲ့ပွဲမှာဆိုရင် ကျနော်တို့က အုပ်စုတက်ပြီးသားအခြေအနေ၊ ပွဲကနေလည်း မိနစ် ၈ဝ ရောက်နေချိန်မှာ သူက ဒီလုပ်ရပ်ကို ကျူးလွန်ခဲ့တာပါ။ သူဟာ ၃ ပွဲပယ်ပြစ်ဒဏ်နဲ့ ထိုက်တန်ပါတယ်။ အနာဂတ်အတွက် သင်ခန်းစာယူဖို့ မျှော်လင့်ပါတယ်။”
ဝေါ်ကာရဲ့ ပြစ်ဒဏ်အပေါ် မန်စီးတီးက အယူခံဝင်ခဲ့ပေမယ့်လည်း မလိုအပ်တဲ့ လုပ်ဆောင်မှုဖြစ်တယ်လို့ ဂွါဒီယိုလာက ပြောသွားပါတယ်။
