ဧရာဝတီတိုင်း၊ ပုသိမ်မြို့နယ်မှာ စက်တင်ဘာ ၆ ရက် မနက်ပိုင်းက အမျိုးသားတဦး လမ်းမပေါ် သေဆုံးနေတာကိုတွေ့ရှိခဲ့ပြီး ကိုဗစ်ရောဂါနဲ့ သေဆုံးတာဖြစ်မှာကို စိုးရိမ် စိတ်ပူနေရတယ်လို့ ဒေသခံတွေဆီက သိရပါတယ်။
စိန်ကုန်းကနေ ငွေဆောင်ကိုသွားတဲ့ ကားလမ်းပေါ်မှာ မနက်ပိုင်း သေဆုံးနေတဲ့ အမျိုးသားကို ဒေသခံတွေက တွေ့ရှိခဲ့ပြီး နာရေးကူညီမှုအသင်းကားနဲ့ ဆေးရုံကို ပို့ဆောင်ပေးခဲ့ရပါတယ်။
ဒေသခံတဦးက “တခြားဒဏ်ရာတွေဘာတွေရထားတာမျိုးလည်း မတွေ့ဘူး။ ဒီတိုင်းလမ်းပေါ်မှာ သေနေတာဆိုတော့ ကိုဗစ်နဲ့သေတာမျိုးဖြစ်မှာ စိတ်ပူနေတာ။ ဒီဘက်က ရွာဘက်ဆိုတော့ သိပ်ပြီးတော့လည်း အရင်ကလို MASK တပ်တာမျိုး၊ လက်ဆေးတာမျိုး မရှိတော့ဘူးလေ၊ ဖြစ်ရင် အကုန်ကူးမှာ အဲ့တာကို စိတ်ပူနေရတာ”လို့ ပြောပါတယ်။
ကားလမ်းပေါ်မှာ သေဆုံးခဲ့တဲ့ အမျိုးသားရဲ့ ရုပ်အလောင်းကို ဘက်စုံလူမှုကူညီရေးအဖွဲ့(ပုသိမ်)က ကားအကူအညီနဲ့ ဆေးရုံရင်ခွဲရုံကို ပို့ဆောင်ခဲ့ပြီး လတ်တလော ဘာရောဂါကြောင့် သေဆုံးတယ်ဆိုတာကို မသိရတော့ဘူးလို့ ဆိုပါတယ်။
ဒေသခံအများစုက အခုလတ်တလော လမ်းပေါ်မှာ လူတွေသေဆုံးမှုဟာ ကိုဗစ် ရောဂါကြောင့်ဖြစ်မှာကို စိတ်ပူနေကြရတာ ဖြစ်ပါတယ်။
စက်တင်ဘာ ၇ ရက်ကလည်း ပုသိမ်မြို့နယ်၊ ကမ်းနီကျေးရွာအပိုင်ထဲက မြစ်ထဲမှာ အမျိုးသား တယောက် သေဆုံးနေတာတွေ့ရှိခဲ့တယ်လို့ ဒေသခံတွေက ပြောပါတယ်။
မြန်မာနိုင်ငံမှာ စက်တင်ဘာ ၇ ရက်က ကိုဗစ်-၁၉ အတည်ပြုလူနာ ၂၂၃ ယောက် ထိတွေ့ရှိထားသလို ၁ ပတ်အတွင်း သေဆုံးသူ ၄ ယောက် ထိရှိပါတယ်။
