ကိုဗစ်-၁၉ ရောဂါပိုးကူးစက်မှု တဖန်ပြန်လည်မြင့်တက်လာနေပြီး ကူးစက်မှုအခြေအနေကို စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ပေးနေပေမဲ့ နေပြည်တော်ဒေသခံအများစုက ကိုဗစ်ရောဂါထက် သဘာဝဘေးကြုံရမှာကို ပိုမိုစိုးရိမ်နေကြပါတယ်။
မြန်မာနိုင်ငံအတွင်း ကိုဗစ်-၁၉ ရောဂါကူးစက်မှုဟာ ပြီးခဲ့တဲ့ ဧပြီလကုန်ပိုင်း ကနေ ပြန်လည်မြင့်တက်လာခဲ့တာဖြစ်ပြီး အခုမေလ ပထမ ၁၀ ရက်အတွင်းမှာပင် ကူးစက်ခံရသူဦးရေ ၁၃၀၀ နီးပါးခန့်ရှိနေတယ်လို့ စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ချက်တွေအရသိရပါတယ်။
မေလ ၄ ရက်နေ့ တစ်ရက်ထဲမှာပင် ကူးစက်ခံရသူ ၂၀၀ နီးပါးရှိတယ်လို့ ထုတ်ပြန်ခဲ့ပေမဲ့ နေပြည်တော်မှာတော့ ကိုဗစ်-၁၉ ရောဂါအတွက် အကာအကွယ်ကြိုတင်ပြင်မှုတွေ တွေ့မြင်ရခြင်းမရှိပါဘူး။
ပုဗ္ဗသီရိမြို့နယ်နေသူတစ်ဦးက "တစ်နေ့ဘယ်လောက်ကူးစက်နေတယ်ဆိုတာ သတင်းတွေထဲမှာတော့ ပါနေတာပဲ။ ဒီမှာတော့ ဘယ်သူမှ အဲ့လောက်စိတ်မဝင်စားကြတော့ဘူး။ နေပြည်တော်က သိပ်မကူးခံရတာလည်း ပါမှာပေါ့။ အခုလောလောဆယ် ဦးတို့ကတော့ မုန်တိုင်းသတင်းပဲ စိတ်ဝင်စားနေတာ။ ကိုယ့်ဆီမှာ ဒီလောက်မဖြစ်လာနိုင်ပေမယ့် ဖြစ်လာခဲ့ရင် ဆိုပြီး တွေးပူနေကြတာပေါ့ " လို့ ပြောပါတယ်။
ကိုဗစ်-၁၉ ရောဂါနဲ့ ပတ်သက်လို့ နေပြည်တော်အဝင်ဂိတ်တချို့မှာ စစ်ဆေးမှုတွေရှိနေပေမယ့် ဒေသအတွင်းမှာတော့ စည်းကမ်းကန့်သတ်မှုတွေ မရှိသေးသလို လူစည်ကားရာ နေရာတွေနဲ့ ဈေးတွေမှာလည်း Mask တပ်သူနည်းပါးနေတာဖြစ်ပါတယ်။
နေပြည်တော်မှာ သဘာဝဘေးနဲ့ပတ်သက်ပြီး ပြီးခဲ့တဲ့ ဧပြီ ၂၁ ရက်U လယ်ဝေးမြို့နယ်အတွင်း လေပြင်းတိုက်ခတ်မှုကြောင့် ကျေးရွာနှစ်ရွာမှ အိမ်ခြေ ၂၀၀ ကျော်ပျက်ဆီးဆုံးရှုံးခံ့သလို လူအသေအပျောက်လည်း ရှိခဲ့ပါသေးတယ်။
ပဲခူးတိုင်း၊ ပြည်မြို့မှာ မေလ ၂ ရက်က ကိုဗစ်-၁၉ ရောဂါနဲ့ အမျိုးသမီးတယောက် သေဆုံးသွားတယ်လို့ ပြည်မြို့ နာရေးကူညီမှုအသင်းကနေ သိရပါတယ်။
သေဆုံးသွားသူဟာ အသက် ၆၇ နှစ်အရွယ် ဒေါ်ဆန်းနွဲ့ဖြစ်ပြီး ဧရာဝတီတိုင်း မြန်အောင်မြို့ကလာရောက် ဆေးရုံတက်နေရာကနေ မနေ့ မေလ ၁ ရက်မှာ ဆုံးပါးသွားတာလို့ နာရေးကူညီမှုအသင်း အဖွဲ့ဝင်တယောက်က ပြောပါတယ်။
“ဆေးရုံက တာဝန်ရှိသူကိုယ်တိုင်က ကိုဗစ်လို့ အတည်ပြုပေးတာ။ ဒါကြောင့်လည်း PPE ဝတ်စုံနဲ့ ဒီနေ့ ၂ ရက်နေ့ မနက် ၁၀ နာရီလောက်မှာ ISO-1(ICU)ကနေ သွားယူပြီး အေးငြိမ်းရာသုသာန်မှာပဲ သင်္ဂြိုဟ်လိုက်တာ။”
၂၀၂၂ ခုနှစ် မေလနဲ့ ဇွန်လတွေမှာ ဖြစ်ပြီးကတည်းက ကိုဗစ်-၁၉ ရောဂါ ပြည်မြို့မှာ မဖြစ်တာ လအတန်ကြာ ရှိနေပြီဖြစ်ပြီး အခု တကျော့ပြန် ဖြစ်ပွားနေတာ ဖြစ်ပါတယ်။
ပြည်မြို့ ရွာဘဲရပ်ကွက်နေသူတယောက်က “ရပ်ကွက်တွေထဲမှာလည်း တော်တော်လေး ဖြစ်နေကြတာ။ ကိုယ်တွေအိမ်ဆို တအိမ်လုံးနီးပါး ဖြစ်နေတာ။ ရာသီဥတုကလည်း ပြင်းတော့ အိမ်ပြင်မထွက်တော့ဘူး။ ကိုယ့်ဟာကိုယ် အောက်စီဂျင်မကျအောင် စက်ကလေးဝယ်ထားပြီး အားရှိအောင်၊ အစာဝင်အောင် စားပြီး သတိထားနေနေရတယ်။ တခြားနေရာတွေမှာလည်း ကြားနေရတယ်။ အဓိက က အသက်ကြီးသူတွေပဲ၊ သတိထားနေရတာ” လို့ ပြောပါတယ်။
အခုပြန်လည်ဖြစ်ပေါ်လာတဲ့ ကိုဗစ်-၁၉ ရောဂါက အိုမီခရွန်ရဲ့ မျိုးကွဲ XBB.1.1.16 Nickname : Arcturus ဖြစ်ပြီး ပြီးခဲ့တဲ့ ဇန်နဝါရီ ၂၃ ရက်က အိန္ဒိယမှာ စတွေ့ခဲ့ကာ အိန္ဒိယနိုင်ငံမှာ တရက်ကို လူနာအသစ် ၁၀,၀၀၀ ကျော်ရှိပါပြီ။
ဒီရောဂါဖြစ်ပွားမှုကို နိုင်ငံပေါင်း ၃၁ နိုင်ငံမှာ တွေ့နေရကာ လက္ခဏာက ဖျားတာနဲ့ ချောင်းဆိုးတာတွေ ဖြစ်တတ်ပြီး အသက်ကြီးသူတွေနဲ့ ရောဂါအခံရှိသူတွေ၊ ကိုယ်ခံအားနည်းသူတွေက ကိုဗစ်ကာကွယ်ဆေး ထပ်ဆောင်းထိုးထားသင့်ကြောင်း ကမ္ဘာ့ကျန်းမာရေးအဖွဲ့ (WHO) က သတိပေးထားပါတယ်။
