မွန်ပြည်နယ်၊ ချောင်းဆုံမြို့နယ်မှာ  ပြီးခဲ့တဲ့ သီတင်း ၂ ပတ်အတွင် ကိုဗစ်-၁၉ လူနာ ၁၃ ဦး တွေ့ရှိခဲ့ပြီး ဒေသတွင်းက မြို့နယ်များထက် ကိုဗစ်ပိုးတွေ့ရှိသူ များပြားတယ်လို့ ကျန်းမာရေးဝန်ကြီးဌာန ထုတ်ပြန်ချက်အရ သိရပါတယ်။

ကိုဗစ်ပိုးတွေ့ လူနာဟာ မော်လမြိုင်မြို့မှာ ဒုတိယအများအဆုံးရှိခဲ့ပြီး ပေါင်မြို့နယ်ကတော့ တတိယအများဆုံးလို့ သိရပါတယ်။

ဧပြီနောက်ဆုံးပတ်ကနေ မေပထမပတ်ကုန်အထိ ကိုဗစ် လူနာဟာ ချောင်းဆုံမှာ ၁၃ ဦး၊ မော်လမြိုင်မှာ ၈ ဦး၊ပေါင်မှာ ၇ ဦး၊ မုဒုံမှာ ၆ ဦး၊ သံဖြူဇရပ်နဲ့ ကျိုက်ထိုမှာ ၃ ဦး၊ ကျိုက်မရောမှာ ၁ ဦး တွေ့ရှိခဲ့တာပါ။

အခုလို ကိုဗစ်ကူးစက်မှုတွေ ထပ်မံဖြစ်လာနေပေမဲ့ လူတွေက ပုံမှန်သွားလာနေကြသလို ကိုဗစ်စည်းကမ်းချက်ကို မလိုက်နာသရွေ့ ကူးစက်မှုတွေကတော့ ထပ်မံမြင့်တက်လာနိုင်တယ်လို့ ကိုဗစ်အရေးကူညီပေးနေတဲ့ လူမှုကယ်ဆယ်ရေးသမားတွေက ပြောပါတယ်။ 

လက်ရှိ ကိုဗစ်အတည်ပြုလူနာတွေကို သက်ဆိုင်ရာမြို့နယ်အသီးသီးက ကိုဗစ်ကုသဆောင်တွေမှာ ကုသမှုပေးနေပြီး အတည်ပြုလူနာတွေကို နေအိမ်မှာ ကွာရန်တင်းထားထားတယ်လို့ ကိုဗစ်အရေးကူညီပေးနေတဲ့ကျန်းမာရေးလုပ်သားတွေက ပြောပါတယ်။ 

အခုတကျော့ပြန် ကိုဗစ်ကူးစက်ခံရတဲ့သူတွေထဲမှ ရောဂါပြင်းထန်သေဆုံးတဲ့ လူနာတွေ မွန်ပြည်နယ်မှာ  အခုချိန်ထိ မရှိသေးဘူးလို့ သိရပါတယ်။

တနင်္သာရီတိုင်း၊ ထားဝယ်ခရိုင်မှာ ဧပြီ ၁၉ ရက်က ကိုဗစ်-၁၉ ကူးစက်လူနာ တယောက် တွေ့ရှိ ရတယ်လို့ စစ်ကောင်စီရဲ့ တိုင်းကျန်းမာရေးဦးစီးဌာနက ဧပြီ ၂၀ ရက်မှာ ထုတ်ပြန်ပါတယ်။

ထားဝယ်မြို့နယ်က သံသယလူနာ ၃၉ ယောက်ကို စစ်ဆေးခဲ့ရာမှ ကိုဗစ်ကူးစက် လူနာ တယောက်ကို တွေ့ရှိခဲ့ရတာဖြစ်ပါတယ်။

ထားဝယ်မှာ  ဒီဇင်ဘာ ၁၉ ရက်ကစပြီး ကိုဗစ်ကူးစက်ခံရသူလူနာ မရှိတော့ဘဲ ၄ လဝန်းကျင် အကြာမှာ အခုလို ကိုဗစ်ကူးစက်ခံရသူလူနာ ပြန်တွေ့လာရပါတယ်။

ဧပြီ ၁၉ ရက်က ကိုဗစ်ဓာတ်ခွဲအတည်ပြုလူနာဟာ ထားဝယ်တက္ကသိုလ်က အမျိုးသမီး တဦး ဖြစ်ပြီး ထားဝယ်ဆေးရုံမှာ ဆေးကုသခံယူနေရကာ ဧပြီ ၂၀ ရက်မှာလည်း ထားဝယ်မြို့က အမျိုးသား ၂ ဦးမှာ ကိုဗစ်အတည်ပြု စစ်ဆေးချက် တွေ့ရှိခဲ့ရပြီး stay at home ပုံစံနဲ့ ကုသ နေတယ်လို့ ထားဝယ်မြို့အခြေစိုက် ဇမ္ဗူသီရိလူမှုကူညီကယ်ရေးအဖွဲ့ထံကသိရပါတယ်။

ဧပြီ ၁၉ နဲ့ ၂၀ ရက် ၂ ရက်အတွင်း ထားဝယ်မြို့မှာ ကိုဗစ်အတည်ပြုလူနာ ၃ဦး ရှိလာပြီ ဖြစ်ပါတယ်။

ထားဝယ်ဒေသတွင် အခုလအတွင်း ကလေးသူငယ် သွေးလွန်တုပ်ကွေးရောဂါ ကူးစက်ခံ နေပြီး အသက်သေဆုံးတဲ့အထိ ဆိုးရွာတဲ့ ဖြစ်စဉ်တွေလည်း ရှိနေတယ်လို့ လူမှုကူညီ ကယ်ဆယ်ရေး ဆောက်ရွက်နေသူတွေဆီက သိရပါတယ်။

ပြီးခဲ့တဲ့နှစ် နိုဝင်ဘာ ၁၀ ရက်အထိ ထားဝယ်မြို့နယ်၊ ဇဟာသုသာန်မှာ သင်္ဂြိုဟ်ပေးခဲ့ရတဲ့ ကိုဗစ်ကူးစက်ခံရပြီး သေဆုံးသူပေါင်း ၆၀၁ ဦးရှိတယ်လို့ နာရေးကူညီမှု- ထားဝယ်ရဲ့ မှတ်တမ်း မှာ ဖော်ပြထားပါတယ်။

စစ်ကောင်စီရဲ့ကျန်းမာရေးဝန်ကြီးဌာနက ထုတ်ပြန်တဲ့ ဧပြီ ၁၉ ရက်အထိ ဓာတ်ခွဲအတည်ပြု လူနာစာရင်းမှာ ပြည်ပကနေ ဝင်လာသူ ၂၄ နဲ့ ပြည်တွင်းကူးစက်မှု ၁၅  ဦး စုစုပေါင်း ၃၉ ရှိနေပါတယ်။